Jeryimáya 26 - Bokyi Bible

Ba/pan Jeryimáya Mpan

¹ Ńdyí Otu Johákim mú wǎn-Otu Josáya o-ryí i butu ké Júda o-bâ,

² Óburúkpâbí o/raa ne me o/fu, bwom ké kafâ-kiǐtí-kyise-kyifen-Osówo echi a-sét kángkáng ńkyí me nn/kye ǒ busa n/fu, sét banet ḿbé ba/fím eshê nyí Júda ba-bâ ofê ekye. *Dachi a-mîng chwǒm nang kyibónge*.

³ Katô banet ámbe ba/chi ba-fwôo atông ba-jwo, ba-mîng byibî-akwóp ebe. Â ba/jwo, me n/chi n-yángê kâng okabe ejí kyi-kim ne busông ḿbú m/mû n/kabe n/fu, n-kyâ kámbé ké kángkáng byibî-byěm ebe ḿbyí ba/chi.

⁴ Óburúkpâbí o/sét mě o/fu, me nsét banet ámbe n/fu, me Óburúkpâbí n/sét n/fu, ba-man ba-fé mě ké byěm echi ḿbyí me n/tángê běn,

⁵ ne ké atông efwôo ké byiraa ḿbyí bǎmgbán ejí ḿbé mbe bamkpábé ḿbé badasét byiraa ejí, ḿbé me mu n-twóm m n-kyâ běn. Ben ba*da/chi ne ńkyí mbé ba/sét běn*.

⁶ Â bamu ba-câ kashú ba-né ng echi ńkyí ba/sét běn, n/chi n-chi kâng kiǐtí-kyise-kyifen ejí echi ńkyín wǎ eringe nyí n/chi oshê mú Shílo, ne kángkáng eshê nyí ké ejíí ba/chi ba-kúng dyizîn-oshê mún wǎ kyishû.

⁷ Banchi kyifen-Osówo ne bamkpábé ḿbé badasét byiraa-Osówo ne kángkáng banet ba/jwo mě ké mu n-sét ng byěm ḿbyín ké kafâ-kiǐtí-kyise-kyifen-Osówo echi.

⁸ Ne ké nkéré m-man n m-bâ kángkáng ńkyí Óburúkpâbí o/mû o/kye mě busa o/fu, me nsét, banet ámbe ba-kám mě ba-wonge ba/fu, a-nyîn n eju ké ńkyí a/sét něen.

⁹ Ebóng wo a/raa ké dyizîn ńdyí Óburúkpâbí a/fu, kiǐtí-kyise-kyifen-Osówo echi ńkyín kyi/chi kyi-firi wǎ Shílo, ne ba/chi ba-bên oshê mún, onet oo*kyú to ké mǔ*. Ne banet ámbe kâng ba-wâng mě ba-fé ké otyém.

¹⁰ Ké nkéré banet-ashí-oshê ḿbé Júda ba/jwo ńkyí kyi/chi, ba-dim ochéé óchee ké kyibám-butu ba-bâ ké kiǐtí-kyise-kyifen-Osówo echi, ba-ba-kyú ké byikit ebe, ké dyifyi ńdyí dyifyîfî.

¹¹ Ne banchi byifen-Osówo ne bamkpábé ḿbé badasét byiraa-Osówo ba-sét kâng banet-ashí-oshê ámbe ne banet ḿbé ba/mû ányi ba/fu, kyi/bát ńkyí badakét mpan mú badashwân onyinchéng mún, ké nǎ, o/raa byibî-byiraa kyi-kim ne oshê eten. Ben ba/kúng atông enen ba-jwo ǎ.

¹² Ne n-raa kâng n/fu, Óburúkpâbí nké o/sét mě o/fu, me nsét kángkáng byěm ḿbyí ben baa/jwo mě n-sét kyi-kim ne kiǐtí-kyise-kyifen-Osówo echi ńkyín ne oshê mún.

