Jénésis 49 - Bokyi Bible

Bankuli Kyikû-Byiraa ḿbyí Jekôp

¹ Jekôp o/kó bwǎn-banyinchéng emen, o-sét kámbé o/fu, bwom m̂ kyikit kyibónge n-sét běn ńkyí kyi/chi kyi-chi běn ké nkéré mú mu o-bâ ké kashú.

² O/fu, bwǎn-Jekôp, bâ n̂g kyikit kyibónge ba-fwôo atông ba-jwo. Fwôo n̂g atông ba-jwo Ézerel mú bonchí enen.

³ Rúben mú wǎn-kashú ejí, wo nké amu busa ejí, ne wǎn-kashú mú o/tông o/fu, me n/firi onyinchéng. Wo nké adatông byiko, a-shwane e a-shwôm bwǎn ejí kángkáng.

⁴ Wo amu wǎ kace ńké kaa/sú, nké *chí wo nké a/chi a-kyú kiǐtí a-shwôm* ké nǎ, wo a/rí ne onyi ejí mú ósóng, a*da/kye karíng ńké bonchí eyên ofê*.

⁵ Syímyon ne Lyíva ba/fím ne barî. Ba-kúng ng byěm-bunwa ebe ba-kyâ bunwa.

⁶ Me mm*ba/chi n-cibi ne mbé ké booju ebe*. Nang ké bancibi ebe nn*kyú* ké nǎ, mbé ba/ju banet ké busa-dyityém, ne ba/bún bampong byiká ké acáá.

⁷ Busa-dyityém ebe buwaa ne kyishû, ké nǎ, bu/jang ebên bu-shwôm. Kyishû kyiwaa to ne kafâ esa ebe, ké nǎ, ka/jang ebên to ka-shwôm. Me n/chi n-chi kámbé ba-pwôo byiryibyiryi ké esí nyí Ézerel. N/chi m-pap kámbé ké burwám-banet ebe.

⁸ Júda, wo bwǎn-bané eyên ba/chi ba-kpee ǒ. Wo a/níbî banet-bushwôn eyên ké kyitông. Bwǎn-bané eyên ba/chi ba-tíngê kyísí ba-fé ǒ.

⁹ Júda mu wǎ ekpang nyí edaju enyam e-bwa esim ké bucim emen. Ekpang nyí edanabe e-rí kyísí, onet oo*ta kányí*.

¹⁰ Júda o/chi o-níbî ochí-butu, ne bwǎn emen kángkáng nkéré ba-kyú u batu. [Eshê e/chi e-bâ ne eyáré e-ba-kye ǎ,] e-tíngê kyísí e-fé ǎ.

¹¹ Nyǐ o-tú ng kyisu-kaanyam-atû emen ké dyisín-kyichí ńkyí kyi/nwa kyi-shwôm kángkáng. O-soo ng byídí emen ké bato ḿbé badabwam shíshét, wǎ baróng. [

¹² Achi emen a-bwam m wǎ baróng ké bato ḿbé mu o-jwáp ng, ne asháng emen nyi kpárádádát ké abî-mpong nyí mu o-jwáp ng.]

¹³ Zébélon o/chi o-kyú ké bukô-baya ḿbé baryên. Bukô-baya emen bu/chi bu-kyú dyiga ńdyí dyi/nwa, ńdyí bǎnsukyíkang. Esí emen e/chi e-jê tata e-ribi Sádon.

¹⁴ Ézaka o-shwane e wǎ kaanyam-atû ńké kadarí ké otyém-biimbam ḿbyí mbe ba-twôom m kánké ké esim.

¹⁵ Nké mu o-ri ng o/fu, kyikit ńkyí nyǐ o/kyú mu o-jáng ng nkyi kanong ne esí nyi e-nwa ng. Ne o-siring ng kyísí o-kúng dyitû emen, ba-kû ǎ etírîng o-chi i bǎmkpóngé wǎ ósóng.

¹⁶ Dǎn o/chi o-kyú otu mú banet emen. Mbé ba/chi ba-kyú wǎ byikim-banet byikíri ḿbyí Ézerel.

