Jeryimáya 25 - Bokyi Bible

Banet-Bushwôn ḿbé ba/fím Kyicê ńkyí Bushûyû

¹ Ké nkéré mú kyi/byí aje anyii ńdyí Otu Jehóyákim mú wǎn-Otu Josáya o/ryí butu ḿbú Júda, me n/koo kyitwóm ne Óburúkpâbí kyi-kim ne kángkáng banet ḿbé Júda. Nkéré ámu kyi/mû mbwôp kashú-dyije ńdyí Otu Nébúkanéza o/ryí butu ké Bábyílon.

² Me n/sét kángkáng banet-Júda ne Jerúsélem n/fu,

³ ké aje bujam ne achât, kyi-fím ké nkéré mú kyi/rí aje diǐkpú ne achât nyí Otu Josáya mú wǎn-Ámon o/ryí butu ké Júda tete dyicí ńdyí kurún, Óburúkpâbí o/sét mě byiraa, ne me n*da běn emîng ne esét ńkyí mu o-sét ng*. Nké ben ba*da/fwôo atông ba-jwo*.

⁴ Ben ba*da/fwôo atông ba-jwo* nang ké Óburúkpâbí mu o-twóm m běn bǎmgbán emen ḿbé mbe bamkpábé ḿbé badasét byiraa emen*.

⁵ Mbé ba/sét běn ba/fu, ben bamîng byibî-akwóp-akpen enen ne byibî-byěm ḿbyí bamu ba-chi i eringe ben badachîkyú ba-ca kashú ké esí nyí Óburúkpâbí o/kye běn ne banchí enen ḿbé kpákpá o/fu, ewaa nyí enen ne banyá.

⁶ Mbé ba/sét běn ba/fu, ben ba*dachi ba-fé esówo ekíri* ba-chi Óburúkpâbí o-sa kafâ ké ofê mú bamu ba-kyâ erím-bakye nyí ben ba/chi*. Â ben ba/mû ba/chi ńkyí Óburúkpâbí o/sét běn, nyǐ o/mû oo*ba/chi o-kye běn busông*.

⁷ Nké Óburúkpâbí oyén mu o-sét ng o/fu, ben ba/né ejwo ńkyí nyǐ o/sét běn. Nké ba/bwa ba-chi kafâ ka-sa ǎ ne erím-bakye enen, ne baa/bê ne busông ḿbún ké byiko enen.

⁸ Ké bubwô ḿbú ba*fí ba-jwo ng ǎ* Óburúkpâbí mú o/rêe o-shwôm o/sét o/fu,

⁹ me n/chi n-twóm kángkáng banet ḿbé mbe ké kyicê ńkyí bushûyû ne ḿgbán ejí, Otu Nébúkanéza mú Bábyílon ba-bâ. N/chi m-bâ ne mbé ba-ba-nwa ne Júda ne banet emen ne kángkáng eshê nyí nyi fáráng ne mǔ. N/chi m-bên oshê mún ne eshê nyí e/fárâng kámú, n-shí kányí e-bên ne banyá, e-firi kyikit ńkyí kii*nwa to eri*. Me Óburúkpâbí nké n/raa.

¹⁰ N/chi n-chi awonge ebe nyí bunyîn-dyityém ne ojêe ne kyicoge ńkyí bunyîn-dyityém-ajî-dyibé ebe byi-man. Baa*já to bakút ḿbé badafé ké etyuryíkáng ebe* ne byiryíng bii*chi to*.

¹¹ Esí ńnyín e/chi e-shí kángkáng, ne banet ḿbé ba/chi ba-ri kányí kyi/chi kyi-chi kámbé wǎ chwǒm-akat, ne eshê nyí nyi wângwâng e/chi e-kyú ké bubwô ḿbú Bábyílon ké bajam-aje bachât esim diǐkpú.

¹² Â nkéré mú ńkyín kii/shwôm, n/chi n-kye Bábyílon ne otu emen busông ké bubwô ḿbú byibî ebe. N/chi m-bên oshê ámu, n-shí kámú o-waa ne banyá.

¹³ N/chi n-kye Bábyílon busông ké kángkáng byěm-busông ḿbyí n/sét Jeryimáya n/fu, n/chi n-kye eshê kángkáng byěm-busông ḿbyí ba/sáng ké nwet mún.

¹⁴ N/chi n-só banet ḿbé Bábyílon ewa ké ńkyí baa/chi, ne eshê chwóó ne biǐtí-batu ba/chi ba-kúng kámbé ba-firi básóng.

Osówo o/két Mpan o-bên Ejíí

¹⁵ Osówo Óburúkpâbí mú Ézerel o/sét mě o/fu, nyín mmîk-bato mú oo/sú ne busa-dyityém ejí. Kúng kámú a-ca ké kángkáng eshê nyí n/chi n-twóm ǒ ké nyǐ, ba-jwáp kámbé.

¹⁶ Â ba/jwáp kámbé, ba/chi ba-cíng ba-kpet efún ké bubwô-byití ḿbyí n/chi n-twóm kámbé ké burwám.

¹⁷ Ne n-koo mmîk ámu ké abwô nyí Óburúkpâbí n-kye kángkáng eshê nyí Óburúkpâbí o/twóm mě ké nyǐ, n-kye kányí e-jwáp.

