Jénésis 39 - Bokyi Bible

Josêf ne Onyi-Pótyífa

¹ Banet ḿbé Éshimal ba/kúng Josêf ba-ca ne nyǐ ké Éjip, ba-da-kúng ǎ ba-shee Pótyífa mú o/mû onet-dyishí-basúja ḿbé ké kyibám-otu.

² Óburúkpâbí o/mû ne Josêf ké kyikû, ne o/chi ǎ o-firi kiǐtí-onet. Josêf o/mû o-kyú u ké kyise ńkyí bonchí emen mú ké Éjip,

³ mú o/ri o/fu, Óburúkpâbí o/mû ne nyǐ ké kyikû ne nang ebóng chwǒm ńkyí Josêf o/chi kyi-kyú u kanong.

⁴ Josêf o/mû o-nyîn n Pótyífa, ne o-chi ǎ o-firi ḿgbán mú emen nyǐ oyén, o-chi ǎ onet-dyishí mú kyise emen ne kángkáng byěm ḿbyí o/mû ne mbyí.

⁵ Kyi-fím ké nkéré ámu kyi-ca kashú, ké bubwô ḿbú Josêf, Óburúkpâbí o/jware kyise kyimúmú ńkyí onyinchéng-Éjip ámu ne kángkáng byěm ḿbyí o/mû ne mbyí ne byifát emen.

⁶ Pótyífa o-kúng kángkáng byěm ḿbyí o/mû ne mbyí o-kye Josêf o/fu, okû-tún, ne o*da/chîkérê kyi-kim ne chwǒm kyikíri* kyi-cibi ne byiryíng ḿbyí odaryí*. Josêf o/mû o-nwa ng kyisat, o*fí ne dyikpât*

⁷ ne ké kaǎnyín-nkéré, o-kpet ejê onyi mú bonchí emen, mú o/kpet ebí Josêf o/fu, orí ne nyǐ.

⁸ Josêf o-né, o-raa ne nyǐ o/fu, bonchí ejí o*fí to o-kérê ng kyi-kim nang chwǒm kyibónge ńkyí nkyi ké kyise* ké nǎ, me mu nyín. Oo/tî mě onet-dyishí mú kángkáng byěm ḿbyí mu ne mbyí.

⁹ Me mu ne busa jangjang ne nyǐ ké kyise ńkyín ne o*da mě etî chwǒm nang kyibónge ké esim* kyi-cibi ne wo*. Me n-cen n nǎ kâng ne n-chi dyizong-kyibî ńkyín m-bât Osówo.

¹⁰ Nang ké o/kye Josêf afaníkong kángkáng dyicí, Josêf o*da/rí ne nyǐ*.

¹¹ Nké dyicí dyibónge, ńdyí Josêf mu ké kafâ-kyise o-chi i bǎmkpóngé emen, ḿgbán-kyise nang obónge o/mû o*fí*.

¹² Onyi-bonchí emen ámu o/da ǎ eníbî ké kyídí o/fu, rí ne me. Nké Josêf o/chêe o-byí kyíjí, o-mîng ǎ ne kyídí ké bubwô.

¹³ Ńdyí o/ri o/fu, Josêf oo/chêe o-byí kyíjí, o-mîng ǎ ne kyídí ké bubwô,

¹⁴ o/kó bǎmgbán-kyise emen o/fu, kan n̂ achi ba-ri. Wǎn-Hyíburu mún, mú otyép ejí o/ré o-bâ ne nyǐ ké kyise mu o-kyâ bě edángé. O/bê ké nfût ejí o/fu, nyǐ o-bam m mě o-rí ne me, nké n/wonge kakânkakân.

¹⁵ Ńdyí n/wonge nké o/byí ne ochéé o-mîng mě ne kyídí ńkyín.

¹⁶ O-tî kyídí ánkyi tete bonchí-Josêf o-fyi,

¹⁷ ne o-kúng kiǐshwô ánkyi kyibónge o-sét ǎ, o/fu, wǎn-Hyíburu ámu mú a/bê ne nyǐ o/banung ké nfût ejí o-kye mě edángé.

¹⁸ Nké ńdyí n/wonge, o/byí ne ochéé o-mîng mě ne kyídí emen ńkyín.

¹⁹ Kafâ ka-bírî bonchí-Josêf,

²⁰ o-kám Josêf o-fé ké kyise-mgbokobá ńkyí mbe ba-fâ bamgbokobá ḿbé otu. Josêf o-waa áku.

²¹ Nké Óburúkpâbí o/mû ne Josêf ké kyikû, ne o-jware ǎ, o-kpet ejê onet-dyishí-bamgbokobá.

²² O-kúng Josêf o-tî ǎ onet-dyishí mú bamgbokobá ḿbé áku kángkáng, o/fu, okûri kyi-kim ne kángkáng byěm ḿbyí mbyi byi-chi i ké kyibám-mgbokobá.

²³ Onet-dyishí-bamgbokobá ámu o*da/chîtî achi ké chwǒm nang kyibónge* ńkyí Josêf o/mû onet-dyishí* ké nǎ, Óburúkpâbí o/mû ne nyǐ, ne o/chi kángkáng byěm emen byi-ca kanong.