Jeryimáya 11 - Bokyi Bible

Jeryimáya ne Ocím mú Osówo o/ryí ne Banet ḿbé Júda ne Jerúsélem

¹ Óburúkpâbí o/raa ne me o/fu,

² fwôo atông a-jwo eringe nyí byi/ryí ocím ké dyizîn ejí. Sét banet ḿbé Júda ne Jerúsélem

³ a/fu, me Osówo Óburúkpâbí mú Ézerel n/chi n-shí nang yeě mú o*da/tî ocím mún mú byi/ryí*.

⁴ Ocím mún nké n/ryí ne banchí ebe ḿbé kpákpá ké nkéré mú n/fîm kámbé ba-byí ké Éjip, ké esí nyí e/mû kámbé wǎ bumang-okwâ. Me n/sét kámbé n/fu, bajwo mě, ba-chi to kángkáng byěm ḿbyí n/sét kámbé. Â ba/chi éné, mbé ba/chi ba-kyú banet ejí ne me to n/chi n-kyú Osówo ebe.

⁵ Ne me n/chi n-tî kâng ocím mú n/ryí banchí ebe ḿbé kpákpá, mú n/fu, n-kyâ kámbé esí nyí enong enong, nyí edabát byiryíng, nyí mbé mbe ne nyǐ kántîk. Ne me Jeryimáya n-faa kâng n/fu, âa, nkyi éné, ǎ Óburúkpâbí.

⁶ Ne Óburúkpâbí o-raa ne me kâng o/fu, ca ké eshê nyí Júda ne ké byiká-oshê ḿbyí Jerúsélem. Sét kyitwóm ejí ké byikit ámbyi, a-sét banet a/fu, bafwôo atông ba-jwo byěm ḿbyí byi/ryí ocím, ba-tî kámbyí.

⁷ Ké nkéré mú n/fîm banchí ebe ḿbé kpákpá ba-byí ké Éjip, me n/kuri kámbé ekó kanong kanong n/fu, bafé mě, ne mu n-kuri ng kámbé ekó n-câ kashú tete dyicí ńdyí kurún.

⁸ Nké mbé ba*da/fwôo atông* ba-chi ńkyí n/sét kámbé*. Nang yeě nang yeě o/shwane dyishí o-ca kashú o-chi ńkyí kyibî-dyityém emen kyi/sét ǎ. Me m/mû n/sét kámbé n/fu, batî ocím mú n/ryí ne mbé, nké mbé ba/né. Ké bubwô ámbu, n/kye kámbé kángkáng busông ḿbú bu/fím ké ocím ámu mú byi/ryí.

⁹ Ne Óburúkpâbí o-raa kâng ne me o/fu, banet ḿbé Júda ne ḿbé Jerúsélem mbe ba-nam m bunwa ebwom ne me.

¹⁰ Mbé baa/bwa esim ké byibî ḿbyí banchí ebe ḿbé kpákpá, ḿbé ba/né echi ńkyí n/sét kámbé. Mbé baa/fé esówo ekíri. Banet ḿbé Júda, cibicibi ne ḿbé Jerúsélem ba/bên ocím mú n/ryí ne banchí ebe ḿbé kpákpá.

¹¹ Ké bubwô ámbu kâng, me Óburúkpâbí n/raa n/fu, mu m-bâ kámbé ne busông ḿbú mbé baa*ba/chi ba-fem ké mbú*. Nang mbé ba-tii ba-kó mě, mm*ba/chi n-faa kámbé ojá*.

¹² Ne banet ḿbé Júda ne ḿbé Jerúsélem kâng ba/chi ba-dim ba-da-tii ba-kó esówo ebe nyí mbe ba-shí i burwan ba-kyâ kányí, nké esówo ányi ee*ba/chi e-man echwáp kámbé ké nkéré mú afaníkong ebe*.

¹³ Ké nǎ, esówo nyí banet-Júda mbe ba-fâ ee/jê jangjang wǎ eshê ebe, ne byikit-éshwân ḿbyí mbe ba-chi i byifen, ba-shí i burwan ba-kyâ Bâl bii/jê jangjang wǎ byiká-oshê ḿbyí ké Jerúsélem.

¹⁴ Ké bubwô ḿbún, *dachi a-fé nshwam a-kye mě* ké bubwô-banet ḿbén* nang bukyû to *dachi a-tii* a-fé nang nshwam ké dyishí-banet ḿbén* ké nǎ, me mm*ba/chi n-fwôo atông* â ba/tii ba-kó mě ké nkéré mú busông ebe*.

¹⁵ Óburúkpâbí o/raa o/fu, banet ḿbé mbe ba-jê ng mě mbe ba-chi i byibî-byěm. Mbé ba-cen n nǎ ne ba-chîkyú ké kiǐtí-kyise-kyifen ejí echi. Mbé mbe ba-kabe ng ba/fu, mbé ba-man n ekpán busông ḿbú n/chi n-kye kámbé? [ké ocím eryí?] ne ké byifen echi ké byitú? Ḿbyí mbyí byi-chi i kámbé ba-firi ké bunyîn-dyityém?

¹⁶ Ké nkéré obónge, me n/kó běn n/fu, ben ba-chi i kyichí ńkyí nkyi ne eshǎan chwóó, ne byirim ḿbyí byinong, nké kántîk n-kúng ng kyirime wǎ ńkyí etare, n-shí eshǎan emen, n-bún byire emen.

¹⁷ Me Óburúkpâbí mú o/rêe o-shwôm nké n/kwón běn ne n/fu, n-kyâ běn busông, ké bubwô ḿbú kyibî ńkyí banet ḿbé Júda ne ḿbé Ézerel ba/chi, ńkyí mbe ba-shí i burwan ba-kyâ Bâl.

Banet ba/nam Jeryimáya Dyiju

¹⁸ Óburúkpâbí o/sét mě kyi-kim ne dyiju ńdyí banet-bushwôn ejí mbe ba-nam m mě.

¹⁹ Nké me m/mû wǎ etám-ebû nyí ee*faa ojá* nang mbe ba-wâa ng kányí edaju. Me n*da/nyît n/fu, me nké mbe ba-nam m mě byibî-byěm echi*. Mbé ba/mû mbe ba-raa ng ba/fu, bâ n̂g byi-két kyichí ńkyín [ké kyi/tôong ne byirim emen.] Bâ n̂g byi-ju ǎ eringe nyí baa*zîim to dyizîn emen*.

²⁰ Nké, ǎ Óburúkpâbí mú o/rêe o-shwôm, wo a-chi i nkêt mpan mú oo*ryí acît*. Wo amu a-kan n a-nyît okabe mú ké atyém-banet. Me nn/kúng kyiraa ejí n-fé ǒ ké abwô, n-kyú n-ri eringe nyí wo a/chi a-só banet ḿbén ewa.

²¹ Banet ḿbé Anátot ba/mû mbe ba-ryuu ng ba/fu, baju mě, ne ba-sét mě ba/fu, mbé ba-ju ng mě â me n/waa n-sét ng byiraa ḿbyí Óburúkpâbí n-câ kashú.

²² Ne Óburúkpâbí mú o/rêe o-shwôm o-raa kâng o/fu, n/chi n-kye kámbé busông. Ba/chi ba-ju esu-banet ebe ké byití. Bwǎn ebe ba/chi ba-kpú esong.

²³ Me nn/tî nkéré mú n/chi n-kye banet ḿbé Anátot busông, ne ké ochíchí-nkéré ámu, onet o*fí nang obónge mú o/chi o-fem*.