Jeryimáya 13 - Bokyi Bible

Ekap nyí Kyídí

¹ Óburúkpâbí o/sét mě o/fu, me nda-ré kyídí m-bwá ké osín. Nké o/sét mě o/fu, me n*dachi n-lip kánkyí ké omu*.

² Ne n-da-ré kyídí ánkyi kâng m-bwá.

³ Ne Óburúkpâbí o-chîraa kâng ne me o/fu,

⁴ ca ké kace ńké Yuférétyis a-da-rôo kyídí ánkyi ké dyifít-buká.

⁵ Ne n-dim kâng n-da-rôo kánkyí fáráng ne kace ánke.

⁶ Ké nkéré mú kaa/rí, Óburúkpâbí o/sét mě o/fu, me mbwa esim ké kace ánke n-da-yip kyídí ánkyi.

⁷ Ne m-bwa kâng esim, ne ké nkéré mú n/ri kyikit ńkyí m/mû n/rôo kánkyí, n/ri kánkyí ké kii/bên, kyi*fí to kanong*.

⁸ Ne Óburúkpâbí o-chîraa ne me o/fu,

⁹ něen nké n/chi m-bên byiko etông ḿbyí banet ḿbé Júda, ne kiǐtí-byiko etông ńkyí banet ḿbé Jerúsélem.

¹⁰ Byibî-banet ḿbyín bii/né echi ńkyí n/sét kámbé. Ashí ebe eshwane ne byibî ebe echi byi*fí byi-man n*. Ne baa/kyú bǎmgbán ḿbé esówo ekíri, ba-fé kányí. Ké bubwô ámbu kâng, mbé ba/chi ba-firi wǎ kyídí ńkyín ńkyí kyi*da/chîbyí chwǒm*.

¹¹ Wǎ eringe nyí kyídí kyidasît onet kíngkíng ké osín, éné to nké m/mû n/kabe n/fu, kángkáng banet-Ézerel ne ḿbé Júda baníbî mě kíngkíng. Me n/chi ńkyín eringe nyí mbé badakyú banet ejí, ne banet ba/chi ba-kye dyizîn ejí akpee ne ofê, nké mbé ba*da/chi ńkyí n/sét kámbé*.

Otyu-Bato

¹² Osówo Óburúkpâbí o/raa ne me o/fu, Jeryimáya, sét banet ḿbé Ézerel a/fu, bafé bato ké otyu nang orá o-sú. Mbé ba/chi ba-faa ǒ ba/fu, be byi/mû byi*fí byi-nyît ng byi/fu, otyu-bato ba-fâ bato ké mǔ*?

¹³ Wo, sét kámbé kâng a/fu, me Óburúkpâbí n/chi n-kye banet ḿbé ké esí ńnyín bato ba-jwáp tete ba-kpet ebwóm, n-kyâ batu ḿbé kyikû-banet ńkyí Otu Dívit ne banchi kyifen ejí ne bamkpábé ḿbé badasét byiraa ejí ne kángkáng banet ḿbé Jerúsélem.

¹⁴ Ne n/chi n-yip kámbé kâng n-díp ne barî n-sé kámbé wǎ etyu. N-sé ng kángkáng bakâa ne byisat. Bafip nang babónge ba*fí ḿbé ba/chi ba-chi mě ne m-mîng kámbé eju*.

Jeryimáya o/kuri Banet ḿbé Ézerel Ekó kyi-kim ne Byiko etông

¹⁵ Banet ḿbé Ézerel, Óburúkpâbí oo/raa. *Da n̂g echi ba-tông byiko*. Fwôo n̂g atông ba-jwo ǎ.

¹⁶ Kye n̂g Osówo Óburúkpâbí enen ofê ne o-kûbê ne kyifip ńkyí kyi/chi kyi-chi běn ba-kpán ácíring kyíbóng-eku, ne o-kûbírî kiinwángé ńkyí bamu ba-tî ng achi ké nkyí kyi-firi kiǐtí-kyifip.

¹⁷ Â ba*da/fwôo atông ba-jwo* me n/chi n-tii ké kadip, ké bubwô ḿbú byiko enen etông. Me n/chi n-tii ka-sa mě, batíí ba-byí, ké nǎ, baa/kúng banet ḿbé Óburúkpâbí ba-dim ne mbé wǎ básóng.

¹⁸ Óburúkpâbí o/raa ne me o/fu, sét otu ne boné emen ba-shû ké bukyúng-butu ebe, ké nǎ, etam-butu ebe nyí enong enong ee/pii kámbé [ké ashí] e-róng kyísí.

¹⁹ Baa/wâng eshê nyí Júda nyí busyísen ba-fé ké kafâ. Onet o*fí mú o/chi o-man eshwôm o-kâm kámbé*. Baa/kúng kángkáng banet ḿbé Júda ba-jâ ne mbé ké eshê ekíri wǎ básóng.

²⁰ Jerúsélem, bírî achi a-ri. Banet-bushwôn ba-kú ba-fím m ké kyicê ńkyí bushûyû ba-bâ. Banet ḿbé ba/mû ba/jang etông byiko kyi-kim ne mbé, ḿbé ba/fu, ben ba-kûtún kámbé, mbe nyá. [

²¹ Ben ba-sét ng ebóng ké nkéré mú banet ḿbé ben bamu ba-kabe ng ba/fu, ba-chi i bacín enen baa/kpógê běn ba-firi ké bubwô ebe.] Ben ba/chi ba-firi ké busông wǎ onyinyi mú o-kú o-fwon n.

²² Â ben ba/bí ba/fu, ebóng byěm ḿbyín kángkáng byi/chi běn, ebóng ńkyí ba/ját běn byídí ba-firi osíndyíbang, nkyi něen, ké nǎ, byibî enen byi/jang ejap.

²³ Kiimpyimpyam-onet kyi-man n eyángê byiko emen oo*jîi to*? aa ekpang nké edaman efîm basáng emen ké byiko? Â byěm ámbyi byi-man n echi, éné ben to mú bamu ba-chi i byibî byíbi ba-man n ekwâa ba-kûchi ńkyí nkyi kanong.

²⁴ Óburúkpâbí o/chi o-pwó běn byiryibyiryi wǎ biǐbyâa ḿbyí bufú mbu bu-tugi ng kámbyí bu-pwó ng.

²⁵ Nyǐ oo/sét o/fu, ńkyín kyi/chi kyi-chi běn. Ńkyín nké nyǐ o/fu, nyǐ o-chi i běn, ké nǎ, ben baa/ráp ǎ, ne ba/yip atyém enen ba-fé ké esówo nyí e*fí ké kafâ*.

²⁶ Óburúkpâbí oyén o/chi o-két běn esínábang, o-fé běn éshwân.

²⁷ Nyǐ oo/ri běn ba-chi byěm ḿbyí mbyi byi-sa ng ǎ kafâ. Nyǐ oo/ri běn ké baa/kyé esówo nyí e*fí ké kafâ* ké eku ne ké byifát, wǎ onyinchéng mú mu o-kyé ng erí ne onyi mú orî-onet emen, wǎ kabyî-orá ńké nke ka-kyé ng erí ne buma. Banet ḿbé Jerúsélem, ben ba/firi ké busông. Nkéré orá mú ben ba/chi ba-firi kanong.