Jénésis 31 - Bokyi Bible

Jekôp o/chêe o-mîng Lában

¹ Jekôp o/jwo ba/fu, bwǎn-Lában mbe ba-raa ng ba/fu, Jekôp oo/koo kángkáng byěm ḿbyí bonchí eten. Efang emen kángkáng e/fím ké byěm ḿbyí bonchí eten o/mû ne mbyí.

² Jekôp o/ri to o/fu, Lában o*fí to o-tî ng ǎ kanong kanong wǎ nkéré mú kashú*.

³ Ne Óburúkpâbí o-raa ne Jekôp o/fu, bwa esim ké esí nyí banchí eyên a-kâm bwǎn-bané eyên. Me n/chi n-kyú ne wo.

⁴ Ne Jekôp o-twóm kyitwóm kyi-kâm Ríchel ne Lyâ o/fu, bakâm ǎ ké kyifát ńkyí byitú emen byi/mû.

⁵ O-sét kámbé o/fu, bonchí enen o*fí to kanong ne me wǎ nkéré o/mû ké kashú*. Nké Osówo mú bonchí ejí mu ne me ké kyikû.

⁶ Ben ashí amúmú bamu ba-nyît ng ba/fu, me nn/chi bonchí enen bǎmkpóngé ne busa ejí kángkáng.

⁷ Nké nyǐ oo/ryí mě mpún, o-yángê akpuga-otukáku nyí o/mû o/chi o-kye mě kampén diǐkpú. Nké Osówo o*da ǎ ebángê o-némê mě*.

⁸ Nang nkéré orá nké Lában o/fu, ebû nyí nyi ne biimpyimpyam-byibît e/chi e-kyú nyí eyên, kángkáng ebû e-fwon n bwǎn ne biimpyimpyam-byibît. Â o/raa o/fu, ebû nyí nyi ne biimpyimpyam-basáng ké byiko e/chi e-firi nyí eyên, kángkáng ebû e-fwon n bwǎn ne biimpyimpyam-basáng ké byiko.

⁹ Osówo oo/koo byitú ké abwô nyí bonchí enen o-kye mě.

¹⁰ Ké nkéré mú ebû nyi e-fwon n, me n/ri burê n-ri n/fu, etúbû nyí e/mû e-rí i ne bama e/mû ne biimpyimpyam-byibît ne basáng ké byiko.

¹¹ Orím mú onong mú Osówo o/kó mě ké burê ámbu o/fu, Jekôp. Me m-bángê.

¹² Ne o-sét mě o/fu, kan achi a-ri a/fu, kángkáng etúbû nyí nyi e-rí i ne bama nyi ne biimpyimpyam-basáng ne byibît ké byiko. Me mu n-chi i ńkyín kyi-chi éné, ké nǎ, me nn/ri kángkáng byěm ḿbyí Lában mu o-chi i ǒ.

¹³ Me n-chi i Osówo mú o/byí o-kâm ǒ ké Bétel, ké kyikit ńkyí a/pwó bakút-ólif ké buká, a-sháng kámbú ké ozîm ne ké kyikit ńkyí a/ryí mě ocím. Kpá byiko kántîk a-bwa esim ké esí nyí ba/fwon ǒ.

¹⁴ Ríchel ne Lyâ ba-faa Jekôp ba/fu, chwǒm kyi*fí to ńkyí be byidaryí bukyû ḿbú bonchí eten*.

¹⁵ O-kú o-tî ng bě wǎ bacinbánet. O/kúng bě o-shee, ne oo/bên kángkáng akpuga nyí o/táng bě.

¹⁶ Kángkáng efang ńnyín nyí Osówo oo/koo ké abwô nyí bonchí eten e/já bě ne bwǎn eten. Chi nang ebóng chwǒm ńkyí Osówo oo/sét ǒ.

^17-18 Ne Jekôp o-kpá byiko kâng ḿbyí odabwa esim o-kâm bonchí emen ké esí nyí Kínan. O-yip bwǎn emen ne banyi emen o-twôom ké boonyam-atû, o-kúng kángkáng byitú emen byi-câ ǎ kashú, nyǐ o-bâ kámbyí ké kyikû, cibicibi ne kángkáng byěm ḿbyí nyǐ o/já ké Mesopotémya.

¹⁹ Lában o/mû oo/dim ebû emen eríp epwát, ne ńdyí o*fí ké kyise* Ríchel o/jii erím-bakye nyí bonchí emen.

