Jénésis 29 - Bokyi Bible

Jekôp o/ribi Kyikit-Lában

¹ Jekôp o/dim bucen emen o-ca kashú ké esí nyí kyicê ńkyí esû nyi e-byí i.

² O-ba-ribi ké dyibíng-omu ńdyí o*da/tî achi* ké kyifát, ne abóng-ebû achât nyí a/cít kyísí a-wáp kándyí a-fé ké otyém. Ebû ányi e/mû e-jwáp ng omu ké dyibíng-omu ándyi ńdyí dyi/mû ne kiimbâng-buká ké ocím emen.

³ Nang nkéré orá nké kángkáng abóng-ebû a/bacibi kyikit kyibónge ké dyibíng-omu ándyi, bambâm ebû ba-bâa ng buká ámbu ké ocím-dyibíng-omu ba-kye kányí omu e-jwáp, ba-bwa ne buká ámbu ba-cít.

⁴ Jekôp o-bí bambâm ebû ámbe o/fu, bacín ejí, ben ba/fím nyá. Mbé ba-faa ǎ ba/fu, byi/fím Háran.

⁵ Nyǐ o-bí kámbé o/fu, ben ba-nyît ng Lában mú wǎn-Náho? Mbé ba-faa ǎ ba/fu, byi-nyît ng ǎ.

⁶ Nyǐ o-bí kámbé o/fu, mu nyǐ kanong? Mbé ba-faa ba/fu, mu kanong. Kûtún, wǎn emen mú onyinyi, Ríchel nké mu o-bâ éné ne ebû emen.

⁷ Jekôp o-raa ne mbé o/fu, ké esû e/tôong něen, ne nkéré o*da/fyi ne mú badakúng ebû ba-fé ké kyise* ebóng baa*kye kányí omu e-jwáp* ba-bwa esim ne nyǐ e-da-ryí byiryíng*.

⁸ Mbé ba-faa ǎ ba/fu, be bii*man echi éné* tete kángkáng ebû e-ribi nyín, byi-bâa buká, byi-kye kányí omu e-jwáp.

⁹ Ríchel o/baribi ne ebû, ńdyí Jekôp o/tôong o-pem m ne mbé.

¹⁰ Ńdyí Ríchel o/ribi ne ebû nyí Lában mú wǎn-boné-Jekôp, Jekôp o/ce ké dyibíng-omu, o-bâa buká, o-kye ebû ányi omu e-jwáp.

¹¹ Ne Jekôp o-rwâm Ríchel o-kpet ejêe,

¹² o-sét Ríchel o/fu, me wǎn-boné-bonchí eyên, me n-chi i wǎn-Rebéka. Ríchel o-zóngê o-da-sét bonchí emen,

¹³ ne ńdyí Lában oo/jwo kiǐshwô ánkyi kángkáng kyi-kim ne Jekôp mú wǎn-nche emen, Lában o/zóngê o-kâm ǎ, o-rwâm ǎ, o-kpî ǎ o-bâ ne nyǐ ké kyise. Ńdyí Jekôp o/sét Lában kángkáng ńkyí kyi/chi,

¹⁴ Lában o/sét ǎ o/fu, ké ntûntû, wo a-chi i enyam-byiko ne baróng ḿbé ejí me oyén. Jekôp o/rí ányi otukáku obónge.

Jekôp o/kyú Ḿgbán mú Lában ké Dyishí ńdyí Ríchel ne Lyâ

¹⁵ Lában o/raa ne Jekôp o/fu, wo aa*man a-kû mě echi bǎmkpóngé dyikáá* ké nǎ, a-chi i wǎn-boné ejí*. N-kû ng ǒ ekye akpuga nǎ.

¹⁶ Lában o/mû ne bwǎn-banyinyi ashí afee. Mú okínkán o/mû o-bángê e Lyâ, mú wǎsíng o-bángê e Ríchel.

¹⁷ Lyâ o/mû ne achi [rěe,] nké Ríchel o/mû o-nwa ng bunong byikit byimúmú.

