Jeryimáya 12 - Bokyi Bible

Jeryimáya o/bí Óburúkpâbí Bǎmbím

¹ Jeryimáya o/fu, Óburúkpâbí, â n/fu, n-kán n ké dyishí ne wo, a-kpógê ng mě. Nké m-man m-bí ǒ bǎmbím kyi-kim ne acît eryí. Ebóng ńkyí byibî-banet mbyi byi-já ng byěm. Ebóng ńkyí bannîm banet nang ba-chi ebóng kyi-nwa ng kyi-kye kámbé.

² Wo nké a/kwón kámbé, ba-chi eriri, ba-kán, ba-zím byirim. Mbé kángkáng nkéré ba-raa ng kanong kyi-kim ne wo, nké ké ntûntû, ba*fí ba-kérê ng kyi-kim ne wo*.

³ Nké Óburúkpâbí, wo amu a-nyît ng mě. Wo amu a-ri ng ńkyí mu n-chi i, ne eringe nyí wo amu a-jê ng mě. Tut byibî-banet ḿbyín a-dim ne mbé wǎ ebû nyí ba-kú ba-bâ eju kányí. Bám kámbé tete kyi-ribi nkéré mú ba/chi ba-ju kámbé.

⁴ Ka-rí i nǎ ne esí eten e-mîng ewaa jwómjwóm ne biǐbyâa byi-mîng ekpú. Enyam nyi e-kpú u ké bubwô ḿbú byibî ḿbyí banet eten, banet ḿbé mbe ba-raa ng ba/fu, Osówo o*fí o-ri ng [ńkyí byimu byi-chi i*.]

⁵ Óburúkpâbí o/raa o/fu, Jeryimáya, â wo aa/kyee ké ochéé ekan ne banet, wo a-cen n nǎ ne a-kan ochéé ne bubyî-orá. Â wo aa*man ebwom nang cip ké kyikit ńkyí nkyi wááng* wo a-cen n nǎ ne a-nung ké kyizinge ńkyí nkyi ké bukô-kace ńké badakó Jódan.

⁶ Nang bwǎn-bané eyên ḿbé mbe kyikû-banet eyên ba-kú ba-chi i ǒ byěm-kaǎnínǐm. Baa/cibi ne barî ba-bwom bunwa ne wo. *Dachi a-fé dyityém ne mbé* nang ké mbe ne bunyîn-ejá*.

Bafip ḿbé ba/chi Óburúkpâbí ké Bubwô-Banet Emen

⁷ Óburúkpâbí o/raa o/fu, me nn/dim m-mîng banet ḿbé Ézerel. Me nn/né oshê ejí mú n/cá kámú. Nn/kúng banet ḿbé mbe ba-jê ng mě n-kye banet-bushwôn ebe.

⁸ Banet ejí ḿbé n/cá kámbé baa/bírî bunwa ne me. Mbé baa/pám mě ba-fém wǎ ekpang nyí nyi ké dyikán, ne ké bubwô ámbu, ba-kú ba-sa ng mě kafâ.

⁹ Banet ejí ḿbé n/cá kámbé mbe wǎ kanurung ńké bukô mbu bu-kan n kánké ekám byicê byimúmú. Kó enyam-dyikán e-bâ e-ba-nung ké dyijî.

¹⁰ Batu chwóó ḿbé eshê ekíri baa/bên kyifát ejí. Mbé baa/bên byiryíng ejí. Baa/chi esí ejí nyí enong enong e-bírî kyikim-dyikán.

¹¹ Baa/chi kányí e-bírî kyikim-dyikán, e-waa kafâ dyikáá ké bushú ejí. Esí emúmú e/firi kyikim-dyikán, ne nang onet obónge o*fí o-kérê ng*.

¹² Banet baa/fím ké kángkáng eku nyí ké kyikim-dyikán ba-ba-bên byikit. Me nn/twóm byití n/fu, byiba-bên kángkáng esí ejí ne onet o*fí mú o/chi o-man ekyú ké bunyîn-dyityém*.

¹³ Banet ejí ba/kwón esang-byichí, ba-fuu byiwong. Mbé baa/chi bǎmkpóngé ba-fé busa, nké ba*da/já nang chwǒm ké mbé*. Ké bubwô ḿbú kyibî-busa-dyityém ejí, byíkwôn ebe byi*da/zím*.

Ocím mú Óburúkpâbí o/ryí Banet ḿbé ba/kim ne Banet ḿbé Ézerel

¹⁴ Óburúkpâbí o/raa o/fu, me mu ne chwǒm ńkyí ndasét kyi-kim ne banet ḿbé mbe ba-kyú u ba-kim m banet ḿbé Ézerel, ḿbé ba/bên esí nyí n/kye banet ejí ḿbé Ézerel. N/chi n-kúng byibî-banet ámbyi ké eshê ebe n-dim ne mbé wǎ kyichí ńkyí ndazú kánkyí ne eriri, ne n/chi n-nyii banet ḿbé Júda ké abwô ebe n-koo.

¹⁵ Nké ké nkéré mú nn/kúng kámbé ké eshê ebe ányi n-dim ne mbé, n/chi n-ri kámbé bafip. N/chi m-bwa ne oshê nang orá ké esí ebe ne ké kyikit ńkyí ba/mû.

¹⁶ Â mbé ba/chi ba-koo Osówo mú banet ejí mbe ba-fâ ne kángkáng atyém ebe, ba-ryí ocím ba/fu, ké dyizîn ńdyí Óburúkpâbí mú mu okpó, wǎ eringe nyí mbé ba/mû ba/tángê banet ejí ba-ryí ocím ké dyizîn ńdyí Bâl, mbé kâng ba/chi ba-kyú ké burwám-banet ejí, ne ba/chi ba-já ńkyí mbe ba-ryuu ng.

¹⁷ Nké â oshê nang orá o/fu, mǔ oo*chi ńkyí n/sét* n-zú ng kámú kángkáng ne eriri, n-ju kámú. Me Óburúkpâbí nké n/raa.