Jeryimáya 17 - Bokyi Bible

Kyibî ne Busông ḿbú Banet ḿbé Júda

¹ Óburúkpâbí o/raa ne banet ḿbé Júda o/fu, ba/yip kachí-nwet ńké kiǐré ne ba-sáng kyibî enen kyísí. Ba/yip kachí-nwet ńké kaa*shî* ba-sáng běn kánkyí ké atyém enen, ba-sáng to kánkyí ké bakô-byikit enen ḿbyí bamu ba-chi i byifen.

² Banet enen mbe ba-fâ osówo-onyinyi mú badakó Ashéra ké byikit-byifen emen echi, ké kángkáng byichí ḿbyí byi/tôong byikpó, ne kyíbóng-eku,

³ ne ké eku nyí nyáám ké byikit ḿbyí mbyi wááng. Me n/chi n-chi banet-bushwôn enen ba-wuri esang enen ne byěm enen ḿbyí byinong [ké bubwô ḿbú kángkáng byibî ḿbyí baa/chi] ké esí enen kángkáng.

⁴ Ben ba/chi ba-dim ba-mîng esí nyí n/kye běn, ne n/chi n-chi běn ba-firi ké bubwô ḿbú banet-bushwôn enen ké esí nyí ben baa*nyît* ké nǎ, busa-dyityém ejí mbu wǎ okwâ, ne bu/chi bu-mang ne banyá.

Byiraa Byikíri ḿbyí Óburúkpâbí o/raa

⁵ Óburúkpâbí o/raa o/fu, n/chi n-shú onet mú o/bírî mě esim o-yip dyityém emen o-fé ne onet, mú o/fé dyityém ké busa ḿbú onet mú o/chi o-kpú.

⁶ Onet ámu mu wǎ kyichí ńkyí nkyi ké kyikim-dyikán, ńkyí nkyi kyi-kán n ké kyikim-dyikán ńkyí omu o*fí* ńkyí nkyi kyi-kán n ké kyikit ńkyí esí ee*nwa* nyí chwǒm kyikíri kyi*fí ké nyǐ*. Onet ámu oo*ba/chi o-já chwǒm ńkyí kyinong*.

⁷ Nké me n/chi n-jware onet mú o/fé dyityém ne me.

⁸ Onet ámu mu wǎ kyichí ńkyí nkyi kyi-kán n ké bukô-kace, ńkyí eriri emen nyi e-ribi ng ké omu. Kyichí ánkyi kii*shî* â burwom bu/cé* ké nǎ, eshǎan emen e-waa ng degedege. Nang omu o*fí o-na ng* kii*kérê*. Kyi-zím m byirim kángkáng nkéré.

⁹ Yeě odaman enyît dyityém ńdyí onet. Chwǒm kyi*fí ńkyí kyidanîm onet wǎ ndyí*. Ndyi dyi-rwôm m kyirwóm ńkyí kyi*fí ne bukye*.

¹⁰ Me Óburúkpâbí n-kyé ng kafâ-onet, n-kan atyém nyí banet. Mu n-tî ng nang yeě nang yeě wǎ eringe nyí mu o-kyú u dyikpen emen, wǎ eringe nyí nyǐ mu o-chi i byěm.

¹¹ Onet mú mu o-já ng akpuga ké bukwóp ḿbú boo*nwa* mu wǎ kanurung ńké kadacép ácě nyí ka*da/mîng*. Esang emen e-tánê e ǎ ne bubwásíng, ne ké nkuli kyikû, o-firi enyam-onet.

¹² Kiǐtí-kyise-kyifen-Osówo echi eten nkyi wǎ kiǐtí-kakyúng-butu ńkyí nkyi kyíbóng-kaku ńké nyáám kyi-fím ké kiimkpet kyikû.

¹³ Óburúkpâbí, wo nké Ézerel mbe ba-tî ng achi. Kángkáng banet ḿbé ba/mîng ǒ ba/chi ba-koo éshwân. Ba/chi ba-rím wǎ azîn nyí badasáng ké édúkǎndú, ké nǎ, mbé baa/mîng ǒ wo mú amu Óburúkpâbí, mú amu kace ńké kadakye dyikpen.

Jeryimáya o/bí Óburúkpâbí Ochwâp

¹⁴ Óburúkpâbí, chi kyirwóm ejí kyi-man, ne me n/chi n-nyange kanong kanong. Nyii mě a-koo, ne kyibî-chwǒm kii*ta mě to*. Wo nké me nda ǒ ekye akpee.

¹⁵ Banet mbe ba-bí ng mě ba/fu, byěm ḿbyí Óburúkpâbí o/pám o/fu, nyǐ o-chi i bě, mbyi nyá. Ochi bě kámbyí kántîk.

