Jénésis 40 - Bokyi Bible

Josêf o/sét Burê ḿbú Banet-Mgbokobá ba/ri

¹ Ńdyí ka/chîrí, ḿgbán-otu mú Éjip, mú o/mû o-fâ bato ḿbé otu, ne mú obónge to, mú o/mû onet-dyishí mú banchi berêt, ba/chi chwǒm ńkyí kyi*da/nyîn otu*.

² Kafâ ka-sa otu ne bǎmgbán emen ámbe bafee,

³ ne o-fé kámbé ké mgbokobá, ké kyise ńkyí onet-dyishí-basúja ḿbé ké kyibám-otu, ńkyí ba/mû ba/tî to Josêf.

⁴ Mbé ba/rí chwóó ké mgbokobá, ne onet-dyishí ámu o/tî Josêf wǎ ḿgbán ebe.

⁵ Buchú bubónge, bǎmgbán-otu ámbe, mú o/mû o-fâ bato ne mú o/mû onet-dyishí-banchi berêt, ba/ri burê. Onet ne onet o/ri burê ḿbú emen, ne barê ámbe ba/mû ba*da/byí eringe ebónge*.

⁶ Ńdyí Josêf o/bê o-kâm kámbé ké dyicófóróng, o/ri o/fu, bashú ebe ba*fí kanong*.

⁷ O-bí kámbé o/fu, ebóng ben bamu éné dííng kurún.

⁸ Mbé ba-faa ǎ ba/fu, be ashí amúmú byi/ri burê, nké onet o*fí nyín mú oda bě esét eringe nyí barê eten ba/byí*. Josêf o-sét kámbé o/fu, Osówo nké mu o-kyâ onet busa ḿbú odaman esét eringe nyí burê bu/byí. Sét n̂g mě barê enen.

⁹ Ḿgbán mú o/mû o-fâ bato o-sét ǎ o/fu, ké burê ejí, kyichí ńkyí badachi bato ké byirim emen kyi/bwom mě ké bushú,

¹⁰ ne byire byichât. Ńdyí eshǎan e-byí i e-bâ, kyi/zím byirim, byi-waa ányi byi-kán.

¹¹ Me m/mû n/níbî mmîk mú otu, ne n/kúng byirim emen n-nwárê n-fé ké mmîk ámu n-kye otu.

¹² Josêf o-sét o/fu, burê eyên bu/byí něen. Byire-byichí ámbyi byichât byi/bwom ké ací achât.

¹³ Ké ací achât kurún, otu o/chi o-fîm ǒ ké mgbokobá o-pwoo ǒ, o-bwa ne wo ké kyikit-bǎmkpóngé eyên. Wo a/chi a-kye ǎ mmîk emen wǎ eringe nyí a/mû a-kyâ ǎ, ké nkéré mú a/mû ḿgbán-bato emen.

¹⁴ Nké kamgbe, zîim mě ké nkéré byěm byi-kú byi-câ kanong ne wo, a-pem otu kyi-kim ne me, a-chwáp mě ba-fîm mě ké mgbokobá mún.

¹⁵ Me ba/kám mě ké esí nyí banet-Hyíburu, ne nyín ké Éjip n*da/chi chwǒm ńkyí bada mě efé ké mgbokobá*.

¹⁶ Ńdyí onet-dyishí-banchi berêt o/ri o/fu, dyishí-burê ḿbú onet-dyishí-bato dyi/nwa, o/sét Josêf o/fu, me to n/ri burê. M/mû n/tû bookye-berêt buchât ké dyishí.

¹⁷ Kaakye ńké ka/bwa kyíbóng kyíbóng ka/mû ne kángkáng azong-byiryíng nyí baa/ká, nyí otu odaryí, ne bunurung bu/mû mbu bu-ryí i kámbyí.

¹⁸ Josêf o-faa o/fu, burê eyên bu/byí něen. Bookye ámbu buchât bu/bwom ké ací achât.

¹⁹ Ké ací achât, otu o/chi o-fîm ǒ ké mgbokobá, o-ju ǒ. O/chi o-kúng kyikwóm-enyam-byiko eyên o-kpong ké kyikwap, ne bunurung bu/chi bu-ryí enyam eyên.

²⁰ Ńdyí ací a/chîrí achât, otu o/mû o/zîim dyicí ńdyí ba/mû ba/fwon ǎ, ne o-kó kángkáng banet-ashí-bǎmkpóngé emen dyijî. O-fîm ḿgbán-bato emen ne onet-dyishí-banchi berêt ba-byí ké mgbokobá ba-ba-bwom ké bushú-banet-ashí-bǎmkpóngé emen.

²¹ O-bwa ne ḿgbán-bato kyikit-bǎmkpóngé emen,

²² nké o/ju mú o/mû onet-dyishí-banchi berêt. Byěm ámbyi byi/chi kerededet wǎ eringe nyí Josêf o/mû o/sét.

²³ Nké mú ḿgbán-bato ámu o*da/chîzîim Josêf*. O/ráp kángkáng kyi-kim ne nyǐ.