Jeryimáya 18 - Bokyi Bible

Jeryimáya o/ce ké Kyise ńkyí Nchi Butí

¹ Óburúkpâbí o-raa ne me o/fu,

² ca ké kyise ńkyí nchi butí, áku nké n/chi n-sét ǒ kyitwom ejí.

³ Ne me n-dim kâng ké kyise ńkyí onet mú mu o-chi i butí, ne n-ri nchi butí ámu ké oo/kyú ké bǎmkpóngé emen.

⁴ Â nchi butí ámu o/nyît o/fu, katí ńké nyǐ o/chi ka*fí ka-nwa ng* o-bên n katí ánke, o-kúng ecing ányi o-chi chwǒm kyikíri.

⁵ Ne Óburúkpâbí o-raa kâng ne me o/fu,

⁶ me n*fí ne busa ḿbú ndachi ńkyí kyi/nyîn mě ne banet ḿbé Ézerel wǎ eringe nyí nchi butí mún mu o-chi i ne ecing nyí mu o-kúng ng o-chi i butí dí. Banet-Ézerel mbe ké bubwô ejí wǎ eringe nyí ecing nyi ké abwô nyí nchi butí.

⁷ Nang nkéré orá nké n/raa n/fu, n-kú m-bâ ezú nang m-bú nang m-bên oshê nang butu nang burá,

⁸ nké â oshê ámu kâng o/mîng byibî-akwóp emen, mm*ba/chi n-chîchi ńkyí m/mû n/fu, n-chi i*.

⁹ Nké â n/fu to n/fu, n/chi m-bi oshê nang butu nang burá,

¹⁰ nké â oshê ámu o/né ńkyí n/sét kámú, o-chi ńkyí kii*nwa* mm*ba/chi n-chîchi ńkyí m/mû n/kabe n/fu, n-chi i*.

¹¹ Kántîk kâng, sét banet ḿbé Júda ne Jerúsélem a/fu, me mu n-kabe ng kyibî kyi-kim ne mbé, ne mu m-kpá ng byiko ḿbyí n/chi n-kye kámbé busông. Sét kámbé ba-mîng byibî-akpen ekyú, ba-yángê akwóp ebe ne byěm ḿbyí mbe ba-chi i.

¹² Nké mbé ba/chi ba-faa ǒ ba/fu, aa*wááng* bukwóp bu*fí*. Be byi-chi i okabe mú eten, nang yeě nang yeě o-chi i nang ebóng kyibî ńkyí kyi/nyîn ǎ.

Banet-Ézerel ba/né Óburúkpâbí

¹³ Óburúkpâbí o/raa o/fu, bí oshê nang orá â dyizong-chwǒm ándyi dyi/mû dii/chi nang kabónge. Banet ḿbé Ézerel baa/chi chwǒm ńkyí kii*nwa esét*.

¹⁴ Ashí-eku nyí ké Lebánon nyi a-kaa ng abíp dí. Buce ḿbú mbu ké eku ányi mbu bu-núng ng dí.

¹⁵ Nké banet ejí baa/ráp mě. Mbe ba-shí i burwan ba-kyâ erím-bakye. Baa/tánê ké bukwóp ḿbú ba/mû ba/chi ba-ca. Ba*fí to ba-chi i byěm ḿbyí kpákpá*. Ba-kú ba-cen n ké byikit ḿbyí biǐfáng byi*fí*.

¹⁶ Baa/chi esí ńnyín e/firi chwǒm ńkyí kii*nwa achi etún* ńkyí banet badané kánkyí ne banyá. Byiko byi/chi byi-kaa kángkáng banet ḿbé ba/chi ba-shwôm ké nyǐ ké byěm ḿbyí ba/chi ba-ri. Ba/chi ba-kûninge ashí áshi.

¹⁷ N/chi n-chi banet ejí ba-pwôo byiryibyiryi ké bushú-banet-bushwôn ebe wǎ édúkǎndú nyí bufú budatugi kányí. N/chi m-bírî kámbé esim. Mm*ba/chi n-chwáp kámbé* ké nkéré afaníkong aa/bê*.

Banet-Ézerel ba/nam Jeryimáya Dyiju

¹⁸ Banet-Ézerel ba-raa ba/fu, bâ n̂g byi-chi Jeryimáya mún chwǒm. Be byi-já ng banchi kyifen-Osówo ḿbé bada bě etángê, ne banet-bubong ḿbé bada bě ekye bacê, ne bamkpábé ḿbé bada bě ekûsét byiraa-Osówo. Bâ n̂g byi-bât ǎ byiraa, byi-mîng ejwo ńkyí mu o-sét ng.

¹⁹ Ne Jeryimáya o-fé kâng nshwam o/fu, Óburúkpâbí, jwo ńkyí mu n-sét ng ǒ, a-fwôo atông a-jwo ńkyí banet-bushwôn ejí mbe ba-raa ng kyi-kim ne me.

²⁰ Ba-yip ng kyibî ba-ré kanong dyifwá dí. Nké mbé baa/sím dyibíng ba/fu, me nróng ké ndyí. Zîim eringe nyí me m/bê n-kâm ǒ, n-tîm ǒ arông ké bubwô ebe, eringe nyí aa*chi kámbé chwǒm ké busa-dyityém*.

²¹ Nké kántîk, ǎ Óburúkpâbí, mîng bwǎn ebe ba-kpú esong. Mîng ba-ju kámbé ké byití. Batyép ne bwǎn bakpú kámbé. Banyinchéng bakpú byirwóm, ba-ju byisat ké byití.

²² Twóm dyizu-banet-busa-dyityém ba-byí kámbé kiǐmút, ba-bên byise ebe. Chi kámbé ba-tii ké bushî. Mbé baa/sím dyibíng ba-tî ba/fu, me nróng, ba-kuu boǒtám ba/fu, bukám mě.

²³ Nké, ǎ Óburúkpâbí, wo amu a-nyît ng kángkáng ocibi ebe mú ba/fu, mbé ba-ju ng mě. *Dachi a-pwoo kámbé ké byibî ebe*. Yip busa-dyityém a-kpógê kámbé, a-fé kámbé kiinfwa ké dyichi.