Jeryimáya 29 - Bokyi Bible

Léta mú Jeryimáya o/sáng o-kye Banet-Jûs ḿbé ba/mû ké Bábyílon

¹ Nyín byiraa ḿbyí me Jeryimáya n/sáng ké léta ké Jerúsélem, n-kye banet-ashí ne banchi kyifen-Osówo ne bamkpábé ḿbé badasét byiraa-Osówo ne kángkáng banet ḿbé Otu Nébúkanéza o/kám kámbé wǎ básóng, o-jâ ne mbé Bábyílon.

² N/sáng kámú ké nkéré mú Otu Jehóyákin ne boné emen ne banet ḿbé ba/mû ba-chi i bǎmkpóngé ké kyibám-butu ne banet-ashí ḿbé Júda ne Jerúsélem ne bantim byěm ne banet ḿbé ba/kwâa byěm ba-kpí ba/mû baa/dim ké Jerúsélem ba-jâ Bábyílon.

³ Me n/twóm léta ámu ké abwô nyí Elása mú wǎn-Sháfan ne Gemaryâ mú wǎn-Hyíkya, ḿbé Otu Zedekyâ o/twóm kámbé Bábyílon, ké kyikit ńkyí Otu Nébúkanéza. Léta ámu o/sét o/fu,

⁴ Osówo Óburúkpâbí mú Ézerel mú o/rêe o-shwôm o/fu, ben kángkáng banet ḿbé me nn/fîm běn ké Jerúsélem n-jâ ne ben Bábyílon,

⁵ bi n̂g byise ba-kyú ké mbyí. Kpang n̂g byifát ba-ryí ḿbyí ba/kwón ké mbyí.

⁶ Bé n̂g banyi ba-fwon bwǎn ba-yip bwǎn enen ba-kye ké abé, eringe nyí badafwon bwǎn. Jê n̂g ba-câ kashú ké Bábyílon, *da n̂g ebwa esim kyísí*.

⁷ Nké chi n̂g kanong ba-kye oshê mú me nn/twóm běn ké mǔ, ba-fé nshwam ba-kye mě ké dyishí-oshê ámu, ké nǎ, ké bubwô ḿbú kanong ńké oshê ámu nké ben to ba/chi ba-já kanong ńké enen.

⁸ Ké nǎ, Osówo Óburúkpâbí mú Ézerel mú o/rêe o-shwôm oo/raa o/fu, *da n̂g ebángê bamkpábé ḿbé badasét byisédéng ne bansô epé ḿbé mbe ké burwám enen ba-nîm běn*. *Da n̂g ebángê ké barê [ebe] ḿbé mbe ba-ri ng*.

⁹ Ké nǎ, ńkyí mbé mbe ba-sét ng běn ké dyizîn ejí kyi*fí ké kafâ*. Me Óburúkpâbí n/sét n/fu, me n*da/twóm kámbé*.

¹⁰ Ké nǎ, Óburúkpâbí o/raa o/fu, ké nkéré mú baa/rí bajam-aje bachât esim diǐkpú ké Bábyílon, me n/chi m-ba-ri běn, ne n/chi n-chi eringe nyí me m/mû n/ryí běn ocím, ne n/chi m-bwa ne ben esim ké kyikit ńkyín.

¹¹ Me Óburúkpâbí n/raa n/fu, ké nǎ, me mu n-nyît ng okabe mú n/tî běn, okabe mú kanong, *chí mú kyibî* mú ba/chi ba-kyú ne mǔ [ké nkéré mú mu o-bâ ké kashú ne mú badatî achi*.]

¹² Ne ben kâng ba/chi ba-bâ ba-kâm mě, ba-fé nshwam ba-kye mě, ne me n/chi n-jwo běn.

¹³ Ben ba/chi ba-kyé mě, ba-ri mě. Ké nkéré mú ben baa/kyé mě ne atyém enen kángkáng,

¹⁴ ben ba/chi ba-ri mě, ne n/chi m-bwa ne kanong enen n-kye běn. Ne n/chi m-kpî běn ké kángkáng eshê nyí me m/mû nn/ró běn m-pwó, ne n/chi m-bwa ne ben esim ké kyikit ńkyí ben ba/mû ne n-twóm běn ba-dim ké eshê ekíri. Me Óburúkpâbí nké n/raa.

¹⁵ Ké bubwô ḿbú ben ba/raa ba/fu, Óburúkpâbí oo/twóm bamkpábé ba-kâm bě ké Bábyílon,

¹⁶ Óburúkpâbí oo/raa kyi-kim ne otu mú mu ké kakyúng-butu ńké Otu Dívit ne kyi-kim to ne kángkáng banet ḿbé mbe ké oshê mún ne banet enen ḿbé ba*da/dim ne ben ké kyikû ba-jâ eshê ekíri*.

¹⁷ Óburúkpâbí mú o/rêe o-shwôm oo/raa o/fu, me mu n-twóm m kámbé byití ne esong ne byirwóm, ne n/chi n-chi kámbé ba-firi wǎ byibî-byirim-byichí ḿbyí byi/jang ebên byi-shwôm ḿbyí banet baa*man eryí*.

