Jeryimáya 24 - Bokyi Bible

Bookye-Byirim-Byichí Bufee

¹ Óburúkpâbí o/tông mě bookye bufee ḿbú ba/fé byirim-byichí ké kafâ, ba-bi ké ocím-dyifyi mú kiǐtí-kyise-kyifen-Osówo echi. Ńkyín kyi/chi ké nkéré mú Otu Nébúkanéza mú Bábyílon o/mû oo/kám Otu Jehóyákin mú Júda mú wǎn-Otu Jehóyákim wǎ onet-mgbokobá ké Jerúsélem, o-dim ne nyǐ Bábyílon, cibicibi ne banet-ashí ḿbé Júda ne bantim byěm ne banet ḿbé baa/kwâa bǎmkpóngé ba-kpí.

² Kaakye kabónge ka/mû ne byirim-byichí ḿbyí byinong, ḿbyí byidabwóp kashú byi-bwam. Ńké kabónge ka/mû ne byirim-byichí ḿbyí bii*nwa*. Byi/bên byi-shwôm ḿbyí badaryí.

³ Ne Óburúkpâbí o-bí mě kâng o/fu, Jeryimáya, wo a/ri ebóng. Me n-faa n/fu, byirim-byichí. Ḿbyí byinong mbyi byi-nwa ng kanong kanong, ne ḿbyí bii*nwa* byi/bên byi-shwôm ḿbyí bii*nwa eryí*.

⁴ Ne Óburúkpâbí o-raa kâng ne me o/fu,

⁵ me Osówo Óburúkpâbí mú Ézerel, n/kúng banet ḿbé ba/kám kámbé ba-dim ne mbé Bábyílon wǎ byirim-byichí ḿbyín ḿbyí byinong, ne n/chi n-tî kámbé kanong.

⁶ N/chi m-bám kámbé, m-bwa ne mbé esim ké esí ńnyín. N/chi n-nap kámbé onábáng, mm*bên kámbé obén*. N/chi n-kwón kámbé okwón, mm*bú kámbé obúng*.

⁷ N/chi n-kye kámbé dyityém ńdyí badanyît ba/fu, me n-chi i Óburúkpâbí. Ne mbé ba/chi ba-kyú banet ejí, me to n-kyú Osówo ebe, ké nǎ, mbé ba/chi ba-bwa esim ba-kâm mě ne atyém ebe kángkáng.

⁸ Kyi-kim ne Otu Zedekyâ mú Júda ne banet-ashí-oshê emen, kyi-kim to ne oshê ne kángkáng banet ḿbé Jerúsélem ḿbé baa/waa ké esí ńnyín nang ḿbé ba/dim ba-jâ Éjip, me Óburúkpâbí n/chi n-tî kámbé wǎ byirim-byichí ḿbyín ḿbyí byi/bên byi-shwôm, ḿbyí bii*nwa eryí*.

⁹ N/chi n-kye kámbé busông ḿbú ejíí emúmú edakûshî. Banet ba/chi ba-jwó kámbé, ba-fát kámbé kiikuku, ba-kye kámbé edángé, ba-kúng dyizîn ebe wǎ kyishû nang nyá nang nyá mú n/chi m-pwó kámbé byiryibyiryi.

¹⁰ N/chi m-bâ kámbé ne byití ne esong ne orwôm ké byiko tete onet nang obónge oo*waa to ké esí nyí n/kye kámbé ne banchí ebe ḿbé kpákpá*.