Jeryimáya 14 - Bokyi Bible

Kiǐtí-Omu mú o/kin ena

¹ Óburúkpâbí o/raa ne me kyi-kim ne omu mú o*fí o-na ng* o/fu, oshê mú Júda o/firi ké dyikán eta, eshê emen e-kú e-kpú u.

² Banet emen ba-kú ba-rí i ké ecing ké bafip, ne oshê mú Jerúsélem mu o-tii ng o/fu, bachwáp kámú.

³ Banfang-banet mbe ba-twóm m bǎmgbán ebe ba/fu, bada-tó omu. Bǎmgbán ámbe ba-dim ba-wâa ké buce, nké ba*da/ri omu*. Ba-bwa esim ne butí kafâ dyikáá. Ké nkéré mú ba*fí to ba-nyît ng ńkyí badachîchi* ba-rôo bashú ebe.

⁴ Ké nǎ, omu o*fí to o-na ng* ne esí ee/jwóm, kyirwóm-kafâ kyi-kú kyi-nwa ng bamkpang byifát, ne ba-kú ba-rôo ng bashú ebe.

⁵ Ké dyikán, enyam nyí e/fwon wǎn e/dim e-mîng kámú ányi, ké nǎ, biǐbyâa byi*fí ḿbyí edaryí*.

⁶ Enyam nyi e-bwom m kyíbóng-eku, e-nwa ng ne kiǐnjáng eshû wǎ boǒbyî. E*fí to e-rángê e* ké ebóng, e*fí to ne byiryíng ḿbyí edaryí*.

⁷ Banet ejí ba-kú ba-tii ng bukyû ba-kó ng mě ba/fu, nang ké byibî eten mbyi byi-tông ng bě be bayén wááng, chwáp bě, ǎ Óburúkpâbí, wǎ eringe nyí wo aa/ryí bě ocím. Be bii/bírî ǒ esim kampén chwóó. Be bii/chi byibî ké bushú eyên.

⁸ Wo kǎnchí nké Ézerel badatî dyityém. Wo nké amu a-nyii ng bě ké afaníkong. Ebóng wo amu wǎ ocinónet ké esí eten, wǎ ocinónet mú odarí dyicí dyibónge.

⁹ Ebóng wo amu wǎ onet mú ba/byí ǎ kiǐmút, wǎ onet-súja mú o*fí to ne busa ḿbú odachwáp*. Ké ntûntû, ǎ Óburúkpâbí, wo amu ne be. Be byi-chi i banet eyên, *da bě emîng*.

¹⁰ Óburúkpâbí o/raa kyi-kim ne banet ḿbén o/fu, kyi-nyîn n kámbé echêe ba-mîng mě, ne baa*man eníbî byiko ebe*. Ké bubwô ḿbún, me kyi*fí kyi-nyîn n mě ne mbé*. N/chi n-zîim byibî-byěm ḿbyí baa/chi, n-kye kámbé busông ké bubwô-byibî ebe.

¹¹ Óburúkpâbí o/raa ne me o/fu, *dachi a-bí mě a/fu, me nchwáp banet ḿbén*.

¹² Nang ba-bwa ba-cíp esong, mm*ba/chi n-fwôo atông ké bukyû ebe ḿbú mbe ba-tii ng ba/fu, me nchwáp kámbé*. Nang ba-bwa ba-chi byifen ké byitú ne ké byiryíng ba-kye mě, kii*ba/chi kyi-nyîn mě ne mbé*. Nké n/chi n-ju kámbé ké byití ne ké esong ne ké byirwóm.

¹³ Ne me n-raa kâng n/fu, Óburúkpâbí mú mu Otu Kyítá, wo amu a-nyît ng a/fu, bamkpábé ḿbé badasét byiraa eyên mbe ba-sét ng banet ba/fu, byití ne esong bii*ba/chi byi-chîchi* ké nǎ, wo aa/ryí ocím a/fu, bii*chi to*. Mbe ba-sét ng ba/fu, bunyîn-dyityém nké nke nké bu/chi bu-firi ké esí eten.