¹⁸ Ríchel o/mû o-jê ng Jekôp, ne o-sét Lában kâng o/fu, me n/chi n-nung Ríchel ké aje káchâtkányi, â a/chi a-bángê mě m-bé ǎ.

¹⁹ Lában o-faa o/fu, kyi-nyîn n mě ńkyí nda ǎ eyip n-kye ǒ wo kyi-shwôm ńkyí nda ǎ ekye onet okíri. Kyú nyín ne me.

²⁰ Jekôp o/chi bǎmkpóngé ké aje káchâtkányi eringe nyí odabé Ríchel, ne nkéré ámu o*da ǎ ebwon* ké nǎ, Ríchel o/mû o-jê ng ǎ.

²¹ Ne Jekôp o-raa ne Lában o/fu, nkéré oo/fyi mú ndabé wǎn eyên.

²² Ne Lában kâng o-chi dyijî-dyibé, o-kó kángkáng banet ba-bâ.

²³ Nké ké buchú ámbu, Lában o/mîng Ríchel o-yip Lyâ o-kye Jekôp o-rí ne nyǐ.

²⁴ Lában o-kúng ósóng emen mú onyinyi mú odabángê Zípa o-kye Lyâ wǎ ḿgbán emen.

²⁵ Jekôp o*da/nyît o/fu, Lyâ nké nyǐ o/rí ne nyǐ* tete dyicófóróng dyi-cé. Ne o-dim o-kâm Lában, o-bí ǎ o/fu, ebóng a/chi mě dyizong-chwǒm ńdyín. Me n/chi ǒ bǎmkpóngé n/fu, m-bé ng Ríchel. Ebóng a/nîm mě.

²⁶ Lában o-faa ǎ o/fu, édúú nyí eten e/fu, wǎn-onyinyi mú okínkán nké odabé dyibé kpá ne mú wǎsíng o-kûbé.

²⁷ Bám tete byi-chi dyijî-dyibé ké kyipyán kyibónge ne n-kye ǒ Ríchel, â a/chi a-chî mě echi bǎmkpóngé ké aje akíri káchâtkányi.

²⁸ Jekôp o-bángê, ne ńdyí kyipyán ńkyí dyijî-dyibé echi kii/man, Lában o/kúng Ríchel o-kye Jekôp o-firi onyi emen.

²⁹ Lában o-kúng ósóng emen mú onyinyi, mú odabángê Byíla o-kye Ríchel o-firi ḿgbán emen.

³⁰ Jekôp o-rí to ne Ríchel, ne Ríchel o/mû o-jê ng ǎ o-shwôm Lyâ. Ne o-chîchi Lában bǎmkpóngé ké aje akíri káchâtkányi.

Bwǎn ḿbé Jekôp o/fwon

³¹ Ké nkéré mú Óburúkpâbí o/ri o/fu, Ríchel mu o-jê ng Jekôp o-shwôm Lyâ, o/chi Lyâ o-kpet efwon, Ríchel o*fí o-fwon n*.

³² Lyâ o/koo dyifít, o-fwon wǎn-onyinchéng, o-fé ǎ dyizîn, Rúben, o-raa o/fu, Óburúkpâbí oo/ri afaníkong ejí. Kántîk n/chi m-kpet ejê otyép ejí.

³³ O-chîkoo dyifít, o-fwon wǎn-onyinchéng okíri, o-fé ǎ dyizîn, Syímyon, o-raa o/fu, Óburúkpâbí nké o/chî mě ekye wǎn-onyinchéng mún, ké nǎ, oo/nyît o/fu, me n*fí n-jê ng otyép ejí*.

³⁴ Lyâ o-chîkoo dyifít, o-chîfwon wǎn-onyinchéng, o-fé ǎ dyizîn, Lyíva, o-raa o/fu, kántîk, otyép ejí o/chi o-kpaa mě o-fé ké byiko, ké nǎ, nn/fwon ǎ bwǎn-banyinchéng bachât.

³⁵ Ne o-chîkoo dyifít, o-chîfwon wǎn-onyinchéng, o-raa o/fu, kántîk, m-kpee ng Óburúkpâbí. Ne o-fé wǎn ámu dyizîn, Júda. Ne bufwon emen bu-man.