Jénésis 6 - Bokyi Bible

Byibî ḿbyí Banet-Ejíí

¹ Ké nkéré mú banet baa/jê ké ejíí, ba-fwon bwǎn-banyinyi,

² kyicê-[barím-Osówo] ba/cá bwǎn-banyinyi ḿbé banong banong, ḿbé banet ba/fwon, ba-bé kámbé.

³ Ne Óburúkpâbí o-raa kâng o/fu, mm*ba/chi m-bángê banet ba-kpen ne banyá*. Ba-man ba-kpú. Kyi-fím kántîk kyi-ca kashú, baa*ba/chi ba-chîrí ba-shwôm bajam-aje nyâchât*.

⁴ Ké nkéré ámu, nang ńdyí ka/chîrí, biǐnât-banet byi/mû ké ejíí ḿbyí banyinyi ba/fwon cibicibi ne barím-Osówo. Mbé nké ba/mû biǐtí-banet ne bakân-banet ḿbé nkéré mú kpákpá.

⁵ Ké nkéré mú Óburúkpâbí o/ri byibî ḿbyí kángkáng banet ḿbé ké ejíí mbe ba-chi i, ne eringe nyí atyém ebe a/bên,

⁶ byiko byi/kpú ǎ ké ochi mú nyǐ o/chi kámbé, o-yip kámbé o-tî ké ejíí. O/chi ájângmé kanong kanong

⁷ o/fu, n/chi n-ju kángkáng banet ḿbén ḿbé n/chi, cibicibi ne enyam ne bunurung, ké nǎ, byiko mbyi byi-kpú u mě ḿbyí n/chi kámbé.

⁸ Nké kyi/mû kyi-nyîn n Óburúkpâbí dyityém ne Núwa.

Núwa

^9-10 Nyín kiǐshwô kyi-kim ne Núwa. Núwa o/mû kanong mú o/mû o*fí ne ébîn ké burwám-banet ḿbé nkéré ámu*. Nyǐ o/mû o-chi i édúú nyí e/kim ne Osówo, ne o/mû ne bwǎn-banyinchéng ashí achât, Shêm ne Hâm ne Jáfet.

¹¹ Byibî byi/mû bii/sú ké ejíí ne e/mû ee/bên ké bushú ḿbú Osówo.

¹² Osówo o/ri ejíí o-nyît o/fu, ee/bên, ké nǎ, kángkáng banet baa/bên akpen ebe.

¹³ Osówo o/sét Núwa o/fu, n-kú m-bâ eju kángkáng banet ḿbé ké ejíí. N-ju ng kámbé kángkáng, ké nǎ, ejíí ee/sú ne byibî ebe ḿbyí mbe ba-chi i.

¹⁴ Kúng byichí ḿbyí byinong a-bi ńsukyíkang mú a/chi a-nung ké mǔ. Chi banfût ké mǔ, a-sabe kámú kotá kafâ ne esim.

¹⁵ Chi kámú o-kyú bajam-bamyíta nyâchât esim diǐkpú ne bachât ké butang. Baryên emen ba-kyú bamyíta bujam ne bafee, bunyâam emen bu-kyú bamyíta diǐkpú ne bachât.

¹⁶ Cít [bubóng] emen wǎ kyise, a-chi bajep ba-rêe ké bajam-basentyímyíta bafee esim banyii, kyi-fím ké bukô-ńsukyíkang a-ribi ké mbé. Bi kámú byikim byichât wǎ enyóng, a-fé dyifyi ké bukô emen.

¹⁷ N/chi n-twóm omu mú o/chi o-na buce bu-sú bu-ju kángkáng byěm ḿbyí mbyi byi-kpen n ké ejíí. Kángkáng byěm ḿbyí mbyi ké ejíí byi/chi byi-kpú,

¹⁸ nké me n/chi n-ryí ocím ne wo. Nung ké ńsukyíkang ne onyi eyên ne bwǎn eyên ne banyi ebe.

^19-20 Enyam nang erá ne kanurung to nang kará, kúng otyép ne buma a-fé ké kafâ-ńsukyíkang ámu eringe nyí byi/chi byi-waa byikpó.

²¹ Kúng kángkáng azong-byiryíng nyí ba/chi ba-kûryí ne enyam ányi ne bunurung ámbu.

²² Núwa o/chi kángkáng byěm ḿbyí Osówo o/sét ǎ.