Jénésis 41 - Bokyi Bible

Josêf o/sét Kyikû-Burê ḿbú Otu o/ri

¹ Ńdyí kii/shwôm aje afee, otu mú Éjip o/ri burê ké o/bwom ké bukô-kace ńké badakó Nâl,

² o-ri bampong ḿbé baryên baryên káchâtkányi ké ba/byí ké kafâ-kace ba-kpet biǐbyâa eryí.

³ Ne bampong bakíri káchâtkányi, ḿbé baa/sé ké byiko, ba/firi byikúú byíkuu, ba-byí to ba-ba-bwom ké bakô-bampong ḿbé kashú.

⁴ Bampong ḿbé boǒsísé ámbe ba-ryí bampong ḿbé baryên baryên. Ne otu o-jwóbê ké burê.

⁵ O-chîróng ké burê, ne o/chîri burê bukíri. O/ri ké biincicôk-esang-byichí káchâtkányi nyí ee/bwam ké dyisín-kyichí dyibónge.

⁶ O-ri to biincicôk-esang-byichí nyí boǒníngéníngê nyí ee/jwóm afú, nyí kyikim-dyikán ké e/zím to ké dyisín-kyichí dyibónge.

⁷ Ne boǒsáng-byichí ḿbú jwómjwóm bu-myii nyí eryên eryên. Otu o-jwóbê ne o-nyît o/fu, nyǐ o/mû o-ri ng burê.

⁸ Ńdyí o/jwóbê nencófóróng, dyityém emen dyi*fí ǎ to kanong* ne o-twóm ba-kó kángkáng banchi bambirirím ne bannyît byinyídíng ḿbé ké Éjip. O-kúng barê emen ḿbé o/ri o-sét kámbé, nké onet nang obónge o*fí mú o/man ǎ esét eringe nyí ba/byí*.

⁹ Ne ḿgbán-otu mú mu o-fâ bato ḿbé otu ámu o-sét otu o/fu, m-man n-sét gbúúl kurún n/fu, nn/chi kyibî.

¹⁰ Kafâ ka/mû ka/sa ǒ ne onet-dyishí-banchi berêt ne me, ne a-kúng bě a-fé ké mgbokobá, ké kyise ńkyí onet-dyishí-basúja ḿbé kyibám-otu.

¹¹ Buchú bubónge, be ashí amúmú byi/ri burê, nang yeě nang yeě o/ri dyizong ńdyí emen cát.

¹² Wǎn-kyisat mú onet-Hyíburu, mú ósóng mú onet-dyishí-basúja ḿbé ké kyibám o/mû ne be. Byi/sét ǎ barê eten, ne o-sét bě eringe nyí ba/byí.

¹³ Byěm byi/chi kerededet wǎ eringe nyí o/sét. Wo a/bwa ne me esim ké kyikit-bǎmkpóngé ejí, a-ju mú nchi berêt.

¹⁴ Otu o-twóm o/fu, babâ ne Josêf, ne ba-da-fîm ǎ ochéé óchee ké mgbokobá. Ńdyí oo/kwárê kyiti o-yángê byídí, o/bê o-ba-bwom ké bushú ḿbú otu.

¹⁵ Otu o-sét ǎ o/fu, me n/ri burê, nké onet o*fí mú mu o-man n mě esét kyikû emen*. Baa/sét mě ba/fu, wo a-man n esét eringe nyí barê ba/byí.

¹⁶ Josêf o-faa o/fu, átá-otu, me mm*man esét* nké Osówo o/chi o-sét kyikû emen eringe nyí kyi/kwárê.

¹⁷ Otu o-sét ǎ o/fu, me n/ri burê ké m/bwom ké bukô-kace ńké Nâl,

¹⁸ ne n-ri bampong ḿbé baryên baryên káchâtkányi ké ba/byí ké kafâ-kace ba-kpet biǐbyâa eryí.

¹⁹ Ne bampong bakíri káchâtkányi ḿbé ba/mû sésé, byikúú byíkuu ba-byí to. Bampong ámbe ba/mû ba/sîi ké byiko ba-shwôm kángkáng bampong ḿbé me nn/ri ké Éjip.

²⁰ Bampong ḿbé boǒsîisîi ámbe ba/ryí ḿbé baryên baryên.