¹⁸ N/chi n-nwa ne mbé ké byití ne esong ne byirwóm, ne n/chi n-chi kámbé ba-firi kyibî-chwǒm ké bushú ḿbú kángkáng eshê nyí ké ejíí, ba-firi kyishû ne bushî ne chwǒm-akorong eshú ne chwǒm-éshwân ké burwám-banet ḿbé n/ró kámbé n-twóp,

¹⁹ ké nǎ, mbé ba*da/jwo kyiraa ejí ńkyí nn/sét kámbé* ńkyí m/mû n-sét ng kámbé n-nye ng n-fâ ké ocím mú bǎmgbán ejí ḿbé mbe bamkpábé ḿbé badasét byiraa ejí*.

²⁰ Ben ashí kángkáng ḿbé n/fîm běn ké Jerúsélem n-twóm Bábyílon, fwôo n̂g atông ba-jwo ńkyí me Óburúkpâbí mu n-sét ng.

²¹ Osówo Óburúkpâbí mú Ézerel mú o/rêe o-shwôm oo/raa kyi-kim ne Otu Éhap ne Otu Zedekyâ ḿbé mbe ba-sét ng běn byisédéng ké dyizîn emen. Nyǐ oo/sét o/fu, nyǐ o/chi o-kúng kámbé o-kye Otu Nébúkanéza, mú o/chi o-ju kámbé ké bushú enen.

²² Â banet ḿbé ba/kúng kámbé wǎ básóng ké Jerúsélem ba-jâ ne mbé Bábyílon ba-kú ba-bâ eshú onet, mbé ba/chi ba-kûraa ba/fu, kyi/bát Óburúkpâbí ochi ǒ wǎ eringe nyí o/chi Otu Zedekyâ ne Otu Éhap, ḿbé otu mú Bábyílon o/fwá kámbé okpó.

²³ Ńkyín kyi/chi kyi-chi kámbé, ké nǎ, mbé ba/chi byibî ḿbyí bii*nwa eri* mbé baa/chi byinam ne baa/sét byisédéng ké dyizîn ńdyí Óburúkpâbí, byěm ḿbyí Óburúkpâbí o/fu, ba*dachi*. Nyǐ mu o-nyît ng ńkyí mbé [baa/chi, ne oo/ri kámbé.] Me Óburúkpâbí nké n/raa.

Léta mú Shemáya

²⁴ Sét Shemáya mú Nehélam a/fu,

²⁵ Osówo Óburúkpâbí mú Ézerel mú o/rêe o-shwôm o/fu, wo aa/twóm léta ké dyizîn eyên a-kye kángkáng banet ḿbé ké Jerúsélem ne Zefanyâ mú wǎn-Masáya mú nchi kyifen-Osówo ne kángkáng banchi kyifen-Osówo a/fu,

²⁶ Óburúkpâbí oo/chi ǒ wo nchi kyifen emen o-mîng Jehóyáda mú o/mû nchi kyifen emen, ne wo kántîk a/firi [onet-dyishí] mú kiǐtí-kyise-kyifen-Osówo echi. Kyi/firi bǎmkpóngé eyên ḿbé adari a/fu, onet-kyifún nang orá mú mu o-nîm m banet o/fu, nyǐ o-chi i mkpábé mú odasét byiraa-Osówo bafé ǎ bamgbokobá ne kyifóngé ńkyí kiǐrékiire.

²⁷ Ebóng wo a*da/fé ne Jeryimáya mú o/fím Anátot kyifóngé* mú mu o-sét ng banet byiraa wǎ mkpábé mú odasét byiraa-Osówo*.

²⁸ A-man a-chi ǎ o-mîng, ké nǎ, nyǐ o/sét banet ḿbé mbe ké Bábyílon o/fu, mbé ba-waa ng ké mgbokobá ka-rí chwóó, o/fu, babi byise ba-kyú ké mbyí, ba-kpang byifát, ba-ryí ḿbyí badakwón.

²⁹ Zefanyâ o-kó léta mún o-sét mě,

³⁰ ne Óburúkpâbí o-sét mě kâng o/fu,

³¹ twóm ejá e-kâm kángkáng banet ḿbé ba/kám kámbé ba-jâ ne mbé Bábyílon a/fu, Óburúkpâbí oo/raa něen kyi-kim ne Shemáya mú o/fím Nehélam o/fu, ké nǎ, Shemáya oo/sét běn byiraa ḿbyí me n*da ǎ etwóm* ne oo/chi běn ba-fé dyityém ké kyisédéng,

³² ké bubwô ámbu, me n/chi n-kye Shemáya ne kyikû-banet emen busông. Onet o*fí ké burwám-banet emen mú o/chi o-waa ké burwám-banet ḿbén o-ri kanong ńké n/chi n-chi n-kye banet ejí* ké nǎ, nyǐ oo/raa byiraa ḿbyí byidachi banet ba-bwom bunwa ne Óburúkpâbí. Me Óburúkpâbí nké n/raa.