²⁰ Jekôp o/nîm Lában o*da ǎ echi o-nyît o/fu, nyǐ o-kú o-jâ*.

²¹ O/kúng kángkáng byěm ḿbyí o/mû ne mbyí o-dim ochéé óchee. O-nyáng kace ńké badakó Yuférétyis, ne o-dim ḿbú esí-eku éku nyí Gyílet.

Lában o/rim ne Jekôp ké Kyikû

²² Ńdyí ací aa/shwôm achât, ba/sét Lában ba/fu, Jekôp oo/chêe.

²³ Lában o-kúng banet emen o-rim ne Jekôp ké kyikû ké ací káchâtkányi tete o-da-kâm ǎ ké esí-eku éku nyí Gyílet.

²⁴ Ké buchú ámbu, Osówo o/sét Lában ké burê o/fu, bám byiko eyên, *dachi a-raa ne Jekôp ké bukwóp nang burá*.

²⁵ Jekôp o/mû o/bi bampyep emen kyíbóng-kaku, Lában o-bi ḿbé emen ne banet emen ké esí-eku éku nyí Gyílet.

²⁶ Lában o-raa ne Jekôp o/fu, ebóng a/nîm mě a-yip bwǎn ejí a-dim ne mbé wǎ banyinyi ḿbé ba/kám kámbé ké byití.

²⁷ Ebóng a/nîm mě a-dim a*da mě esét*. Â a/mû a/sét mě, m/mû n/chi n-sí ǒ ké bunyîn-dyityém ne ekwan ne ane ekim.

²⁸ A*da mě ebángê nang obánge óbange n-rwâm bwǎn ejí ne bwǎn ebe n/fu, ca n̂g kanong*. Wo a/chi chwǒm wǎ enyam-onet.

²⁹ Me mu ne busa ḿbú nda ǒ echi kyibî, nké ké buchú ḿbú bu/shwôm nyín, Osówo mú bonchí eyên o/kuri mě ekó o/fu, me n*dachi n-raa ne wo nang kaǎnyín*.

³⁰ Me mu n-nyît ng n/fu, wo a/dim, ké nǎ, amu a-jang ng eryuu a/fu, wo a-bwa ng esim dyijê, nké ebóng kyi/chi ne a-jii mě erím-bakye.

³¹ Jekôp o-faa o/fu, me m/mû mu n-shî ng n/fu, a/chi a-bam bwǎn eyên a-koo.

³² Nké â a/ri a/fu, onet nang obónge ké burwám-banet ejí mu ne erím-bakye eyên, n-ju ng onet ámu. Banet eten babwom bě ntûesé a-tún kángkáng byěm ḿbyí byi/já ǒ a-kúng a-dim ne mbyí. Jekôp o*da/nyît o/fu, Ríchel o/jii erím-bakye o-dim ne nyǐ*.

³³ Lában o-dim o-da-kyé ké mpyep mú Jekôp ne mú Lyâ ne mú básóng-banyinyi ashí afee, nké o*da/ri erím-bakye emen*. Ne o-dim ké mpyep mú Ríchel.

³⁴ Ríchel o/mû oo/yip erím-bakye ányi o-fé ké kiimbam ńkyí badatwôom kaanyam-atû ké esim o-kyú me ké nyǐ. Lában o-kyé ké mpyep omúmú o*da/ri kányí*.

³⁵ Ríchel o-raa ne bonchí emen o/fu, bonchí, *dachi a-sa kafâ ne mě* n*fí m-man n ebûu nensang ké bushú eyên* ké nǎ, mu ké bunyinyi. Lában o-kyé o*da/ri erím-bakye emen*.

³⁶ Ne kafâ ka-bírî Jekôp, ne o-bí o/fu, ebóng kyibî ńkyí me n/chi. Ebóng kyije ńkyí m/bên ńkyí kyi/chi ǒ amu a-bâ ne me ké kyikû.

³⁷ Kántîk mú aa/tún kángkáng byěm ejí, wo aa/ri ebóng ńkyí nkyi ńkyí eyên. Bâ ne nkyí nyín banet eyên ne ḿbé ejí ba-ri, ba-két bě mpan.

³⁸ Me nn/kyú ne wo ké aje bujam. Ebû eyên e*da/mîng efwon nang kabónge* ne n*da/ryí otyítǎm eyên nang obónge*.