²¹ Nké onet oo*man enyît o/fu, ba/ryí nang chwǒm* ké nǎ, ba/waa eringe ebónge wǎ ba*da/ryí chwǒm*. Ne n-jwóbê.

²² N/ri to burê ké n/ri biincicôk-esang-byichí káchâtkányi nyí ee/bwam ké e/zím ké dyisín-kyichí dyibónge.

²³ N-ri to biincicôk-boǒsáng-byichí káchâtkányi ḿbú boo/jwóm afú nyí kyikim-dyikán ké bu/byí to,

²⁴ ne boǒsáng ḿbú boǒjínjwóm ámbu bu-myii esang nyí eryên eryên. Nn/sét banchi bambirirím barê ḿbén, nké onet o*fí mú o/man mě esét kyikû*.

²⁵ Josêf o-sét otu o/fu, barê ámbe bafee ba/byí eringe ebónge. Osówo oo/sét ǒ ńkyí nyǐ mu o-bâ ebachi.

²⁶ Bampong ámbe ḿbé baryên baryên káchâtkányi ne esang-byichí nyí eryên byi/bwom ké aje káchâtkányi. Mbyí byi/byí eringe ebónge.

²⁷ Bampong ḿbé sésé káchâtkányi ḿbé ba/byí ké nkuli kyikû ba-ba-bwom ne boǒsáng-byichí ḿbú boo/jwóm afú byi/bwom ké aje to káchâtkányi nyí esong e/chi e-róng.

²⁸ Nkyi wǎ eringe nyí me n/sét ǒ, n/fu, Osówo oo/tông ǒ ńkyí nyǐ mu o-bâ ebachi.

²⁹ Aje a/chi a-kyú káchâtkányi nyí byiryíng byi/chi byi-jê ké kángkáng esí nyí Éjip.

³⁰ Â aje ńnyín a/shwôm, aje akíri káchâtkányi a/chi a-bâ nyí esong e/chi e-róng, ne banet ba/chi ba-ráp kángkáng aje nyí byiryíng byi/mû chwóó ké esong ányi nyí e/chi e-fé oshê omúmú ké busông.

³¹ Ba/chi ba-ráp kángkáng kyi-kim ne nkéré mú byiryíng byi/mû chwóó, ké nǎ, esong nyí e/chi e-róng e/chi e-jê kanong kanong.

³² Burê ḿbú a/ri éné kafee kyi/tông kyi/fu, Osówo nké oo/tî chwǒm ánkyi ne o/chi o-chi kánkyí kyi-chi ké nkéré mú mu o-bâ ké kashú.

³³ Fîm onet kántîk mú mu ne byinyídíng ne bubong o-kyú ǒ onet-dyishí-oshê.

³⁴ A-man a-fîm to banet-ashí bakíri ḿbé ba/chi ba-cen ba-koo dyizu-byiryíng dyibónge ké azu atánge, ḿbyí ba/chi ba-fuu ké aje ńnyín káchâtkányi nyí byiryíng byi/chi byi-jê.

³⁵ Kye kámbé busa ḿbú badakoo kángkáng byiryíng ḿbyín ké aje ńnyín káchâtkányi nyí byiryíng byi/chi byi-jê, a-kye to kámbé busa ḿbú badakúng esang-byichí ba-tî ké eshê ké eshê, ba-kûbám kányí.

³⁶ Byiryíng ámbyi byi/chi byi-chwáp oshê omúmú ké nkéré mú aje-esong ányi káchâtkányi nyí esong e/chi e-róng ké Éjip. Â a/chi éné, banet eyên baa*ba/chi ba-kpú esong*.

Ba/chi Josêf Onet-Dyishí mú Éjip

³⁷ Otu ne banet-ashí-bǎmkpóngé emen ba/bángê ké ńkyí Josêf o/sét,

³⁸ ne otu o-raa ne mbé o/fu, bii*man to eri onet okíri mú o/kwárê o-shwôm Josêf* onet mú Busun-Osówo mbu ǎ ké byiko.

³⁹ Ne otu ámu o-raa ne Josêf o/fu, Osówo oo/tông ǒ wo ḿbyín kángkáng, ké bubwô ámbu, be byimu byi-nyît ng ké ntûntû byi/fu, wo amu ne bubong a-shwôm nang yeě nang yeě mú mu nyín.

