Jeryimáya 31 - Bokyi Bible

Banet-Ézerel ba/chi ba-fyi Dyijê

¹ Óburúkpâbí o/raa o/fu, nkéré mu o-bâ mú n/chi n-kyú Osówo mú kángkáng byikû-banet ḿbyí Ézerel, ne mbé ba/chi ba-kyú banet ejí.

² Ké kyikim-dyikán, n/ri banet ḿbé ba/fem bukyû bafip. Ké nkéré banet-Ézerel ba/mû ba-kyé ng dyijâng,

³ me n/fím tíbítíbí, m-byí n-kâm [kámbé.] Banet-Ézerel, ben kángkáng nkéré bamu ba-jê ng mě, ne ké bubwô ḿbún, me mu n-tông ng běn kyijé ejí n-câ kashú.

⁴ Me n/chi n-chî běn ebwât m-bi. Ben ba/chi ba-chîyip ekam enen ba-ne ane ké bunyîn-dyityém.

⁵ Ben ba/chi ba-chîkwón byichí ké eku nyí Samérya, ne banet ḿbé ba/chi ba-kwón kámbyí ba/chi ba-ryí byirim emen.

⁶ Ké ntûntû, nkéré mu o-bâ mú bambâm byikit ba/chi ba-bwom ké eku nyí Éferem ba-kó ba/fu, bâ n̂g byi-dim Záyon byi-kâm Osówo Óburúkpâbí eten.

⁷ Óburúkpâbí o/raa o/fu, kwán n̂ ekwan ne bunyîn-dyityém ba-kye Ézerel, oshê mú o/rêe o-shwôm eshê kángkáng. Kwán n̂ ekwan enen nyí akpee, ké nǎ, [Óburúkpâbí oo/nyii banet emen.] Nyǐ oo/nyii kángkáng banet ḿbé ba/mû ba/waa.

⁸ N/chi n-fím ne mbé ké kyicê ńkyí bushûyû ne n/chi n-fím ne mbé ké byicê-ejíí byimúmú m-kpaa kámbé n-tî kyikit kyibónge. Bansêe achi ne bankwa ba/chi ba-bâ ne mbé ké kyikû, cibicibi ne banet-afít ne banet ḿbé ba-kú ba-bâ efwon. Mbé ba/chi ba-bwa esim ba-firi kiǐtí-oshê.

⁹ Banet ejí ba/chi ba-fyi, ba-tii ng ba-bâ, ba-fâ nshwam ké nkéré n-kú n-sí ng kámbé ba-bwa ng esim ba-bâ. N/chi n-tông kámbé kiǐfáng ba-ribi ké buce, ké bukwóp ḿbú mbu gogégogé, ḿbú baa*kpán dyícíring*. Me mu wǎ bonchí mú Ézerel, ne Éferem o-chi i ókpá-wǎn ejí mú onyinchéng.

¹⁰ Óburúkpâbí o/raa o/fu, ejíí, fwôo n̂g atông ba-jwo mě, ba-bwom ké eshê nyí tíbítíbí ba-sét byiraa ejí. Me m/pwó banet ejí byiryibyiryi, nké n/chi m-kpaa kámbé, m-bám kámbé wǎ eringe nyí mbâm ebû odabám ebû emen.

¹¹ Me nn/chi banet-Ézerel ba-firi ké byiko ebe, ne nn/nyii kámbé ké abwô nyí kiǐtí-oshê.

¹² Mbé ba/chi ba-bâ ba-ba-kwán ekwan-bunyîn-dyityém ké kaku ńké Záyon, ne eyáré ejí e/chi e-nyîn kámbé. Eyáré nyí byiryíng ne bato ne bakút, eyáré nyí ebû ne bampong. Mbé ba/chi ba-kyú wǎ kyifát-byíkwôn ńkyí nkyi kyi-já ng omu kángkáng nkéré. Mbé ba/chi ba-já kángkáng byěm ḿbyí mbe ba-ryuu ng.

¹³ Ne ḿbé bwǎsíng-banyinyi kâng ba/chi ba-ne ane, ba-kyú ké bunyîn-dyityém, ne ḿbé banyinchéng, bakâa ne byisat ba/chi ba-jêe. Me n/chi n-fé kámbé dyityém, m-bírî bukyû ebe bu-firi bunyîn-dyityém, m-bírî bafip ebe ba-firi ojêe.

