Jeryimáya 20 - Bokyi Bible

Jeryimáya o/shwôn ne Nchi Kyifen-Osówo mú odabángê Páshu

¹ Ké nkéré nchi kyifen-Osówo mú odabángê Páshu, mú wǎn-Éma, mú o/mû onet-dyishí-bǎmkpóngé ké kiǐtí-kyise-kyifen-Osówo echi o/jwo nkéré mú me n/sét byiraa ḿbyín,

² o/kye busa o/fu, bamín mě, ba-fé mě bamgbokobá fáráng ne dyifyi dyibónge ńdyí ndyi ké kiǐtí-kyise-kyifen-Osówo echi, ńdyí badakó dyifyi ńdyí Běnjámin.

³ Ké orî-dyicófóróng, ké nkéré Páshu o/zú mě abwô ké bamgbokobá ḿbé ba/fé mě, me n-sét ǎ n/fu, Óburúkpâbí o*da ǒ efé dyizîn ńdyí mbe ba-kó ng ǒ Páshu*. Dyizîn ńdyí nyǐ oo/fé ǒ dyi-bángê e Bushî ké Kángkáng Byikit.

⁴ Óburúkpâbí oyén oo/sét o/fu, me n/chi n-chi ǒ a-firi onet mú o/chi o-chi bushî ne byiko emen, o-chi bushî ne bacín emen, ne wo a/chi a-ri ké banet-bushwôn ebe ba/chi ba-yip bushwám ba-ju kámbé. N/chi n-chi kángkáng banet ḿbé Júda ba-firi ké abwô nyí otu mú Bábyílon. Otu ámu o/chi o-kúng kyicê-banet o-dim ne mbé wǎ básóng, o-ju bakíri.

⁵ Me n/chi m-mîng to banet-bushwôn ebe ba-bên kángkáng esang nyí nyi ké oshê mún, ba-koo kángkáng byěm ḿbyí mbyi ké mǔ, cibicibi ne esang nyí batu ḿbé Júda, ba-tû kángkáng byěm ba-jâ ne mbyí Bábyílon.

⁶ Kyi-kim ne wo, ǎ Páshu, ba/chi ba-kám ǒ ne kángkáng kyikû-banet eyên ba-jâ ne ben Bábyílon. Áku nké a/chi a-kpú ba-ryii ǒ, cibicibi ne kángkáng bacín eyên ḿbé a/sét kámbé byisédéng chwóó.

Jeryimáya o/tii o-kó Óburúkpâbí

⁷ Óburúkpâbí, wo aa/nîm mě ne aa/chi ba-nîm mě. Wo a-shwane e a-shwôm mě ne aa/kpógê mě. Nang yeě nang yeě o-kú o-jwó ng mě. Banet ba-kú ba-fát ng mě kiikuku kángkáng dyicí.

⁸ Nang nkéré orá nké n/raa, n-tii ng, n-wonge e n/fu, bunwa ne busông. Óburúkpâbí, banet mbe ba-fát ng mě kiikuku, ba-shú u mě kángkáng nkéré, ké nǎ, me mu n-sét ng kyitwóm eyên.

⁹ Nké â n/fu, n/chi n-ráp Óburúkpâbí, nn*raa to ké dyizîn emen* kyitwóm eyên kâng kyi-firi wǎ okwâ nké mu o-mang ng mě ké kafâ. N/kan n/fu, n-níbî ng kánkyí ké kafâ ejí, nké mm*man echîníbî kánkyí*.

¹⁰ Me mu n-jwo ng ké nang yeě nang yeě mu o-raa ng ké booju o/fu, bushî bu/firi ké kángkáng byikit. Bâ n̂g byi-da-sét banet-ashí kyi-kim ne nyǐ. Nang bacín-dyityém ejí mbe ba-bám m ba/fu, me nróng. Mbe ba-raa ng ba/fu, katô byi-man n ǎ enîm, byi-kám ǎ, byi-só ǎ ewa.

¹¹ Nké wo, ǎ Óburúkpâbí, mú a/rêe ne amu ne busa, amu ké kyicê ńkyí ejí, ne banet ḿbé mbe ba-kyâ mě busông baa*ba/chi ba-ri bukwóp*. Ba/chi ba-wuri kámbé éshwân nyí ee*man* ké nǎ, kii*ba/chi kyi-byí kámbé dyishí*. Banet baa*tigi ba-ráp éshwân ebe*.

¹² Nké wo, ǎ Óburúkpâbí mú a/rêe a-shwôm, amu a-fwôo ng banet ké bukwóp ḿbú bunong. Wo amu a-nyît ng ńkyí nkyi ké atyém ebe. Ké bubwô ḿbún, chi mě n-só banet-bushwôn ejí ewa, ké nǎ, me nn/kúng mpan ejí n-fé ǒ ké abwô.

¹³ Kwán n̂ ekwan ba-kye Óburúkpâbí. Kye n̂g Óburúkpâbí akpee. Nyǐ mu o-nyii ng banet ḿbé mbe ba-cít ng kámbé ké abwô nyí busa ḿbú byibî-banet.

¹⁴ Shú dyicí ńdyí ba/fwon mě. Ráp dyicí ńdyí boné ejí o/fwon mě.

¹⁵ Shú onet mú o/chi bonchí ejí o-firi ké bunyîn-dyityém, mú o/ba ǎ esét o/fu, baa/fwon ǒ wǎn-onyinchéng, wo a/firi ne wǎn-onyinchéng.

¹⁶ Kyi/bát onyinchéng ámu ofiri wǎ eshê ányi nyí Óburúkpâbí o/bên, bafip ba*da ǎ echi*. Kyi/bát ojwo ejá-bukyû-busông ké dyicófóróng, o-jwo dyiwonge ńdyí byití ne esû,

¹⁷ ké nǎ, nyǐ o*da mě eju ne ba-kû mě efwon*. Dyifít ńdyí boné ejí kâng dyi/mû dyi/chi dyi-kyú dyikun ejí.

¹⁸ Ebóng ba/fwon mě. Ba/fwon mě ba/fu, me nri afaníkong ne bafip m-man dyikpen ejí ké éshwân?