Jeryimáya 16 - Bokyi Bible

Okabe mú Óburúkpâbí o/tî kyi-kim ne Dyikpen ńdyí Jeryimáya

¹ Óburúkpâbí o/chîraa ne me o/fu,

² *dachi a-bé dyibé* a-fwon nang bwǎn ké kyikit ńkyín*.

³ Me n/chi n-sét ǒ ńkyí kyi/chi kyi-chi bwǎn ḿbé mbe ba-fwon n ké kyikit ńkyín, ne ńkyí kyi/chi kyi-chi banchí ne bané-bwǎn ámbe.

⁴ Mbé ba/chi ba-kpú byibî-byirwóm, ne onet o*fí mú o/chi o-tii kámbé* o-ryii nang kámbé*. Byikwóm-enyam-byiko ebe byi/chi byi-waa kyísí wǎ abîng. Â ba*da/ju kámbé ké byití* ba/chi ba-kpú esong, ne bunurung ne enyam byi/chi byi-ryí byikwóm ebe.

⁵ *Dachi a-nung ké kyise ńkyí banet mbe ba-tii ng bukyû*. *Dachi a-tii onet nang obónge*. Me mm*ba/chi n-chîjware banet ejí ne bunyîn-dyityém* n-tông kámbé kyijé* n-ri nang kámbé bafip*.

⁶ Banfang-banet ne banet-byikpu ba/chi ba-kpú ké esí ńnyín, nké onet o*fí mú o/chi o-tii kámbé* o-ryii nang kámbé*. Onet o*fí mú o/chi o-kpet byiko emen kyibáp* o-pwát nang dyishí* o-ta kámbé dyikán*.

⁷ Onet o*fí mú o/chi o-kye onet byiryíng* o-fé ǎ nang bato o/fu, onet-kyijé emen o/kpú ǎ*. Onet o*fí mú o/chi o-ri orî bafip*. Nang onet mú bonchí nang boné odakpú baa*ri ǎ bafip*.

⁸ *Dachi a-nung ké kyise ńkyí banet mbe ba-chi i dyijî*. *Dachi a-kyú ne mbé a-ryí byiryíng* a-jwáp bato*.

⁹ Fwôo atông a-jwo ńkyí me Óburúkpâbí mú o/rêe o-shwôm, mú mu Osówo mú Ézerel mu n-sét ng. Me n/chi n-chi kyicoge ńkyí ojêe ne bunyîn-dyityém ne ńkyí ajî-dyibé kyi-cíbî. Ńkyín kyi/chi kyi-chi, banet ḿbé mbe ńnyín ba-ri.

¹⁰ Â wo a/sét kámbé kángkáng byěm ḿbyín, mbé ba/chi ba-bí ǒ ńkyí kyi/chi ne me n-kabe n/fu, n-kyâ kámbé dyizong-kiǐtí-busông ńdyín. Mbé ba/chi ba-bí ǒ dyirông ńdyí mbé ba/róng ne kyibî ńkyí mbé ba/chi ké bushú ḿbú Osówo Óburúkpâbí ebe.

¹¹ Sét kámbé a/fu, Óburúkpâbí oo/raa o/fu, banchí enen ḿbé kpákpá ba/bírî mě esim ba-fé esówo ekíri. Mbé ba/né mě, ba*da/chi ńkyí n/sét kámbé*.

¹² Nké ben baa/chi ńkyí kyi/bên kyi-shwôm ńkyí banchí enen ba/chi. Ben kángkáng ba-chi i banchi byibî ne banshwane ashí, ne ba*fí ba-chi i ńkyí mu n-sét ng běn*.

¹³ Ké bubwô ámbu kâng, n/chi n-fîm běn ba-byí ké esí ńnyín n-da-tî běn ké esí nyí ben nang banchí enen ḿbé kpákpá baa*nyît kányí*. Ányi nké ba/chi ba-kûfé esówo ekíri buchú ne esû, ne me mm*ba/chi n-ri běn bafip*.

Banet ḿbé Ézerel ba/chi ba-fyi

¹⁴ Óburúkpâbí o/raa o/fu, nkéré mu o-bâ mú banet baa*ba/chi ba-chîsem dyizîn ejí wǎ Osówo mú mu okpó* mú o/fîm banet ḿbé Ézerel ba-byí ké esí nyí Éjip*.

¹⁵ Nké ba/chi ba-kûsem dyizîn ejí wǎ Osówo mú mu okpó, mú o/fím ne banet ḿbé Ézerel ké esí nyí kyicê ńkyí bushûyû ne ké kángkáng eshê ekíri nyí nyǐ o/mû oo/pwó kámbé byiryibyiryi o-fyi ne mbé. Me n/chi m-bwa ne mbé esim ké oshê ebe, ké esí nyí n/kye banchí ebe ḿbé kpákpá. Me Óburúkpâbí nké n/raa.

Busông ḿbú mbu bu-bâ

¹⁶ Óburúkpâbí o/raa o/fu, me mu n-twóm m bankâm ekworê chwóó ba-bâ ba-ba-kám banet ḿbén. N/chi n-twóm to banryuu akán ba-bâ ba-ba-kyé kámbé ké kángkáng eku ne ké kángkáng bacim ne ké kángkáng byikit-aká.

¹⁷ Me mu n-ri ng kángkáng byěm ḿbyí mbe ba-chi i. Chwǒm kyi*fí ńkyí me n*fí n-ri ng*. Mu n-ri ng byibî ebe.

¹⁸ N/chi n-chi kámbé ba-ré dyifwá kampén kafee ké byibî ebe ne atyém ebe nyí ba/bên, ké nǎ, mbé baa/bên esí ejí ne erím-bakye nyí e*fí ne dyikpen* wǎ byikwóm-enyam-byiko ne baa/chi kányí e-sú ne esówo nyí e*fí ké kafâ*.

Jeryimáya o/fé Nshwam mú o/fé Dyityém ne Óburúkpâbí

¹⁹ Óburúkpâbí, wo nké amu a-ku ng mě, a-kyâ mě busa. Wo amu a-chwáp ng mě ké nkéré mú afaníkong. Eshê e/chi e-fím ké ejíí emúmú e-ba-kâm ǒ, e-raa e/fu, banchí eten ḿbé kpákpá ba/mû ba*fí ne chwǒm kyikíri kyi-cibi ne esówo nyí e*fí ké kafâ*. Ba/mû ba*fí ne kyikíri kyi-cibi ne erím-bakye nyí e*da/byí chwǒm*.

²⁰ Onet o-man n echi esówo nyí emen nyǐ oyén*? Aa*wááng* â o/chi kányí, ee*kyú esówo*.

²¹ Óburúkpâbí o/raa kâng o/fu, me n/chi n-chi eshê e-nyît ké nkuli kyikû eringe nyí busa ejí mbu. E/chi e-nyît e/fu, me nké mu Óburúkpâbí.