Jeryimáya 21 - Bokyi Bible

Jeryimáya o/sét kyi-kim ne Dyikpóge ńdyí ba/chi ba-kpógê Jerúsélem

¹ Otu Zedekyâ mú Júda o/twóm Páshu mú wǎn-Makyâ ne Zefanyâ mú wǎn-Masáya mú o/mû nchi kyifen-Osówo ba-kâm mě ne kyitwóm ńkyín o/fu,

² kamgbe, pem ne Óburúkpâbí ké bubwô eten, ké nǎ, Otu Nébúkanéza mú Bábyílon ne basúja emen mbe ba-bâ oshê ekoo. Katô Óburúkpâbí o-man n echi akat emen abónge, o-chi Otu Nébúkanéza o-bwa esim.

³ Óburúkpâbí o/pem o-sét mě, ne n-sét banet ḿbé ba/twóm oshê ejí n/fu,

⁴ basét Otu Zedekyâ ba/fu, Osówo Óburúkpâbí mú Ézerel o/raa o/fu, Otu Zedekyâ, me n/chi m-kpógê basúja eyên ḿbé mbe ba-nwa ng ne otu mú Bábyílon ne basúja emen. N/chi n-wuri byiyám-byití ḿbyí basúja eyên n-zû ké otyém-oshê.

⁵ N/chi n-nwa ne wo ne busa ejí ne busa-dyityém ejí ne kafâ esa ejí kángkáng.

⁶ N/chi n-ju nang yeě nang yeě mú mu ké oshê mún. Banet cibicibi ne byitú ba/chi ba-kpú kyibî-orwôm.

⁷ Nké kyi-kim ne wo ne banet-ashí-bǎmkpóngé eyên ne banet ḿbé ba/chi ba-fem byití, ne esong ne orwôm ámu, n/chi m-mîng Otu Nébúkanéza ne banet-bushwôn enen ba-kám běn ashí amúmú, ḿbé mbe ba-ryuu ng ba/fu, mbé ba-ju ng běn. Otu Nébúkanéza o/chi o-ju běn. Oo*ba/chi o-mîng onet nang obónge* o-ri nang onet obónge ké burwám enen bafip*. Me Óburúkpâbí nké n/raa.

⁸ Óburúkpâbí kâng o-sét mě o/fu, me nsét banet ḿbén n/fu, fwôo n̂g atông ba-jwo. Me Óburúkpâbí mu n-tông ng běn akwóp afee n/fu, fîm m̂ bubónge, bukwóp ḿbú badacen ba-ribi ké dyikpen ne ḿbú badacen ba-ribi ké bukyû.

⁹ Nang yeě nké o/waa ké oshê-byití, esong ne orwôm byi/chi byi-ju ǎ. Nké nang yeě nké o/byí, o-yip byiko emen o-kye banet ḿbé Bábyílon, ḿbé mbe ba-kyâ oshê bunwa kántîk, baa*ba/chi ba-ju ǎ*. O/chi o-man ewaa ne dyikpen emen.

¹⁰ Okabe ejí o/fu, oshê mún o*dachîkyú* n/fu, m-bên n kámú. N/chi n-yip kámú n-kye otu mú Bábyílon, ne o/chi o-shí kámú o-bírî atông. Me Óburúkpâbí nké n/raa.

Mpan ekét ké Kyikû-Butu ńkyí ké Júda

^11-12 Óburúkpâbí o/sét mě o/fu, me nsét kyikû-butu ńkyí ké Júda kyitwóm ńkyín, kyikû-butu ńkyí kyikû-banet ńkyí Otu Dívit o/fu, fwôo n̂g atông ba-jwo ńkyí me Óburúkpâbí mu n-sét ng. Kû n̂g esét ntûntû kángkáng dyicí ké esuk. *Da n̂g ebángê onet mú mu o-cít ng onet o-chîcít onet ámu*. Â ba*da/ku dyizong-onet ándyi* kyibî ńkyí bamu ba-chi i kyi/chi kyi-chi busa-dyityém ejí bu-kûmang wǎ okwâ mú oo*nwa erîp*. [

¹³ Wo Jerúsélem a/kyú] kyíbóng kyíbóng a-mîng ewo kyísí wǎ buká ḿbú bu/nyâam bu-ribi kyíbóng. Nké n/chi n-nwa ne wo. Wo amu a-raa ng a/fu, onet o*fí mú oda ǒ eman ekye bunwa* o-kpógê nang basúja eyên*.

¹⁴ Nké me n/chi n-kye ǒ busông ké ńkyí wo a/chi. N/chi n-fé okwâ ké kyibám-butu eyên, ne okwâ ámu o/chi o-shí kángkáng byěm ḿbyí byi/fárâng kánkyí. Me Óburúkpâbí nké n/raa.