¹⁶ Nké me n*da ǒ etírîng n/fu, [kye kámbé busông*] ǎ Óburúkpâbí*. N*da/ryuu n/fu, kyibî-nkéré kyikâm kámbé*. Óburúkpâbí, wo amu a-nyît ng ńkyín. Wo amu a-nyît ng ńkyí me nn/raa.

¹⁷ *Da mě echi n-kû ǒ eshî*. Wo amu kyikit-dyirem ejí, â afaníkong a/bê.

¹⁸ Wuri banet ḿbé mbe ba-kyâ mě busông éshwân, nké *da mě ewuri me* ǎ Óburúkpâbí*. Fé kámbé bushî, nké *da mě efé bushî*. Kye kámbé busông, a-ját kámbé boǒcê boǒcê.

Eringe nyí badatî Dyicí-Ékwâbashi

¹⁹ Óburúkpâbí o/raa ne me o/fu, Jeryimáya, ca ké dyifyi-oshê ńdyí badakó Dyifyi-Banet, ńdyí batu ḿbé Júda mbe ba-cen n ké ndyí ba-nung ng ké oshê ba-byí i, a-da-sét kyitwóm ejí. Ca to ké afyi nyí áku to amúmú nyí nyi ké Jerúsélem.

²⁰ Sét batu ne kángkáng banet ḿbé Júda ne nang yeě nang yeě mú mu o-kyú u ké Jerúsélem ne mú mu o-cen n ké afyi ńnyín a/fu, ofwôo atông o-jwo ńkyí mu n-sét ng.

²¹ Sét kámbé a/fu, â akpen ebe nyi a-jê ng kámbé, ba*dachi ba-tû dyitû ké dyicí-ékwâbashi*. Ba*dachi ba-tû chwǒm ba-shwôm ne nkyí ké afyi nyí Jerúsélem*.

²² Nang chwǒm ké byise ebe ba*dachi ba-yip ba-byí ne nkyí kyíjí ké dyicí-ékwâbashi*. Ba*dachi ba-chi bǎmkpóngé ké dyicí-ékwâbashi*. Ba-man ba-tî kándyí wǎ dyicí ńdyí dyi/já mě, wǎ eringe nyí n/sét banchí ebe ḿbé kpákpá.

²³ Banchí ebe ḿbé kpákpá ba*da/fwôo atông ba-jwo ńkyí n/sét kámbé*. Nké mbé ba/bwa ba-kpet eshwane ashí. Mbé ba*da/kwâa byěm ne me* ba-chi nang ńkyí n/sét kámbé*.

²⁴ Sét kámbé a/fu, ba-man ba-tî kángkáng byije ḿbyí n/fé kámbé. Baa*man ba-tû dyitû nang dyibónge ba-shwôm ne ndyí ké afyi nyí oshê mún* ké dyicí-ékwâbashi*. Ba-man ba-tî dyicí-ékwâbashi wǎ dyicí ńdyí dyi/já mě, ne baa*man ba-chi bǎmkpóngé ké ndyí*.

²⁵ Ne batu ebe ne banet-ashí-oshê ebe kâng ba/chi ba-nung ké afyi nyí Jerúsélem, ba-kyú ne busa ḿbú otu wǎ eringe nyí Otu Dívit o/mû ne mbú. Mbé ba/chi ba-cibi ne banet ḿbé Júda ne ḿbé Jerúsélem ba-yú ké bamútu ḿbé bubyî-orá budatut ne ké bubyî-orá, ne oshê mú Jerúsélem o/chi o-waa kángkáng nkéré ne banet súsú.

²⁶ Banet ba/chi ba-fím ké eshê nyí Júda ne ké eshê nyí e/fárâng ne Jerúsélem, ba/chi ba-fím ké esí nyí Běnjámin, ba-fím ké byikû-eku, ba-fím ké eku, ba-fím to ké kyicê-busyísen ńkyí Júda. Ba/chi ba-ba-chi byifen ké kiǐtí-kyise-kyifen echi ejí. Ba/chi ba-chi byifen ḿbyí badashí byirim-enyam ne ḿbyí esang-byichí ne ḿbyí burwan eshí ne ḿbyí asǎma ekó.

²⁷ Nké mbé ba-man ba-chi ńkyí n/sét kámbé, ba-tî dyicí-ékwâbashi wǎ dyicí ejí. Baa*man ba-tû dyitû ba-shwôm ne ndyí ké afyi nyí Jerúsélem ké dyicí ándyi* ké nǎ, â ba/tû, n/chi n-fé okwâ ké afyi nyí Jerúsélem. Okwâ o/chi o-shí byibám-batu ḿbyí ké Jerúsélem ne onet o*fí mú o/chi o-man erîp kámú*.