³⁹ Nang nkéré orá mú enyam e/kám ebû eyên, me nké nkyi kyi-rím m mě. N*da/kúng kányí m-ba-tông ǒ n/fu, me nké n/chi ne e-kám*. Wo a/sét mě a/fu, me ncít dyikíp ké nang ebóng chwǒm ńkyí ba/jii ne buchú nang ne esû.

⁴⁰ Me n/jwo bubân-esû ne dyibyi kampén chwóó, n*da/man erê burê*.

⁴¹ Kyi/mû éné ké aje bujam nyí n/kyú ne wo. Me n/chi bǎmkpóngé ké aje diǐkpú ne anyii ké dyishí-bwǎn eyên ne aje nyâchât ké bubwô-byitú eyên. Nang ké kyi/mû éné, a/yángê akpuga-otukáku nyí a/mû a-kyâ mě kampén diǐkpú.

⁴² Â [Osówo mú banchí ejí, Osówo mú Ébarahâm ne Ázik,] o/mû o*fí ne me* něen a/mû aa/ró mě n-dim dyijê abwô ábwo. Nké Osówo oo/ri busông ejí ne bǎmkpóngé ḿbé n/chi, ne ké buchú ḿbú bu/shwôm nyín o/két mpan ámu.

Ocím mú Jekôp ne Lában ba/ryí ne Barî

⁴³ Lában o-faa Jekôp o/fu, bwǎn-banyinyi ḿbén ba-chi i bwǎn ejí. Bwǎn ebe ḿbé ejí, ne byitú ḿbyín byi/já mě. Ké ntûntû, kángkáng byěm ḿbyí amu a-ri ng něen ḿbyí ejí. Nké ké nǎ, me mm*ba/chi m-man ekoo bwǎn ejí ne bwǎn ebe n-tî* me mm/kpá byiko ḿbyí ndaryí ocím ne wo.

⁴⁴ Byitî dyizu-aká ńdyí dyi/chi dyi-kû bě ezîim kyi-kim ne ocím eryí mún.

⁴⁵ Ne Jekôp o-yip buká o-tî kámbú wǎ dyizǐm.

⁴⁶ O-sét banet emen o/fu, babwóp aká ba-cít kámbú. Ne ba-kyú ké bukô-dyizu-aká ándyi ba-ryí byiryíng.

⁴⁷ Lában o-fé dyizu-aká ándyi dyizîn, Jéga-Sahadúta, Jekôp o-fé to kándyí dyizîn, Gályit.

⁴⁸ Lában o-sét Jekôp o/fu, dyizu-aká ńdyín dyi/chi dyi-kû bě ezîim be ashí amúmú. Nkyí nké mbe ba-kó ng kyikit ánkyi Gályit.

⁴⁹ Lában o-raa to o/fu, kyi/bát Óburúkpâbí okû bě etún ké nkéré mú bii/pap barî. Ba/fé to kyikit ánkyi dyizîn, Myízipa.

⁵⁰ Lában o-raa o-ca kashú o/fu, â a*da/tî bwǎn ejí kanong* a-bé banyi bakíri, nang me n*da/nyît* nyît a/fu, Osówo mu o-ri ng bě.

⁵¹ Nyín dyizu-aká ńdyí me nn/zû ne buká ḿbú nn/tî dyizǐm.

⁵² Dyizu-aká ńdyín ne buká-dyizǐm ḿbún byi/chi byi-kû bě ezîim. Me mm*man n-nyáng dyizu-aká ńdyín m-ba-kye ǒ bunwa* ne wo aa*man a-nyáng kándyí a-ba-kye mě bunwa*.

⁵³ Osówo mú Ébarahâm ne Osówo mú Náho o/chi o-bwom bě ké otyém. Jekôp o-ryí ocím kâng ké dyizîn ńdyí Osówo mú Ázik, mú bonchí emen mu o-fâ, o/fu, nyǐ o-tî ng ocím mún mú nyǐ o/ryí.

⁵⁴ O-ju enyam o-chi kyifen kyíbóng-kaku o-kó banet emen ba-ba-ryí byiryíng-kyifen ánkyi. Ké nkéré mú baa/ryí, ba/rí ányi kyíbóng-kaku.

⁵⁵ Pirípirí ké orî-dyicí, Lában o-rwâm bwǎn ḿbé bwǎn emen ne bwǎn emen, o-sét kámbé o/fu, baca kanong, ne o-bwa esim dyijê.