Jénésis 46 - Bokyi Bible

Jekôp o/dim ne Kyikû Emen o-jâ Éjip

¹ Jekôp o/wuri kángkáng byěm ḿbyí o/mû ne mbyí o-dim Byíshíba o-da-chi byifen o-kye Osówo, Osówo mú Ázik mú bonchí emen.

² Osówo o-pem ne nyǐ ké burê ne buchú o-kó ǎ, Jekôp. Jekôp o-bángê.

³ Osówo o-sét ǎ o/fu, me n-chi i Osówo, Osówo mú bonchí eyên. *Dashî Éjip ece*. N/chi n-chi bwǎn eyên ba-firi kiǐtí-oshê ké oshê ámu.

⁴ Me n/chi n-ca ne wo ké kyikû a-ribi Éjip, ne n/chi m-bwa esim ne bwǎn eyên ké esí ńnyín. Josêf o/chi o-kyú ne wo nkéré mú adakpú.

⁵ Jekôp o/dim ké Byíshíba. Bwǎn emen ba-kúng ǎ ne bwǎn ebe ḿbé bwǎsíng ne banyi ebe ba-fé ké bamútu ḿbé otu mú Éjip o/twóm.

⁶ Ba-kúng byitú ebe ne byěm ebe ḿbyí ba/mû ne mbyí ké Kínan ba-dim Éjip. Jekôp o/kúng kángkáng kyikû-banet emen o-dim ne mbé Éjip,

⁷ bwǎn emen ne bwǎn ḿbé bwǎn emen ba/fwon.

⁸ Banet ḿbé kyikû-banet ńkyí Jekôp ḿbé ba/dim Éjip ne nyǐ ké kyikû ba/mû wǎn-onyinchéng emen mú mbwôp kashú, Rúben

⁹ ne bwǎn-banyinchéng emen, ne Hánok ne Pálu ne Hézoron ne Kámyi.

¹⁰ O-kúng to Syímyon ne bwǎn-banyinchéng emen, Jémwel ne Jámin ne Óhat ne Jákin ne Zóha ne Shôl mú boné emen o/fím Kínan.

¹¹ O-kúng to Lyíva ne bwǎn-banyinchéng emen, Géshon ne Kóhat ne Merári.

¹² O-kúng to Júda ne bwǎn-banyinchéng emen, Shíla ne Pérez ne Zéra. Bwǎn-banyinchéng ḿbé Júda ḿbé babónge, Êe ne Ónan ba/mû ba/kpú ké Kínan. Bwǎn-banyinchéng ḿbé Pérez ba/mû Hézoron ne Hámul.

¹³ O-kúng to Ézaka ne bwǎn-banyinchéng emen, Tóla ne Pwâ ne Jáshup ne Shímoron.

¹⁴ O-kúng to Zébélon ne bwǎn-banyinchéng emen, Séret ne Élon ne Jálel.

¹⁵ Bwǎn ḿbén nké Lyâ o/fwon ne Jekôp ké Mesopotémya, cibicibi ne Dyímina mú wǎn emen mú onyinyi. Bwǎn ḿbé Lyâ kángkáng ba/mû bujam esim diǐkpú ne bachât.

¹⁶ O-kúng to Gât ne bwǎn-banyinchéng emen, Zéfon ne Hágyi ne Shúnyi ne Ézobon ne Erí ne Árot ne Arélyi.

¹⁷ O-kúng to Ásha ne bwǎn-banyinchéng emen, Émana ne Eshíba ne Eshíbyi ne Beryâ ne Será mú wǎn-boné ebe mú onyinyi. Bwǎn-banyinchéng ḿbé Beryâ ba/mû Hébe ne Makyêl.

¹⁸ Ḿbén ashí onyiryiká ne din ba/mû bwǎn ḿbé Jekôp o/fwon ne Zípa mú wǎn-ósóng-onyinyi mú Lában o/kye Lyâ mú wǎn emen mú onyinyi.

¹⁹ Ríchel mú onyi-Jekôp o/fwon ǎ bwǎn-banyinchéng ashí afee, Josêf ne Běnjámin.

²⁰ Ké Éjip, Josêf o/fwon bwǎn-banyinchéng ashí afee, Manáse ne Éferem ne onyi emen Asénat mú wǎn-Potyiféra, mú o/mû nchi kyifen ké Helópólis.

²¹ Bwǎn-banyinchéng ḿbé Běnjámin ba/mû Béla ne Béke ne Ashíbel ne Géra ne Náman ne Ehyí ne Róshi ne Múpim ne Húpim ne Árat.

²² Ḿbén ashí diǐkpú ne anyii ba/mû bwǎn ḿbé Jekôp o/fwon ne Ríchel.

²³ O-kúng to Dǎn ne wǎn-onyinchéng emen, Húshim.

²⁴ O-kúng to Nafatályi ne bwǎn-banyinchéng emen, Jázêl ne Gúnyi ne Jéza ne Shílem.

²⁵ Ḿbén ashí káchâtkányi ba/mû bwǎn ḿbé Jekôp o/fwon ne Byíla mú wǎn-ósóng-onyinyi mú Lában o/kye Ríchel mú wǎn emen mú onyinyi.

²⁶ Bwǎn ḿbé Jekôp oyén ḿbé ba/dim Éjip ne nyǐ ké kyikû ba/mû bajam bachât esim nyâchât, banyi ḿbé bwǎn emen ba*fí ké kafâ*.

²⁷ Josêf o/mû o/fwon bwǎn bafee ké Éjip, ne â a/yip a-cibi, bwǎn ba-firi ng bajam bachât esim diǐkpú ḿbé kyikû-banet ńkyí Jekôp ḿbé ba/jé Éjip.

Jekôp ne Kyikû-Banet Emen ké Éjip.

²⁸ Jekôp o/twóm Júda o-bwóp ǎ kashú o/fu, oda-sét Josêf o-kâm kámbé ké Góshen. Ńdyí ba/ribi,

²⁹ Josêf o/nung ké mútu emen mú bubyî-orá budatut o-dim Góshen ne bonchí edakwárê. Ńdyí ba/kâm barî, Josêf o/kpárê bonchí abwô o-tii ka-bwon!

³⁰ Jekôp o-sét Josêf o/fu, mm/kpá byiko ḿbyí ndakpú kántîk mú nn/ri ǒ, n-nyît n/fu, wo a/tôong okpó.

³¹ Ne Josêf o-sét bwǎn-bané emen ne kángkáng kyikû-banet ńkyí bonchí o/fu, m-man n-ca n-da-sét otu n/fu, bwǎn-bané ejí ne kángkáng kyikû-banet ńkyí bonchí ejí, ḿbé ba/mû ba-kyú u ké Kínan, baa/bê ba-kâm mě.

³² N/chi n-sét ǎ n/fu, ben ba-chi i bambâm ebû mú bamu ba-bám m byitú, ne baa/bê ne byitú enen ne kángkáng byěm byikíri ḿbyí bamu ne mbyí.

³³ Â otu o/kó běn o-bí běn dyizong-ḿkpóngé ńdyí bamu ba-chi i,

³⁴ sét n̂g ǎ ba/fu, ben ké akpen enen kángkáng bamu ba-bám m byitú wǎ eringe nyí banchí enen ḿbé kpákpá ba/mû ba-bám m. Ké bukwóp ḿbún, o/chi o-bángê běn ba-kyú ké kyikim-esí ńkyí Góshen. Josêf o/sét ńkyín, ké nǎ, banet ḿbé Éjip ba-ciring ng bambâm ebû.