Jeryimáya 15 - Bokyi Bible

Bafip ḿbé Banet ḿbé Júda ba/chi ba-ri

¹ Óburúkpâbí o/raa kâng ne me o/fu, nang Músis ne Sámwel nké ba/mû ba/bwom nyín mbe ba-tîm m mě arông, mm*ba/chi n-ri banet ḿbén bafip*. Ró kámbé ba-dim. Ró kámbé ba-dim mě ké bushú.

² Â mbé ba/bí ǒ kyikit ńkyí mbé ba/chi ba-jâ, sét kámbé a/fu, me n/sét něen n/fu, kyicê ba/chi ba-kpú bukyû-kyirwóm. Ányi nké mbé ba/chi ba-jâ. Bakíri ba/chi ba-kpú ké byití. Ányi nké mbé ba/chi ba-jâ. Kyicê ba/chi ba-kpú esong. Ányi nké mbé ba/chi ba-jâ. Bakíri ba/chi ba-kám kámbé wǎ básóng. Ányi nké mbé ba/chi ba-jâ.

³ Me Óburúkpâbí nn/kabe n-sét n/fu, byěm ḿbyí byi/bên byi-shwôm byinyii byi/chi byi-chi kámbé. Ba/chi ba-ju kámbé ké byití. Bubyî bu/chi bu-tut byikwóm-enyam-byiko ebe. Bunurung bu/chi bu-ryí kámbé, ne enyam e/chi e-ryí kyicê ńkyí kyidawaa.

⁴ N/chi n-chi kángkáng banet ḿbé ké ejíí ba-waa ocím ké dyishí fúú kyi-kim ne mbé, ké bubwô ḿbú ńkyí Otu Manáse mú wǎn-Otu Hezekyâ o/chi ké Jerúsélem ké nkéré o/mû otu mú Júda.

⁵ Óburúkpâbí o/raa o/fu, yeě oda běn eri bafip, ǎ banet ḿbé Jerúsélem. Yeě oda běn etii. Yeě odaman ebwom ka-bwon o-bí běn eringe nyí ben bamu.

⁶ Ben baa/né mě, baa/bírî mě esim. Ké bubwô ámbu, n/tan bubwô ejí n-ju [běn, ké nǎ, nn/kyee ekám kafâ ejí ńké nke ka-sa ng mě.]

⁷ Me n/yip běn m-pwó ké bufú wǎ biǐbyâa ké oshê nang orá ké esí ńnyín. N/ju běn, ben banet ejí. N/ju bwǎn enen, ké nǎ, ben ba*da/mîng byibî-akwóp enen*.

⁸ Banyǐnkú ḿbé mbe ké esí enen ba/jê ba-shwôm éshíshě nyí nyi ké bukô-baya. N/ju byisat enen ké nkéré ba/tôong byisat, n-chi bané ebe ba-ri busông. N*da/bên nkéré ne m-pwó kámbé bafip ne bushî*.

⁹ Onyinyi mú bwǎn emen ashí káchâtkányi ba/kpú, oo/jwâa, o-nwa ng ne kiǐnjáng eshû. Dyicí dii/bírî ǎ buchú. O/firi ne éshwân ne kyirwóm-kafâ. N/chi m-mîng banet-bushwôn enen ba-ju běn ben burwám enen ḿbú ba/tôong bakpó. Me Óburúkpâbí nké n/raa.

Jeryimáya o/sét Óburúkpâbí kyi-kim ne Bafip Emen

¹⁰ Me n*fí ké bunyîn-dyityém*. Ebóng boné ejí o/bê ne me ké esí ńnyín. Me mu ké bushwôn ne okân ké dyishí ne nang yeě nang yeě ké ejíí. Me n*da/pwoo ne onet akpuga* nang onet to o*da mě epwoo ne akpuga* nké nang yeě nang yeě mu o-shú u mě. [

¹¹ Óburúkpâbí, kyi/bát byishû ebe byikám mě â n*da/kyú ḿgbán eyên] mú onong* â n*da ǒ etîm arông ké bubwô-banet-bushwôn ejí ké nkéré ba/mû ké afaníkong ne bafip*.

¹² Onet o*fí mú odaman enep kiǐré o-bún* aciringaciring kiǐré ńkyí kyi/fím bushûyû ńkyí kyidajang eshwane.

¹³ Óburúkpâbí o-raa ne me o/fu, n/chi n-twóm banet-bushwôn ba-ba-wuri akpuga ne kángkáng byěm ḿbyí banet ejí, eringe nyí ndakye kámbé busông ké byibî ḿbyí baa/chi ké kángkáng esí ńnyín.

¹⁴ N/chi n-chi kámbé ba-firi básóng ḿbé banet-bushwôn ebe, ké esí nyí mbé baa*nyît chwǒm kyi-kim ne nyǐ* ké nǎ, kafâ esa ejí nke wǎ okwâ ne ka-waa ng ne banyá.

¹⁵ Ne me n-raa kâng n/fu, Óburúkpâbí, wo amu a-nyît ng kyikû. Zîim mě, a-chwáp mě. Mîng mě n-só banet ḿbé mbe ba-kyâ mě busông ewa. *Dachi a-ryí ofit kyi-kim ne mbé* a-mîng kámbé ba-ju mě*. Zîim a/fu, ké dyishí eyên nké mbe ba-kyâ mě edángé.

¹⁶ Wo a/raa ne me, ne n/fwôo atông n-jwo kángkáng ńkyí wo a/sét mě. Osówo Óburúkpâbí mú o/rêe o-shwôm, wo nké a/já mě, ne ké bubwô ámbu, byiraa eyên byi/chi dyityém ejí dyi-sú ne bunyîn-dyityém.

¹⁷ Me n*da/kyú ne banet bakíri n-jwó ng éjwô* n-kyú ké bunyîn-dyityém*. Ké byěm echi ḿbyí wo amu a-sét ng mě, me n/kyú ké byiko ejí, n-firi ké kafâ esa.

¹⁸ Ebóng me mu n-ri ng afaníkong n-câ kashú. Ebóng byinêm ejí byi*fí byi-kpú u*. Wo amu a-ryuu ng a/fu, a-fâ mě bushú ké kafâ wǎ kace ńké kadanúng ne kyifang dí.

¹⁹ Ké byiraa ḿbyín, Óburúkpâbí o/faa ejá o/fu, â a/bwa esim, me n/chi n-chî ǒ ekoo, ne a/chi a-chîkyú ḿgbán ejí. Â wo a/mîng eraa byěm ḿbyí byi*da/byí chwǒm* a-sét banet kyitwóm ńkyí kyinong, wo a/chi a-chîkyú mkpábé mú odasét byiraa ejí. Banet ba/chi ba-bwa esim ba-kâm ǒ, ne kii*ba/chi kyi-chîchi ńkyí wo adadim a-kâm kámbé*.

²⁰ Me n/chi n-chi ǒ a-shwane wǎ ekpe-kyise nyí biǐré biire ké burwám ebe. Mbé ba/chi ba-nwa ne wo, nké baa*ba/chi ba-kpógê ǒ*. Me n/chi n-kyú ne wo, n-ku ǒ, n-chi ǒ chwǒm kii*ta ǒ*.

²¹ Me n/chi n-nyii ǒ n-koo ké abwô nyí busa ḿbú bambên atyém-banet. Me Óburúkpâbí nké n/raa.