Jénésis 37 - Bokyi Bible

Josêf ne Bwǎn-Bané Emen.

¹ Jekôp o/kyú o-ca kashú ké esí nyí Kínan, nyí bonchí emen o/mû o/kyú,

² ne nyín něen kiǐshwô kyi-kim ne kyikû-banet ńkyí Jekôp. Josêf, mú o/mû oo/rí aje onyiryiká ne afee, o/mû o-bám m ebû nyí bonchí ne bwǎn-bané emen ḿbé bwǎn-Byíla ne Zípa, ḿbé ba/mû banyi-bonchí emen ḿbé básóng. Josêf o/mû o-bâ ng esét bonchí emen kyi-kim ne byibî-byěm ḿbyí bwǎn-bané emen ba/mû ba-chi i.

³ Josêf o/mû o-jê ng bonchí o-shwôm bwǎn emen ḿbé áku kángkáng, ké nǎ, bonchí o/fwon ǎ ké nkéré mú oo/kâa. Bonchí o/zim ǎ [nkyû mú abwô atangatang.]

⁴ Ńdyí bwǎn-bané emen ḿbé áku ba/ri ba/fu, Josêf o-jê ng bonchí ebe o-shwôm kámbé, kafâ ka-kpet esa kámbé ne Josêf, ba-kpet eraa byibî-byiraa ne nyǐ.

⁵ Buchú bubónge, Josêf o/ri burê, ne ńdyí o/kúng burê ámbu o-sét bwǎn-bané emen, mbé ba-kpet esa kafâ ba-shwôm oshwǒm ne nyǐ.

⁶ Josêf o/sét kámbé o/fu, kû n̂g ejwo burê ḿbú me n/ri.

⁷ Be ashí kángkáng byi/mû ké kyifát byi-bwá ng byiryíng ḿbyí baa/fuu ké akan ké akan. Bukan ḿbú ejí bu-bûu bu-bwom cip. Akan nyí enen a-bwom kerékeré a-fé ḿbú ejí ké otyém, a-tíngê kyísí a-fé kámbú.

⁸ Bwǎn-bané emen ba-bí ǎ ba/fu, wo a/kabe a/fu, wo a/chi a-kyú otu? be byi-kyú ké bubwô eyên? Ne ba-kpet ǎ eciring ba-shwôm oshwǒm, kyi-kim ne barê emen ḿbé mu o-ri ng, ne ńkyí Josêf o/sét kyi-kim ne mbé.

⁹ Ne Josêf o-chîri burê bukíri, o-chîsét bwǎn-bané emen o/fu, me n/chîri burê bukíri ḿbú n/ri óbyísû ne otukáku ne ékpére diǐkpú ne din ké byi/tíngê kyísí ké bushú ejí.

¹⁰ O/sét to bonchí emen burê ámbu, ne bonchí emen o-nyán ǎ o/fu, ebóng dyizong-burê éné. Wo a/kabe a/fu, boné eyên ne bwǎn-bané eyên ne me byi/chi byi-bâ byi-ba-tíngê kyísí byi-fé ǒ?

¹¹ Orêm o-kpet echi bwǎn-bané-Josêf, nké bonchí o/mû mu o-kabe ng kángkáng nkéré kyi-kim ne burê ámbu.

Ba/shee Josêf ba-kúng ǎ ba-dim ne Nyǐ Éjip

¹² Dyicí dyibónge, ńdyí bwǎn-bané-Josêf baa/dim Shékem ebû nyí bonchí ebe edanen,

¹³ Jekôp o/sét Josêf o/fu, mu n-ryuu ng n/fu, ca Shékem ké kyikit ńkyí bwǎn-bané eyên mbe ba-tún n ebû. Josêf o-faa o/fu, me mm/kpá byiko.

¹⁴ Bonchí o-sét ǎ o/fu, ca a-da-ri â bwǎn-bané eyên ne byitú ḿbyí mbe ba-tún n mbe kanong, a-bwa esim a-ba-sét mě. Ne bonchí o-bwom ké owo mú Héboron, o-twóm ǎ o-dim. Josêf o/daribi ké Shékem

¹⁵ mu o-jóp ng o-câ ké dyikán tete onyinchéng obónge o-ri ǎ, ne o-bí ǎ o/fu, wo amu a-kyé ng ebóng.

¹⁶ Josêf o-faa ǎ o/fu, mu n-kyé ng bwǎn-bané ejí ḿbé mbe ba-tún n ebû. A-man n mě esét kyikit ńkyí mbe?

