Jeryimáya 19 - Bokyi Bible

Otyu mú o/sêe

¹ Óburúkpâbí o/sét mě o/fu, me nca n-da-ré otyu. O/sét mě to o/fu, me mkpî kyicê-bakínkán-oshê ne kyicê-banchi kyifen-Osówo ḿbé baa/kán,

² me n-cen ne mbé byi-shwôm ké dyifyi ńdyí Póshet, n-ca ne mbé ké owo mú Hyínom. Ké kyikit ánkyi nké me n/chi n-sét banet kyitwóm ńkyí nyǐ o/chi o-sét mě.

³ Óburúkpâbí o/sét mě o/fu, me nsét něen n/fu, batu ḿbé Júda ne banet ḿbé Jerúsélem, fwôo n̂g atông ba-jwo ńkyí me Osówo Óburúkpâbí mú Ézerel mú o/rêe o-shwôm, mu m-bâ ebasét. Me n/chi m-bâ ne busông ké kyikit ńkyín ḿbú nang yeě nké o/jwo kyi-kim ne mbú o/chi o-waa ocím ké dyishí fúú.

⁴ Me mu m-bâ ebachi ńkyín, ké nǎ, banet ḿbé Ézerel baa/mîng mě, ba-bên kyikit ńkyín ké byifen ḿbyí mbe ba-chi i nyín ba-kyâ esówo ekíri. Esówo nyí nang banchí ebe ḿbé kpákpá, nang batu ḿbé Júda ba*fí ba-nyît ng chwǒm kyi-kim ne nyǐ*. Baa/chi kyikit ńkyín kyi-sú ne baróng ḿbé banet ḿbé ba*da/chi chwǒm*

⁵ ne baa/bi byikit-kyifen echi ba-kye Bâl eringe nyí badakûfwá bwǎn ebe ké okwâ ba-chi byifen. Me n*da/kye kámbé busa n/fu, bachi ńkyín*. Nang okabe ókabe n*da/kabe kyi-kim ne nkyí*.

⁶ Ké bubwô ḿbún kâng, nkéré mu o-bâ mú baa*ba/chi ba-chîkó kyikit ńkyín Tófet* nang owo mú Hyínom*. Ba/chi ba-kûkó kánkyí owo mú banet eju.

⁷ Ké kyikit ńkyín, me n/chi m-bên kángkáng ekabe nyí banet ḿbé Júda ne Jerúsélem. N/chi n-chi banet-bushwôn ebe ba-kpógê kámbé, ba-ju kámbé ké byití. N/chi n-kúng byikwóm-enyam-byiko ebe n-kye bunurung ne enyam byi-ryí.

⁸ N/chi m-bên oshê mún ké bukwóp ḿbú nang yeě nké o/shwôm ké mǔ byiko byi/chi byi-kaa ǎ, o-waa ocím ké dyishí fúú.

⁹ Banet-bushwôn ba/chi ba-wáp oshê ba-fé ké otyém, ba-kan ba/fu, mbé ba-ju ng banet ḿbé mbe ké mǔ. Bunwa bu/chi bu-jê kanong kanong ḿbú banet ḿbé mbe ké kafâ-oshê ba/chi ba-ryí barî, cibicibi ne bwǎn ebe.

¹⁰ Ne Óburúkpâbí kâng o-sét mě o/fu, me nsé otyu ámu ké bushú-banet ḿbé ba/ce ne me ké kyikû,

¹¹ n-sét kámbé n/fu, Óburúkpâbí mú o/rêe o-shwôm o/raa něen o/fu, n/chi m-bên banet ḿbén ne oshê mún, ne obên ámu o/chi o-kyú wǎ otyu mún mú o/sêe, mú oo*nwa to ebwât*. Banet ba/chi ba-ryii banet ebe nang ké Tófet, ké nǎ, kyikit kyi*fí to ńkyí badaryii kámbé*.

¹² Me n/ryí ocím n/fu, n/chi n-chi oshê mún ne banet emen ba-firi wǎ Tófet.

¹³ Byise ḿbyí Jerúsélem ne byise ḿbyí batu ḿbé Júda ne kángkáng byise ḿbyí baa/shí burwan ké mbyí ba-kye ékpére ne ḿbyí baa/pwó byikû-bato ké mbyí ba-kye erím-bakye ekíri byi/chi byi-firi byibî-byikit wǎ Tófet.

¹⁴ Ne n-dim kâng m-mîng Tófet ké kyikit ńkyí Óburúkpâbí o/mû o/sét mě o/fu, me nsét kyitwóm emen. Me n/dim n-da-bwom ké kafâ-kiǐtí-kyise-kyifen-Osówo echi ne n-sét kángkáng banet

¹⁵ n/fu, Osówo Óburúkpâbí mú Ézerel mú o/rêe o-shwôm o/raa o/fu, me n-kú m-bâ ebê ne kángkáng busông ḿbú me n/ryí ocím ké oshê mún ne ké kángkáng eshê nyí e/fárâng kámú, ké nǎ, ben bamu ba-shwane e ashí, ne ba*fí ba-fwôo ng atông ba-jwo ńkyí me mu n-sét ng*.