¹⁴ N/chi n-kye banchi kyifen ejí byiryíng ḿbyí byi/nwa byi-shwôm ne n-kye banet ejí ńkyí mbe ba-ryuu ng. Me Óburúkpâbí nké n/raa.

¹⁵ Óburúkpâbí o/raa o/fu, banet ba/jwo ejá ké oshê mú badakó Ríma, ejá nyí bukyû etii ḿbú boo*nwa eri*. Ríchel mu o-tii ng bwǎn emen ḿbé baa/kpû, ne o*fí o-nwa ng dyityém efé*.

¹⁶ Mîng bukyû eyên etii, a-shî batíí. Kángkáng byěm ḿbyí aa/chi bwǎn eyên bii*ba/chi byi-waa kyísí dyikáá*. Mbé ba/chi ba-fím ké esí nyí banet-bushwôn ba-fyi.

¹⁷ Kyi/chi kyi-kyú kanong ne wo ké nkéré mú mu o-bâ ké kashú. Bwǎn eyên ba/chi ba-bwa esim dyijê. Me Óburúkpâbí nké n/raa.

¹⁸ Me n/jwo banet ḿbé Ézerel ké mbe ba-raa ng ké bafip ba/fu, Óburúkpâbí, be byi/mû wǎ enyam-dyikán, nké wo a/tángê bě eringe byidachi ńkyí wo ada bě esét. Bwa ne be esim. Be bii/kpá byiko ḿbyí byidabwa esim byi-kâm ǒ wo mú amu Osówo Óburúkpâbí eten.

¹⁹ Be byi/bírî ǒ esim, nké ka*da/rí* byi-kpet eryuu byi/fu, byi-bwa ng esim. Ké nkéré mú wo a/kye bě busông, be byi/tíngê ashí eten kyísí ké bafip. Byi-firi bashú kyísí ne éshwân, ké nǎ, be byi/chi kyibî ké nkéré byi/tôong bwǎsíng.

²⁰ Ézerel, wo a-chi i wǎn ejí mú dyityém, wǎn mú oda mě ejang ejê. Nang nkéré orá nké [n/zîim dyizîn eyên, n-kabe ng] kyi-kim ne wo ne kyijé. Dyityém ejí dii/jé dyi-kâm ǒ. N/chi n-ri ǒ bafip.

²¹ Tî n̂g ekap, ba-kan bukwóp. Chi n̂g ekyé bukwóp ḿbú ben ba/cen ne ba-dim. Bwa n̂g esim, ǎ banet-Ézerel. Bwa n̂g esim ké eshê nyí ba/dim ba-mîng.

²² Ben banet ḿbé ba*da/fé dyityém ne me* ka-rí i nǎ ne ba-mîng ekyú ne atyém afee. Me nn/chi chwǒm ńkyí kyifyîfî ńkyí kyi/yángê, ńkyí kyi/yángê [wǎ onyinyi mú mu o-ku ng onyinchéng o/fu, chwǒm kyi*da ǎ eta*.]

Kanong ńké Banet-Osówo, ńké nke ka-bâ ké Nkéré mú ké Kashú

²³ Osówo Óburúkpâbí mú Ézerel mú o/rêe o-shwôm, o/raa o/fu, ké nkéré mm/bwa ne banet ejí esim ké esí ebe, mbé ba/chi ba-chîraa ké esí nyí Júda ne ké eshê emen ba/fu, kyi/bát Óburúkpâbí ojware kaku-ociring ké Jerúsélem, kyikit-ociring ńkyí nyǐ mu o-kyú u.

²⁴ Banet ba/chi ba-kyú ké Júda ne ké kángkáng eshê emen, ne bamkpang kyifát ba/chi ba-firi, ne bambâm ebû to ne ebû ba/chi ba-firi.

²⁵ Me n/chi n-chi banet ḿbé baa/kyee ba-firi shwaneshwane, ne n/chi n-kye nang yeě mú oo/jwâa esong byiryíng. [

²⁶ Ké bubwô ámbu kâng, banet ba/chi ba-kûraa ba/fu, me n-dim m n-da-rí sáre, n-jwóbê shwaneshwane.]

²⁷ Me Óburúkpâbí mu n-raa ng n/fu, nkéré mu o-bâ mú n/chi n-chi esí nyí Ézerel ne Júda e-sú banet ne enyam.

