Jénésis 25 - Bokyi Bible

Bwǎn Bakíri ḿbé Ébarahâm

¹ Ébarahâm o/bé onyi okíri mú o/mû o-bángê e Ketúra.

² Ketúra o-fwon ǎ Zímaran ne Jókashan ne Médan ne Médyan ne Eshíbak ne Shwâ.

³ Jókashan o/mû bonchí mú Shéba ne Dyídan, ne kyikû-banet ńkyí Dyídan kyi/mû banet ḿbé Ashurím ne ḿbé Letushím ne ḿbé Lumím.

⁴ Bwǎn ḿbé Médyan ba/mû Éfa ne Éfe ne Hánok ne Abída ne Éda. Ḿbén kángkáng ba/mû bwǎn-Ketúra.

⁵ Ébarahâm o/bwa ne kángkáng byěm ḿbyí o/mû ne mbyí o-kye Ázik o-ryí bukyû.

⁶ Nké ké nkéré o/mû o/tôong okpó, o/mû o-kyâ bwǎn ḿbé o/fwon ne banyi emen bakíri byěm. Ne o-ró bwǎn ámbe ba-dim ké esí nyí kyicê ńkyí esû nyi e-byí i, ba-mîng Ázik kǎnchí.

Bukyû ne Oryii mú Ébarahâm

^7-8 Ébarahâm o/rí bajam-aje nyíryinyi esim onyiryiká ne o-kpú.

⁹ Bwǎn emen, Ázik ne Éshimal ba-ryii ǎ ké bucim ḿbú Makapyíla, ké kyifát ńkyí nkyi ké kyicê ńkyí Mámare ńkyí esû nyi e-byí i. Kyifát ánkyi kyi/mû kyi/já Éforon mú wǎn-Zóha, mú onet-Hyítat.

¹⁰ Kyifát ánkyi nké Ébarahâm o/mû o/ré ne banet ḿbé Hyítat. Ba/ryii Ébarahâm ne onyi emen Sirá ányi.

¹¹ Ńdyí Ébarahâm o/kpú, Osówo o/jware wǎn emen Ázik mú o/mû o-kyú u fáráng ne dyijwáng ńdyí badakó, Dyijwáng ńdyí Nyǐ mú mu Okpó, mú mu o-ri ng Mě.

Bwǎn ḿbé Éshimal

¹² Éshimal mú Héga, mú ósóng-Sirá, mú o/ré ké Éjip,

¹³ o/fwon bwǎn ḿbé něen ké bunye ké bunye. Nebáyot ne Kéda ne Ádibil ne Myíbasam

¹⁴ ne Myíshima ne Dúma ne Mása

¹⁵ ne Hádat ne Téma ne Jétu ne Náfyishi ne Kedéma.

¹⁶ Mbé nké ba/mû banchí ḿbé byikim-banet diǐkpú ne byifee, ne ba/mû ba/fé eshê ne byikit ḿbyí ba/mû ba-kyú u azîn ebe.

¹⁷ Éshimal o/rí bajam-aje nyâchât esim onyiryiká ne afee ne o-kpú.

¹⁸ Bwǎn ḿbé Éshimal ba/mû ba-kyú u ké esí nyí e/mû ké otyém ne otyém mú Habyíla ne Shû, ké bukwóp ḿbú Asyírya, ké kyicê ńkyí Éjip ńkyí esû edabyí. Mbé ba/mû ba-kyú u cát ne bwǎn-Ébarahâm ḿbé áku.

Ba/fwon Éso ne Jekôp

¹⁹ Nyín kiǐshwô kyi-kim ne Ázik mú wǎn-Ébarahâm.

²⁰ Ázik o/mû oo/rí bajam-aje bafee ké nkéré o/bé Rebéka mú wǎn-Bétwel, mú o/fím Áram ké Mesopotémya, ne o/mû to wǎn-boné-Lában.

²¹ Ké nǎ, Rebéka o/mû o*fí o-fwon n* Ázik o/fé nshwam o-kye Óburúkpâbí ké bubwô emen. Óburúkpâbí o/jwo nshwam emen, ne Rebéka o-koo dyifít.

²² O/mû mu o-bâ efwon afúng, ne o-fwon kámbé, ba/mû mbe ba-nyii ng kyikit ne barî ké kafâ-dyifít. Rebéka o-kpet ebí byiko emen o/fu, ebóng kyibî-chwǒm nkyi kyi-chi i mě něen. Ne o-dim o-da-bí Óburúkpâbí o/fu, osét ǎ dyishí.

²³ Óburúkpâbí o-faa ǎ o/fu, eshê efee nyi ǒ ké dyifít. Wo a/chi a-fwon bwǎn bafee ḿbé baa*ba/chi ba-kwárê ne barî*. Obónge o/chi o-shwane o-shwôm óbe. Mú okínkán o/chi o-kyú ḿgbán mú mú wǎsíng.

²⁴ Nkéré o-fyi mú Rebéka odafwon, ne o-fwon afúng, banyinchéng bányincheng.

²⁵ Mbwôp kashú o/mû o-bwam m ne o/mû ne eríp chwóó ké byiko. Ne ké bubwô ámbu, ba-fé ǎ kâng dyizîn, Éso.

²⁶ O-fwon n nnyinyěng ne bubwô níbiníbi ké kyiká ńkyí Éso, ne ba-fé ǎ kâng dyizîn, Jekôp. Ázik o/mû oo/rí bajam-aje bachât ńdyí ba/fwon kámbé.

Éso o/shee Bukínkán Emen wǎ Mbwôp Kashú-Wǎn

²⁷ Bwǎn ámbe ba-kán, Éso o-firi nryuu dyikán. Nyǐ o/mû onet mú dyikpen ńdyí kyíjí ebyí dyida ǎ enyîn. Nké Jekôp o/mû mu dííng, oo*byí kyíjí*.

²⁸ Éso o/mû o-nyîn n Ázik o-shwôm, ké nǎ, enyam nyí Éso o/mû o-ju ng e/mû e-nyîn n ǎ eryí. Nké Jekôp o/mû o-nyîn n Rebéka o-shwôm.

²⁹ Dyicí dyibónge, ké nkéré Jekôp mu o-rám m osén, Éso o/fyi dyikán eryuu. Esong e/mû nyi e-nwa ng ǎ,

³⁰ ne o-sét Jekôp o/fu, n-kú m-bâ ejwâa esong. Kye mě onyin-mbít mú amu a-rám m. Nkyí nké mbe ba-kó ng Éso, Édom.

³¹ Jekôp o-faa ǎ o/fu, n-kyâ ǒ, â a/kye mě bukínkán eyên wǎ mbwôp kashú-wǎn.

³² Éso o-sét ǎ o/fu, me n-kú m-bâ ekpú esong. Mbwôp kashú-wǎn ekyú o-kyâ mě ebóng.

³³ Jekôp o-faa ǎ o/fu, ké mbwôp kashú, ryí mě ocím a-sem Osówo a/fu, wo aa/bwa ne bukínkán ḿbú mbwôp kashú-wǎn a-kye mě. Éso o-ryí ocím o-sem Osówo o-bwa ne bukínkán o-kye ǎ.

³⁴ Ne Jekôp kâng o-kye ǎ berêt ne kasu. Éso o-ryí o-jwáp bato, o-bûu o-dim. Éné nké Éso o/cen ne o-tông o/fu, nyǐ o*fí o-kérê ng kyi-kim ne bukínkán emen wǎ mbwôp kashú-wǎn*.