Jeryimáya 27 - Bokyi Bible

Jeryimáya o/fé Kyifóngé ké Kyitông wǎ Ósóng

¹ Ńdyí Otu Zedekyâ mú wǎn-Otu Josáya o-ryí i butu ké Júda o-bâ, Óburúkpâbí o/sét mě o/fu,

² me nchi kyifóngé n-fé ké kyitông wǎ ósóng.

³ Ne Óburúkpâbí o-sét mě o/fu, me [ntwóm kyitwóm] kyi-kâm batu ḿbé Édom ne Mówep ne Ámon ne Táya ne Sádon. Me nsét banet-kyitwóm-eshê ányi ḿbé ba/mû ba/bê ké Jerúsélem ba/fu, mbé ba-bâ ng eri Otu Zedekyâ.

⁴ Osówo Óburúkpâbí mú Ézerel mú o/rêe o-shwôm o/sét mě o/fu, me nsét kámbé ba-sét batu ebe ńkyí nyǐ oo/sét o/fu,

⁵ me n/chi ejíí ne banet ne kángkáng enyam nyí nyi e-kyú u ké ejíí, ké kiǐtí-busa ejí. Ne n-kyâ nang yeě mú o/nyîn mě kányí.

⁶ Me nké n/kúng kángkáng eshê ńnyín n/fu, ekyú ké bubwô ḿbú Otu Nébúkanéza mú ḿgbán ejí, ne nn/chi nang enyam nyí ké dyikán n/fu, ekû ǎ ekye ofê.

⁷ Kángkáng eshê e/chi e-kyú ḿgbán emen, ne e/chi e-kyú ḿgbán mú wǎn emen ne wǎn mú wǎn emen tete nkéré o-fyi mú oshê emen o/chi o-róng. Ne oshê emen kâng o/chi o-kyú ḿgbán mú biǐtí-batu ne eshê nyí nyi ne busa.

⁸ Nké â oshê nang orá nang butu to nang burá nké ba/fu, mbé baa*kyú ké bubwô emen* n/chi n-kye oshê ámu busông ḿbú byití ne esong ne orwôm tete m-mîng Otu Nébúkanéza o-bên oshê ámu kángkáng.

⁹ *Da n̂g ejwo ńkyí bamkpábé enen ḿbé badasét byisédéng* ne ńkyí nang yeě mú mu o-sét ng o/fu, nyǐ o-man n esét ńkyí kyi/chi kyi-chi ké kashú* ké burê eri* nang ké bakúsí ejwóbê* nang ké bambirirím*. Mbé kángkáng mbe ba-sét ng běn ba/fu, ben ba*dachi ba-kyú ké bubwô ḿbú otu mú Bábyílon*.

¹⁰ Mbé mbe ba-nîm m běn, ne ba/chi ba-chi ba-kám běn ké oshê enen ba-dim ne ben tíbítíbí. Me n/chi n-ró běn, ne ba/chi ba-ju běn.

¹¹ Nké â oshê nang orá nké o/bángê o/fu, mǔ o-kyú u ké bubwô ḿbú otu mú Bábyílon, o-kyú ḿgbán emen, me n/chi m-mîng oshê ámu o-waa ké esí nyí e/já kámú, o-kûchi kyifát ké nyǐ, o-kyú ké nyǐ. Me Óburúkpâbí nké n/raa.

¹² Me n/sét to Otu Zedekyâ dyizong-chwǒm ńdyín dyibónge n/fu, yip byiko eyên a-kye otu mú Bábyílon. Kyú ḿgbán emen ne mú banet emen ne wo a/chi a-kpen.

¹³ Ebóng ńkyí wo ne banet eyên badakpú ké byití ne esong ne orwôm. Ńkyín nké Óburúkpâbí oo/sét o/fu, kyi/chi kyi-chi oshê nang orá mú o*da/kúng byiko emen o-kye otu mú Bábyílon*.

¹⁴ *Dachi a-jwo ńkyí bamkpábé ḿbé badasét byisédéng mbe ba-sét ng ǒ* ba/fu, wo a*dachi a-kúng byiko eyên a-kye ǎ*. Mbé mbe ba-nîm m ǒ.

¹⁵ Óburúkpâbí oyén oo/sét o/fu, nyǐ o*da/twóm kámbé* ne mbe ba-sét ng ǒ byisédéng ké dyizîn emen. Ne ké bubwô ámbu, nyǐ o/chi o-ró ǒ, ne ba/chi ba-ju ǒ, wo ne bamkpábé ḿbé mbe ba-sét ng byisédéng ḿbyín.

¹⁶ Ne n-sét kâng banchi kyifen-Osówo ne kángkáng banet n/fu, Óburúkpâbí oo/sét o/fu, *da n̂g echi ba-jwo ńkyí bamkpábé ḿbé badasét byisédéng mbe ba-sét ng* ba/fu, ba/chi ba-wá ebwa esim ne byěm-kiǐtí-kyise-kyifen-Osówo echi ḿbyí ba/kúng ba-dim ne mbyí Bábyílon*. Mbé mbe ba-sét ng běn byisédéng.

¹⁷ *Da n̂g ejwo kámbé*. Kúng n̂g byiko enen ba-kye otu mú Bábyílon, ne ben ba/chi ba-kpen. Ebóng ńkyí badashí oshê mún.

¹⁸ Â mbé ké ntûntû mbe bamkpábé ḿbé badasét byiraa ejí, ne â mbe ne kyitwóm ejí, mbé babí mě me Óburúkpâbí mú o/rêe o-shwôm ba/fu, me n*dachi m-mîng ba-yip byěm ḿbyí byi/waa ké kiǐtí-kyise-kyifen ejí echi* ne ké kyise-butu ba-dim ne mbyí Bábyílon*.

^19-20 Ké nkéré mú Otu Nébúkanéza o/kám Otu Jehóyákin mú wǎn-Otu Jehóyákim, mú otu mú Júda, ne banet-ashí ḿbé Júda ne Jerúsélem o-dim ne mbé Bábyílon, o/mîng byikwap-kyise ne kiimbâng-dyicáng ńdyí ba/chi ké borôn ne byěm ḿbyí badabírî atû, ne byěm byikíri ḿbyí ké kiǐtí-kyise-kyifen-Osówo echi.

²¹ Fwôo n̂g atông ba-jwo ńkyí me Osówo Óburúkpâbí mú Ézerel mú o/rêe o-shwôm mu n-sét ng kyi-kim ne byěm ḿbyí ba/mîng ké kiǐtí-kyise-kyifen ejí echi ne ké kyise-butu ńkyí ké Jerúsélem.

²² N/fu, ba/chi ba-kúng kámbyí ba-dim ne mbyí Bábyílon, ne byi/chi byi-waa áku tete m-bírî achi n-tún kámbyí. Ne m-bwa ne mbyí esim kâng m-ba-tî kámbyí ké kyikit ńkyín. Me Óburúkpâbí nké n/raa.