¹⁸ Jerúsélem ne kángkáng eshê nyí Júda cibicibi ne batu ebe ne banet-ashí ebe ba/jwáp kámbé, eringe nyí mbé badabírî kyikim-dyikán ńkyí kii*nwa to eri* ne eringe nyí banet badakúng dyizîn ebe wǎ kyishû, wǎ eringe nyí ba/tôong ba-chi i.

^19-26 Nyín azîn nyí kángkáng banet bakíri ḿbé ba/chi ba-jwáp ké mmîk ámu, otu mú Éjip ne banet-ashí-bǎmkpóngé emen ne banet-ashí emen, kángkáng banet ḿbé Éjip ne bacinbánet ḿbé mbe ba-kyú u ké Éjip, kángkáng batu ḿbé ké esí nyí Ôz, kángkáng batu ḿbé eshê nyí Fyilíta nyí Áshíkelon ne Gáza ne Ékoron ne kyikim-oshê ńkyí Áshídot ńkyí kyi/waa, kángkáng banet ḿbé Édom ne Mówep ne Ámon, kángkáng batu ḿbé Táya ne Sádon, kángkáng batu ḿbé ké esí nyí Medeterényan, eshê nyí Dyídan ne Téma ne Bûz, kángkáng banet ḿbé mbe ba-két ng eji ebe, kángkáng batu ḿbé Arébya, kángkáng batu ḿbé eshê nyí kyikim-dyikán, kángkáng batu ḿbé Zímiryi ne Élam ne Médya, kángkáng batu ḿbé ké kyicê ńkyí bushûyû ḿbé mbe fáráng ne ḿbé tíbítíbí, ké onet ké onet. Oshê nang orá mú mu ké ejíí o-jwáp ng ké mmîk ámu. Ké nkuli kyikû, otu mú Bábyílon o/chi o-jwáp ké mǔ.

²⁷ Ne Óburúkpâbí o-raa ne me o/fu, sét banet ámbe a/fu, me Osówo Óburúkpâbí mú Ézerel mú o/rêe o-shwôm mu n-kyâ kámbé busa n/fu, bajwáp tete ba-kpet ebwóm ba-fám, tete ba-myii kyísí baa*man to ebûu* ké bubwô-byití ḿbyí mu n-twóm m byi-kâm kámbé.

²⁸ Ne â mbé ba/né ekoo mmîk ámu ké abwô eyên ba-jwáp ké mǔ, sét kámbé a/fu, Óburúkpâbí mú o/rêe o-shwôm o/sét o/fu, ben ba-man ba-jwáp ké mǔ.

²⁹ M-kpet ng bǎmkpóngé ejí ḿbé byikit ebên ké ochíchí-oshê mú ejí. Mbé ba/kabe ba/fu, me nn*kye kámbé busông*? Aa*wááng* m-man n-kye kámbé busông, ké nǎ, n/chi n-twóm byití byi-kâm kángkáng banet ḿbé ké ejíí. Me Óburúkpâbí mú o/rêe o-shwôm nké n/raa.

³⁰ Wo a-man a-sét kángkáng byiraa ḿbyí n/sét ǒ, ǎ Jeryimáya. A-man a-sét banet ḿbén a/fu, Óburúkpâbí o/chi o-nyán kyíbóng, o-twóm etare e-fím kyíbóng e-bâ. O/chi o-nyán banet emen. O/chi o-wonge wǎ onet mú mu o-pyat ng byirim-byichí ké byiká. Nang yeě ké ejíí o/chi o-jwo ǎ,

³¹ ne ejá emen e/chi e-ribi ké byikit-ejíí byimúmú. Óburúkpâbí mu ne mpan ne eshê nyí ké ejíí. O/chi o-pan kángkáng banet mpan, o-ju bambên atyém. Óburúkpâbí nké o/raa.

³² Óburúkpâbí mú o/rêe o-shwôm o/raa o/fu, busông mbu bu-bâ bu-kâm eshê emúmú, ne kyibî-bufú nkyi kyi-kpá ng byiko ké bakô-ejíí ḿbé tíbítíbí.

³³ Ké dyicí ándyi, byikwóm-banet ḿbyí banet ḿbé Óburúkpâbí o/ju byi/chi byi-firi byiryibyiryi ké ejíí emúmú. Onet o*fí mú o/chi o-tii kámbé* ne onet o*fí mú o/chi o-yip kámbé o-ryii*. Ba/chi ba-waa kyísí wǎ abîng.

³⁴ Tii n̂g, ben banet-ashí. Ben bambâm banet ejí, tii n̂g kakânkakân. Tii n̂g ba-bínê kyísí. Nkéré oo/fyi mú bada běn eju, ne ba/chi ba-fee běn wǎ ebû.

³⁵ Bukwóp bu*fí ḿbú ben badafem*.

^36-37 Ben ba-tii ng ba-ta dyikán ké bafip, ké nǎ, ké busa-dyityém emen, Óburúkpâbí oo/bên oshê enen, o-shí oshê enen mú o/mû bunyîn-dyityém. [

³⁸ Óburúkpâbí oo/mîng banet emen] wǎ ekpang nyí edadim e-mîng bucim emen. Busông ḿbú byití ne busa-dyityém ḿbú Óburúkpâbí bii/bírî oshê o-firi kyikim-dyikán.