Jénésis 3 - Bokyi Bible

Banet ba/né echi ńkyí Osówo o/sét Kámbé

¹ Ké burwám-enyam nyí Osówo Óburúkpâbí o/chi, efyi nké e/mû e-nyît ng byinyídíng e-shwôm kángkáng. Nyǐ e/bí mú onyinyi e/fu, ké ntûntû, Osówo o/fu, ben ba*dachi ba-ryí kyirim-kyichí nang kyirá ńkyí nkyi ké kyifát ńkyín*?

² Ne mú onyinyi o-faa efyi ányi o/fu, be byi-man n eryí byirím-byichí ḿbyí mbyi ké kyifát ńkyín.

³ Nké Osówo o/fu, be byi*dachi byi-ryí byirim-kyichí ńkyí nkyi ké otyém-kyifát* nang ké abwô ábwo be byi*dachi byi-ta*. Â byi/ta, byi-kpú u.

⁴ Nké efyi ányi e/sét mú onyinyi e/fu, baa*kpú*.

⁵ Osówo o/raa éné, ké nǎ, nyǐ mu o-nyît ng o/fu, â ben ba/ryí kánkyí, achi enen a/chi a-bâa, ba-firi [wǎ nyǐ, ba-kûnyît kyibî ne kyinong.]

⁶ Ké nkéré mú mú onyinyi o/nyît kâng o/fu, kyichí ánkyi ba-ryí i, ne nkyi kyi-nwa ng, ne â onet o/ryí kánkyí o-firi ng ne bubong, o/bóng kyirim emen o-ryí. O-bóng to o-kye otyép emen o-ryí.

⁷ Achi ebe kâng a-bâa, ne mbé ba-nyît ba/fu, mbé mbe esínábang. Ba-bóng eshǎan-kyichí ńkyí badakó fyîk ba-cibi kányí ne barî ba-bwá ké osín wǎ byídí.

⁸ Ne mbé ba-jwo abe nyí Osówo Óburúkpâbí mu o-cen n ké kafâ-kyifát ké dyikurúku beem. Ne mú onyinchéng ne onyi emen ba-da-rem ké esim-byichí ḿbyí mbyi ké kyifát eringe nyí Osówo Óburúkpâbí oo*ri kámbé*.

⁹ Nké Osówo Óburúkpâbí o/kó mú onyinchéng, o-bí ǎ o/fu, wo amu nyá.

¹⁰ Ne nyǐ o-faa o/fu, me n/jwo ǒ ké amu a-bâ ké kafâ-kyifát, bushî bu-kám mě n-da-rem, ké nǎ, mu osíndyíbang.

¹¹ Óburúkpâbí o-bí ǎ o/fu, yeě o/sét ǒ o/fu, wo amu osíndyíbang. Aa/ryí kyichí ńkyí n/fu, *daryí*?

¹² Mú onyinchéng o-faa o/fu, mú onyinyi mú a/kye mě a/fu, okyú ne me nké o/bóng kyirim emen o-kye mě n-ryí.

¹³ Ne Osówo Óburúkpâbí o-bí mú onyinyi kâng o/fu, ebóng wo a/chi chwǒm ńkyín. Mú onyinyi o-faa o/fu, efyi nké e/nîm mě ne n-ryí kánkyí.

Osówo o/két Mpan

¹⁴ Osówo Óburúkpâbí o/raa ne efyi o/fu, ké bubwô ḿbú wo a/chi ńkyín, me nn/shú ǒ ké burwám-enyam kángkáng, nyí ké byise ne nyí ké dyikán. Wo a-kû ng ecen ké dyifít, a-ryí i édúkǎndú nyǐ nyi tete a-kpú.

¹⁵ N/chi n-chi ǒ ne mú onyinyi ne bwǎn enen ba-firi banet-bushwôn ne barî. [Bwǎn] emen ba/chi ba-némê ǒ ké dyishí, ne wo a/chi a-némê [kámbé] ké kyikû-kyiká.

¹⁶ Osówo o-raa ne mú onyinyi o/fu, n/chi n-chi busông eyên bu-jê bu-shwôm ké nkéré mú adafwon. Wo a-kû ng efwon bwǎn ké busông. Nang ké kyi/chi kyi-kyú éné, wo a/chi a-ryuu otyép eyên, a-kyú ké bubwô emen.

¹⁷ Osówo o-bírî o-raa ne [mú onyinchéng] o/fu, ké bubwô ḿbú aa/jwo ejá nyí onyi eyên ne aa/ryí kyichí ńkyí m/mû n/fu, *daryí* me nn/shú esí ké dyishí eyên. Wo a/chi a-kûchi bǎmkpóngé kanong kanong ne a-ryí byiryíng ké nyǐ tete a-kpú.

¹⁸ Esí e/chi e-byí biǐbyâa ne byiwong ḿbyí byidakûcít byíkwôn eyên, ne a/chi a-kûryí eshǎan.

¹⁹ Wo a-kû ng eri busông ne a-ryí byiryíng tete a-kpú a-bwa ké ecing, ké nǎ, nyǐ nké n/kúng ne n-chi ǒ. Wo a-chi i ecing, ne a-bwa ng esim a-bírî ecing. [

²⁰ Ádam] o/fé onyi emen dyizîn ńdyí badakó Êef, ké nǎ, nyǐ o/mû boné mú kángkáng banet.

²¹ Ne Osówo Óburúkpâbí o-zim Ádam ne onyi emen byídí ké ekwop-enyam o-kye kámbé ba-fé.

²² Ne Osówo Óburúkpâbí o-raa o/fu, banet ba/firi wǎ be, [ba-kú ba-nyît ng kyibî ne kyinong.] Bii*ba/chi byi-mîng kámbé ba-bóng kyichí-dyikpen ba-ryí* ba-kûkpen ne banyá*.

²³ Ké bubwô ámbu, Osówo Óburúkpâbí o/ró Ádam o-byí ké kyifát ńkyí Édin, o/fu, okûkpang ecing nyí ba/kúng ne ba-chi ǎ.

²⁴ Osówo o/ró mú onyinchéng o-tî biǐnyám ḿbyí byidabám kyichí-dyikpen ké kyicê ńkyí esû edabyí, ne kashwám ńké nke ka-mang ng okwâ, ńké nke ka-pín n byicê byimúmú, eringe nyí onet oo*man ecen o-fárâng kánkyí*.