¹⁷ Onyinchéng ámu o-sét ǎ o/fu, baa/dim nyín. N/jwo kámbé ké mbe ba-raa ng ba/fu, mbé ba-câ Dótan. Ne Josêf o-dim o-kyé ng bwǎn-bané emen o-câ ne o-da-ri kámbé ké Dótan.

¹⁸ Bwǎn-bané emen ba/bwom tíbítíbí ba-ri ǎ, ne ne o-kûkâm kámbé, ba/cibi ba/fu, mbé ba-ju ng ǎ.

¹⁹ Ba-raa ne barî ba/fu, nri barê o-kú o-bâ.

²⁰ Bâ n̂g byi-ju ǎ, byi-yip ǎ byi-twóp ké kafâ-dyibíng-omu dyibónge ńdyí dyi*fí ne omu*. Byi-man n esét byi/fu, kyibî-enyam kii/ju ǎ. Byi/chi byi-ri ńkyí barê emen badachi.

²¹ Rúben o/jwo kámbé, ne o-kan o/fu, nyǐ o-nyii ng Josêf, o/fu, byi*dachi byi-ju ǎ*.

²² *Da n̂g ǎ eju ojǔng* yip n̂g ǎ ba-twóp ké kafâ-dyibíng-omu ńdyín ké dyikán. Nyǐ o/sét kámbé okabe mún eringe nyí odanyii Josêf, o-twóm ǎ o-bwa esim o-kâm bonchí.

²³ Ké nkéré mú Josêf o/kâm bwǎn-bané emen, mbé ba/níbî ǎ, ba-pii ǎ [nkyû emen ámu.]

²⁴ Ba-yip ǎ ba-twóp ké kafâ-dyibíng-omu ńdyí dyi*fí ne omu*.

²⁵ Ńdyí ba-kú ba-ryí i byiryíng, ba/bírî achi ba-ri banet-Éshimal ḿbé ba/fím Gyílet mbe ba-wâa ng Éjip. Boonyam-atû ebe bu/mû bu/tû atû nyí ba/fé burwan.

²⁶ Júda o-bí bwǎn-bané emen o/fu, ebóng mpún mú byidaryí â byi/ju wǎn-boné eten mún byi-cít kánkyí.

²⁷ Bâ n̂g byi-yip ǎ byi-shee banet-Éshimal ḿbén. Â byi/chi éné, bii*ba/chi byi-ju ǎ* ké nǎ, o-chi i wǎn-boné eten ne baróng eten. Bwǎn-bané emen ba-bángê ne nyǐ,

²⁸ ne ńdyí bancen kasî ḿbé ba/fím Médyan ba/baribi, [bwǎn-bané emen] ba/fîm Josêf ké kafâ-dyibíng-omu ba-kúng ǎ ba-shee banet-Éshimal ké bajam-akpuga-syílyíba bafee. Banet ámbe ba-kúng Josêf ba-dim ne nyǐ Éjip.

²⁹ Ńdyí Rúben o/bwa esim ké dyibíng-omu ándyi o-ba-ri o/fu, Josêf o*fí to ké kafâ* o/ját byídí emen ké byiko ké bafip.

³⁰ O-bwa esim o-kâm bwǎn-bané emen o/fu, mú wǎsíng o*fí to ké kafâ-dyibíng-omu*. Me n-chi i nǎ.

³¹ Ne ba-tî ebû ba-ju, ba-yip nkyû ámu mú Josêf ba-lip ké baróng-ebû ányi.

³² Ba-kúng nkyû ámu ba-ca ne mǔ kyikit-bonchí, ba-sét ǎ ba/fu, be byi/bajá nkyû mún. Mú wǎn eyên?

³³ Bonchí o-cêe kámú, o-bángê o/fu, âa, mú wǎn ejí. Kyibî-enyam kii/ju ǎ. Enyam ee/ját Josêf mú wǎn ejí boǒcê boǒcê.

³⁴ Jekôp o-ját byídí emen ké byiko ké bafip, o-yip ḿbyí dyikán eta o-fé. O-ta dyikán ńdyí wǎn emen ka-rí!

³⁵ Kángkáng bwǎn emen ḿbé banyinchéng ne ḿbé banyinyi ba/bê ǎ dyityém efé, ba-sét ǎ ba/fu, oo/ta dyikán ka-kwárê. Nké nyǐ o/né o/fu, n-ta ng dyikán ńdyí wǎn ejí tete m-kpú. Ne o-wâa o-ta ng dyikán ńdyí Josêf mú wǎn emen o-câ.

³⁶ Banet ḿbé ba/fím Médyan ámbe ba/kúng Josêf ba-shee Pótyífa mú onet-dyishí-basúja obónge, mú otu mú Éjip. Nyǐ o/mû onet-dyishí mú basúja ḿbé ké kyibám-butu.