¹⁷ Dǎn o/chi o-kyú efyi nyí edakyú ké bukô-bukwóp, kyibî-efyi ńkyí kyiderem ké kiǐfáng e-jwóm kabyî-orá ké kyiká, ka-chi onet mú mu o-yú u kánké o-bírî o-róng.

¹⁸ Óburúkpâbí, me mu m-bám m onyii eyên.

¹⁹ Banet-kajii ba/chi ba-kye Gât bunwa, nké nyǐ o/chi o-bírî o-rim ne mbé ké kyikû.

²⁰ Esí nyí Ásha e/chi e-bát byiryíng. Nyǐ o/chi o-fuu byiryíng ḿbyí byi/kwárê ne otu. [

²¹ Nafatályi mu wǎ etong nyí edazóngê e-ca ké dyikán, nyí edafwon bwǎn ḿbé banong banong.] [

²² Josêf mu wǎ kaanyam-atû ńké ké dyikán, o-chi i kyisu-kaanyam-atû ńkyí kyidakyú kyíbóng-kaku.]

²³ Banet-bushwôn emen ba-kyâ ǎ kyibî-bunwa, ba-câ ne nyǐ ké kyikû ne báre ne abán ebe. [

²⁴ Nké búre ḿbú emen boo*náng* ne abwô emen a-kyú u shwaneshwane,] ké busa ḿbú Osówo mú Jekôp mú o/rêe o-shwôm, mú mu mbâm ebû mú mu o-ku ng Ézerel.

²⁵ Osówo mú bonchí eyên nké mu o-chwáp ng ǒ, Osówo mú o/rêe o-shwôm, mú mu o-jware ng ǒ o-kyâ ǒ omu mú mu o-fím m kyíbóng ne kyísí, mú mu o-kyâ ǒ byitú ne bwǎn chwóó,

²⁶ mú mu o-kyâ ǒ [byiryíng ne ekong-byichí,] mú mu o-kyâ ǒ [eku nyí ee*yángê*] mú mu o-kyâ ǒ byěm ḿbyí byinong ḿbyí mbyi byi-fím m ké eku nyí edawaa ne banyá. Kyi/bát banjware ḿbén batwôom ké dyishí ńdyí Josêf, ba-twôom ké dyishí ńdyí onet mú ba/cá ǎ ké burwám-bwǎn-bané emen.

²⁷ Běnjámin mu wǎ kyibî-enyam. O-ju ng enyam o-ryí i buchú ne esû.

²⁸ Ḿbén nké mbe byikû-banet diǐkpú ne byifee ḿbyí Ézerel, ne byiraa ḿbyín nké bonchí ebe o/sét kámbé ké nkéré mú o/kye bwǎn emen ejá emen nyí nkuli kyikû ne o-kpú.

Jekôp o/kpú ba-ryii ǎ.

²⁹ Ne Jekôp o-sét kâng bwǎn-banyinchéng emen o/fu, kántîk mú n-kú n-jâ n-kâm banet ejí kyísí, ryii n̂g mě ké kyikit kyibónge ne bonchí ejí ké bucim ḿbú mbu ké kyifát ńkyí Éforon mú o/fím Hyítat,

³⁰ ké Makapyíla, ké kyicê ńkyí Mámare ńkyí esû edabyí, ké esí nyí Kínan. Ébarahâm nké o/ré bucim ámbu ne kyifát ánkyi ne Éforon o/fu, kyikyú oryii.

³¹ Ányi nké ba/ryii Ébarahâm ne Sirá mú onyi emen. Ányi to nké ba/ryii Ázik ne Rebéka mú onyi emen. Ányi to nké n/ryii Lyâ.

³² Ba/ré kyifát ánkyi ne bucim ámbu ne banet ḿbé Hyítat. Ryii n̂g mě ányi.

³³ Ńdyí Jekôp o/man bwǎn emen bacê ekye, o/chîbírî o-rí sáre o-kpú.