Jénésis 7 - Bokyi Bible

Omu mú o/na Buce bu-sú bu-cít Ejíí Emúmú

¹ Óburúkpâbí o/sét Núwa o/fu, nung ké ńsukyíkang ne kángkáng kyikû-banet eyên. Me nn/ri n/fu, wo kǎnchí ké ejíí emúmú nké amu a-chi i ńkyí nkyi kanong.

² Kúng enyam nang erá nyí baa*ciring* diǐkpú ne enyii, otyép ne buma, nké nyí badaciring, kúng efee efee, otyép ne buma to.

³ Kúng to dyizong-kanurung nang kará diǐkpú ne bunyii, otyép ne buma to. Chi ńkyín eringe nyí kángkáng enyam ne bunurung byi/chi byi-kpen byi-chîfwon byi-fé ké ejíí.

⁴ Ké ací káchâtkányi kyi-fím kurún, n/chi n-twóm omu mú o/chi o-na ké bajam-ací bafee, eringe nyí n/chi n-ju kángkáng byěm ḿbyí mbyi byikpó, ḿbyí n/chi.

⁵ Núwa o/chi kángkáng byěm ḿbyí Óburúkpâbí o/sét ǎ.

⁶ Núwa o/mû oo/rí égot-aje echât ké nkéré buce bu/sú bu-cít ejíí.

⁷ Nyǐ ne onyi emen ne bwǎn ebe ne banyi ebe ba/nung ké ńsukyíkang eringe nyí badafem buce ámbu ḿbú bu/sú.

^8-9 Wǎ eringe nyí Osówo o/kye busa, Núwa o/kúng kángkáng azong-enyam ne bunurung, otyép ne buma, nyí badaciring ne nyí baa*ciring* o-fé ké ńsukyíkang.

¹⁰ Kyi/rí ací káchâtkányi, omu o-kpet ena.

¹¹ Ńdyí Núwa o/rí égot-aje echât, ké ací onyiryiká ne afee, ké nnyinyěng-otukáku, kángkáng bambyí-omu ḿbé kyísí ba/byí omu ne kángkáng afyi-omu nyí kyíbóng a/bâa,

¹² ne omu o-na ké ejíí, ké bajam-ací bafee.

¹³ Ké ochíchí-dyicí ándyi, Núwa ne onyi emen ba/nung ké ńsukyíkang, cibicibi ne bwǎn ebe ḿbé banyinchéng bachât, Shêm ne Hâm ne Jáfet ne banyi ebe.

¹⁴ Ba/nung ne kángkáng enyam, nyí byise ne nyí dyikán, nyí eryên ne nyí boǒníng ne kángkáng azong-bunurung.

¹⁵ Kángkáng enyam nang erá, otyép ne buma, e/nung ké ńsukyíkang ne Núwa

¹⁶ wǎ eringe nyí Osówo o/sét ǎ. Ne Óburúkpâbí o-cít dyifyi-ńsukyíkang mú Núwa o/nung.

¹⁷ Buce bu/sú bu-ca kashú ké bajam-ací bafee, omu o-firi mú ńsukyíkang odacen kyíbóng taa.

¹⁸ Omu o-cít ng byěm o-câ, ńsukyíkang o-cen n kyíbóng taa.

¹⁹ Omu o/cít eku nyí e/nyâam e-shwôm ké ejíí.

²⁰ O/wâa o-sú u o-câ tete o-sú o-shwôm eku ányi ké bamyíta káchâtkányi.

²¹ Kángkáng byěm ḿbyí mbyi byikpó ké ejíí byi-kpú, bunurung ne enyam ne banet.

²² Kángkáng byěm ké ejíí ḿbyí mbyi byi-koo ng bufú ne byi-kpen byi/kpú.

²³ Óburúkpâbí o/ju kángkáng byěm ké ejíí, banet ne enyam ne bunurung. Banet ḿbé ba/waa ba/mû Núwa ne banet ḿbé ba/mû ne nyǐ ké ńsukyíkang.

²⁴ Kyi/rí bajam-ací káchâtkányi esim diǐkpú ne omu o-kpet enúng.