¹⁴ Nké Óburúkpâbí o/faa mě o/fu, bamkpábé ḿbé badasét byiraa ejí mbe ba-sét ng byisédéng ké dyizîn ejí. Me n*da/twóm kámbé*. Nang busa n*da/kye kámbé* nang kyiraa nang kyibónge n*da/sét kámbé*. Byěm-akat ḿbyí mbe ba-sét ng byi*da/fím ne me*. Byěm ḿbyí mbe ba-sét ng ba/fu, byi/chi byi-chi mbyi byěm ḿbyí byi*fí ké kafâ* ḿbyí mbé bayén ba/kabe.

¹⁵ Me Óburúkpâbí mu n-sét ng ǒ ńkyí n/chi n-chi bamkpábé ḿbé badasét byiraa ejí ámbe, ḿbé n*da/twóm kámbé* ne mbe ba-sét ng ké dyizîn ejí ba/fu, byití ne esong bii*nung ké esí ńnyín*. N/chi n-ju kámbé ké byití ne esong.

¹⁶ N/chi n-kúng bukwóp ḿbún bubónge to n-ju banet ḿbé mbé mbe ba-sét ng kámbé byěm ḿbyín. N/chi m-pwó byikwóm-enyam-byiko ebe ké byiká-oshê mú Jerúsélem, ne onet oo*ba/chi o-kyú mú o/chi o-ryii kámbé*. Ńkyín kyi/chi kyi-chi kámbé kángkáng, cibicibi ne banyi ebe ne bwǎn ebe. N/chi n-chi kámbé ba-ré dyifwá ńdyí atyém ebe nyí ba/bên.

¹⁷ Óburúkpâbí o/kye mě busa o/fu, me nsét banet kyi-kim ne bafip ejí n/fu, kyi/bát achi ejí akûsuri batíí buchú ne esû. N*dachi m-mîng bukyû etii* ké nǎ, baa/némê banet ejí kanong kanong ne nkyi kyi-bán n kámbé chwóó.

¹⁸ Â n/ce ké dyikán, mu n-ri ng byikwóm-banet ḿbyí ba/ju ké byití. Â n/ce ké eshê, n-ri banet ḿbé mbe ba-kpú u esong. [Bamkpábé ḿbé badasét byiraa-Osówo ne banchi kyifen-Osówo mbe ba-chi i bǎmkpóngé ebe, nké ba*fí ba-nyît ng ńkyí mbe ba-chi i*.]

Banet ba/tîm Óburúkpâbí Arông

¹⁹ Óburúkpâbí, wo aa/né banet ḿbé Júda a-zú dyityém? Banet ḿbé Záyon mbe ba-sa ng ǒ kafâ? Ebóng wo aa/kye bě kiimbâng-onéme mú baa*man bě to esoo kyibáp kyi-kpú*. Be byi/kyé bunyîn-dyityém, nké chwǒm ńkyí kyinong kyi*da/chi*. Be byi/tî achi byi/fu, byi/chi byi-nyange, nké byi/bwa byi-ri biinkaa-byiko-byěm.

²⁰ Óburúkpâbí, be bii/chi kyibî ké bushú eyên. Byi-kú byi-sét ng byibî eten ne ḿbyí banchí eten ḿbé kpákpá.

²¹ Zîim byěm ḿbyí a/ryí bě ocím, a*dachi a-né bě*. *Dachi a-fé Jerúsélem mú mu ne kiǐtí-kakyúng-butu eyên éshwân*. *Dachi a-bên ocím mú a/ryí ne be ne a-sem byiko eyên*.

²² Orím-bukye mú ké ejíí o*fí nang obónge mú odaman echi omu o-na*. Bubóng ké byiko emen boo*man echi omu o-na*. Be bii/yip atyém eten byi-fé ne wo, ǎ Osówo Óburúkpâbí eten, ké nǎ, wo nké amu a-chi i byěm ḿbyín.