⁴⁰ Me n/chi n-chi ǒ onet-dyishí mú oshê ejí ne kángkáng banet ba/chi ba-chi ńkyí wo adasét kámbé. Me kǎnchí nké n/chi n-jê ne busa n-shwôm ǒ.

⁴¹ Kántîk, me nn/chi ǒ onet-dyishí mú Éjip emúmú.

⁴² Otu ámu o-zú ókpâl mú ba/fé ekap-butu emen ké mǔ ké kafwa emen o-fé Josêf ké kafwa. O-fé ǎ byídí ḿbyí byinong byinong ké byiko ne kaǎré-kyitông-gûl ké kyitông.

⁴³ O-kye ǎ nnyinyěng-mútu-otu mú bubyî-orá budatut, o/fu, okûyú. O-kye banet-mbâm ḿbé bada ǎ ekûce kashú ba-raa ng ba-câ ba/fu, kye n̂g mpât, kye n̂g mpât. Ne otu ámu kâng o-chi Josêf onet-dyishí mú Éjip emúmú,

⁴⁴ o-sét ǎ o/fu, me nké mu otu. Onet o*fí ké Éjip emúmú* mú o/chi o-yip bubwô nang kyiká emen kyibónge* â wo a*da/kye busa*.

^45-46 O-fé Josêf dyizîn ńdyí Éjip, ńdyí badakó Záfénat-Panyá, ne o-kye ǎ onyi mú odabángê Asénat, mú wǎn-Potyiféra, mú o/mû nchi kyifen ké oshê mú Helópólis. Josêf o/mû oo/rí aje bujam esim diǐkpú ké nkéré mú o/kpet ekyú ḿgbán mú otu mú Éjip. Josêf o/mîng kyibám ńkyí otu o-cen ké esí nyí Éjip emúmú.

⁴⁷ Ké aje káchâtkányi nyí byiryíng byi/mû, byifát byi/bát byiryíng chwóó,

⁴⁸ ḿbyí Josêf o/kúng kámbyí kángkáng o-tî ké oshê ké oshê. O/kúng byiryíng ḿbyí oshê nang orá o-tî ké oshê ámu.

⁴⁹ Byiryíng byi/mû byi/jê chwóó ḿbyí Josêf o/mîng kámbyí ekan. Byi/mû wǎ éshíshě nyí edakyú ké bukô-baya.

⁵⁰ Ne aje nyí esong a-kûfyi, Josêf o/fwon bwǎn-banyinchéng bafee ne Asénat,

⁵¹ ne o-raa o/fu, Osówo oo/chi mě n-ráp kángkáng afaníkong ejí ne kángkáng kyikû-banet ńkyí bonchí ejí. Ne o-fé wǎn emen mú mbwôp kashú dyizîn, Manáse.

⁵² O-chîraa to o/fu, Osówo oo/kye mě bwǎn ké esí nyí afaníkong ejí. Ne o-fé nnyinyěng-wǎn emen dyizîn, Éferem.

⁵³ Aje káchâtkányi nyí esí nyí Éjip e/mû ne byiryíng chwóó a/baman,

⁵⁴ ne aje káchâtkányi nyí esong a-kpet, wǎ eringe nyí Josêf o/mû o/sét. Esong e/róng ké eshê nyí áku kángkáng, nké Éjip emúmú e/mû ne byiryíng.

⁵⁵ Â esong e-kú e-nwa ng banet ḿbé Éjip, ba-tii ba-kó otu ba/fu, okye kámbé byiryíng. Otu o-sét kámbé o/fu, baca ba-kâm Josêf ba-da-chi ńkyí odasét kámbé.

⁵⁶ Esong e-yógê e-káng oshê omúmú, ne Josêf o-bâa kâng byikit ḿbyí ba/tî byiryíng o-kúng kámbyí o-shee banet-Éjip.

⁵⁷ Banet ba/fím ké ejíí emúmú ba-bâ ké Éjip byiryíng ebaré ne Josêf, ké nǎ, esong e/mû nyi e-nwa ng kángkáng byikit kanong kanong.