¹³ Ba-man ba-yángê akwóp-dyikpen nyí bamu ba-kyú u ne byěm ḿbyí bamu ba-chi i, ne ba-man ba-chi ńkyí Osówo Óburúkpâbí enen o/sét. Â ben ba/chi éné, nyǐ o/chi o-yángê okabe emen kyi-kim ne busông ḿbú nyǐ o/mû o/fu, nyǐ o-kyâ běn.

¹⁴ Kyi-kim ne me, me mu ké busa ḿbú enen. Chi n̂g mě ńkyí ben ba/kabe ba/fu, nkyi kanong ne kyi/kwárê.

¹⁵ Nké ben ba-man ba-nyît ńkyín ba/fu, â ben ba/ju mě, ben ne banet ḿbén ba/chi ba-chi kyibî ńkyí ba/ju onet mú o*da/chi chwǒm* ké nǎ, Óburúkpâbí nké o/twóm mě o/fu, me nkuri běn ekó ńnyín.

¹⁶ Ne banet-ashí-oshê ne banet ḿbé ba/mû ányi ba-raa kâng ne banchi kyifen-Osówo ne bamkpábé ḿbé badasét byiraa-Osówo ba/fu, onyinchéng mún o/pem bě ké dyizîn ńdyí Osówo Óburúkpâbí eten. Byi*dachi byi-ju ǎ*.

¹⁷ Ké nkéré ba/raa ńkyín, kyicê-banet-ashí-oshê ba-bûu nensang ba-raa ne banet ḿbé ba/mû ba/bacibi ányi ba/fu,

¹⁸ ké nkéré Otu Hezekyâ o/mû otu mú Júda, mkpábé mú odasét byiraa-Osówo mú odabángê Máka, mú o/fím Móréshet o/sét kángkáng banet o/fu, Óburúkpâbí mú o/rêe o-shwôm o/sét o/fu, ba/chi ba-kpang oshê mú Záyon wǎ kyifát. Jerúsélem o/chi o-firi dyizu-byěm ḿbyí bii/shí, ne kiǐtí-kyise-kyifen-Osówo echi kyi/chi kyi-bírî kyizinge.

¹⁹ Otu Hezekyâ ne banet ḿbé Júda ba*da/ju Máka*. Ńkyí ba/mû ba/chi ba-ju ǎ, Otu Hezekáya o/bwa o-shî Óburúkpâbí o-kan o/fu, nyǐ o-chi i ńkyí kyida ǎ enyîn. Óburúkpâbí o-yángê okabe emen kâng kyi-kim ne busông ḿbú o/mû o/fu, nyǐ o-kyâ kámbé. Kántîk kâng byi-kú byi-bâ ne kiǐtí-afaníkong ké byiko eten.

²⁰ Onyinchéng obónge to o/mû kô mú o/mû o-bángê e Oryâ, mú wǎn-Shemáya, mú o/fím Kyíryat-Jérim, mú o/raa kyibî ké dyizîn ńdyí Óburúkpâbí kyi-kim ne oshê mún ne oshê eten wǎ eringe nyí Jeryimáya o/raa.

²¹ Ké nkéré mú Otu Jehóyákim ne basúja emen ne banet-ashí-bǎmkpóngé emen ba/jwo ńkyí Oryâ o/fu, otu o/kan o/fu, nyǐ o-ju ng ǎ. Nké Oryâ o/jwo kyi-kim ne nkyí, ne o-chêe kâng ké bushî o-jâ Éjip.

²² Otu Jehóyákim kâng o-twóm Enátan mú wǎn-Ákobo ne banet bakíri o/fu, baca Éjip ba-da-kám Oryâ.

²³ Ba/da ǎ ekám ba-bâ ne nyǐ ké kyikit-Otu Jehóyákim, mú o/ju ǎ, o-yip kyikwóm-enyam-byiko emen o-twóp ké kyikit ńkyí mbe ba-ryii ng banet-byikpu.

²⁴ Nké, ké nǎ, Ahíkam mú wǎn-Sháfan o/mû o/bwom ne me ké esim, ba*da mě ekám ba-kye banet ba-ju*.