²⁸ Ne wǎ eringe nyí me n/kúng nkéré mú n/tut kámbé n-zú n-twóp kyísí, m-kpógê kámbé, m-bên kámbé, eringe ányi to ebónge nké n/chi n-kúng nkéré m-bwât n-kwón kámbé, m-bi kámbé ba-bwom cip.

²⁹ Ké nkéré mú nkéré ámu oo/fyi, banet baa*raa to ba/fu, banchí ebe ba/ryí byirim-byichí ḿbyí bii/fwoo* nké bwǎn ebe ba/jwo buruu*.

³⁰ Nké nang yeě nké o/ryí byirim-byichí ḿbyí bii/fwoo, asháng a/chi a-kpú ǎ ryigiryigi, ne nang yeě o/chi o-kpú ké bubwô ḿbú kyibî ńkyí emen nyǐ oyén.

³¹ Óburúkpâbí o/raa o/fu, nkéré mu o-bâ mú n/chi n-ryí ocím mú ofyîfî ne banet ḿbé Ézerel ne Júda n-sem byiko ejí.

³² Oo*ba/chi o-chi wǎ mú kpákpá mú n/ryí ne banchí ebe ḿbé kpákpá* ké nkéré mú n/níbî kámbé ké bubwô* n-fîm kámbé ba-byí ké Éjip*. Nang ké m/mû kámbé wǎ otyép, mbé ba*da/tî ocím ámu mú n/ryí ne mbé*.

³³ Ocím mú ofyîfî mú n/chi n-ryí ne banet-Ézerel mu něen. N/chi n-fé kámbé byije ejí ké byiko ebe, n-sáng kámbé kámbyí ké atyém ebe. Me n/chi n-kyú Osówo ebe, ne mbé ba/chi ba-kyú banet ejí.

³⁴ Onet o*fí ké burwám ebe mú o/chi o-tángê otángé onet-oshê emen eringe nyí odanyît Óburúkpâbí* ké nǎ, kángkáng ba/chi ba-nyît mě kyi-fím ké onet mú mu kyísí kyísí tete kyi-ribi ké mú mu kiǐtí o-shwôm kángkáng. N/chi n-pwoo kámbé byibî ebe ne mm*ba/chi n-chîzîim byibî ebe*. Me Óburúkpâbí nké n/raa.

³⁵ Óburúkpâbí mu o-tî ng óbyísû o/fu, okye kiinwángé ne esû, o-tî otukáku ne ékpére o/fu, esan ne buchú. Nyǐ mu o-náng ng baya ḿbé baryên o-chi i kámbé ba-kpet erime. Dyizîn emen dyi-bángê e Óburúkpâbí mú o/rêe o-shwôm.

³⁶ Nyǐ o/ryí ocím o/fu, eringe nyí byěm ḿbyí nyǐ oo/chi byi/chi byi-rí, éné to nké oshê mú Ézerel o/chi o-rí.

³⁷ Dyicí ńdyí onet o/chi o-man ekan bubóng, o-kyé to o-ri ńkyí nkyi ké kafâ-ejíí, dyicí ándyi kâng nké nyǐ o/chi o-né banet-Ézerel, ké bubwô ḿbú kángkáng byěm ḿbyí baa/chi. Óburúkpâbí nké o/raa.

³⁸ Óburúkpâbí o/raa o/fu, nkéré mu o-bâ mú ba/chi ba-bwât Jerúsélem ba-bi wǎ oshê emen kyi-fím ké kiǐnyáám-kyikit-mbâm ńkyí badakó Hánánel kyi-ribi ké dyifyi ńdyí badakó Dyímongé.

³⁹ Ne buti bu/chi bu-fím ányi tete bu-jâ ké kyicê ńkyí esû nyi e-ríbî ng bu-ribi ké kaku ńké badakó Gárep, bu-wáp Gówa bu-fé ké kafâ.

⁴⁰ Owo omúmú mú mbe ba-ryii ng banet, ba-pwó ng biǐbyém, ne kángkáng dyikán ńdyí ndyi ké bukô-kace ńké badakó Kyídoron, tete kyi-ribi ké dyifyi ńdyí badakó Kabyî-orá, ké kyicê ńkyí esû nyi e-byí i, byi/chi byi-firi byikit-ociring ḿbyí byi/já mě. Banet baa*ba/chi ba-chîman ebú oshê ámu* ba-bên kámú*.