Jénésis 24 - Bokyi Bible

Onyi mú Ázik

¹ Ébarahâm o/mû oo/kâa kanong kanong, ne Óburúkpâbí o/mû oo/jware ǎ ké kángkáng byěm ḿbyí o/chi.

² Ébarahâm o/raa ne ḿgbán emen mú oo/kán o-shwôm ḿbé áku kángkáng, mú o/mû o-tún n kángkáng byěm emen o/fu, fé bubwô eyên ké anam ejí a-ryí mě ocím.

³ Mu n-ryuu ng ǒ n/fu, ryí mě ocím ké dyizîn ńdyí Óburúkpâbí mú mu Osówo mú bubóng ne esí a/fu, wo aa*ba/chi a-fîm onyi mú o/fím nyín ké Kínan a-kye wǎn ejí o-bé*.

⁴ A-man a-ca ké oshê mú ba/fwon mě a-da-bé onyi áku mú wǎn ejí Ázik, ké burwám-bwǎn-bané ejí.

⁵ Nké ḿgbán emen ámu o/faa ǎ o/fu, me n-chi i nǎ â mú wǎn-onyinyi ámu o/né o/fu, nyǐ oo*dim ké oshê emen o-bâ ké esí ńnyín*. Ntwóm wǎn eyên o-bwa esim ké esí nyí wo a/fím dí.

⁶ Ébarahâm o-faa o/fu, nyît a/fu, wo aa*man a-twóm wǎn ejí o-bwa esim áku*.

⁷ Óburúkpâbí mú mu Osówo mú kyíbóng nké o/fím ne me ké kyise ńkyí bonchí ejí ne ké esí nyí bwǎn-bané ejí, ne o/ryí mě ocím shwaneshwane o/fu, nyǐ o-kyâ kyikû-banet ejí esí ńnyín. O/chi o-twóm orím emen mú onong o-ca ǒ kashú eringe nyí adaman ebé onyi áku a-ba-kye wǎn ejí.

⁸ Â mú wǎn-onyinyi o/fu, nyǐ oo*bê* wo a-man n efem ké ocím eryí mún. Nké chwǒm kyi*fí ńkyí kyi/chi kyi-chi ǒ a-bwa ne wǎn ejí esim áku*.

⁹ Ne ḿgbán ámu o-fé bubwô emen ké anam nyí Ébarahâm mú bonchí emen, ne o-ryí ocím o/fu, nyǐ o-chi i ńkyí Ébarahâm o/sét ǎ.

¹⁰ Ḿgbán-Ébarahâm mú o/mû o-tún n ǎ byěm o-kúng boonyam-atû ḿbú bonchí emen diǐkpú o-dim ké oshê mú Náho o/mû o-kyú u ké bushûyû-Mesopotémya.

¹¹ Ké nkéré mú o/ribi áku, o/chi boonyam-atû ámbu bu-cít kyísí ké dyijwáng ńdyí dyi/mû ké bukô-oshê. Busun bu/mû boo/zóngê ḿbú banyinyi badabê omu ebató.

¹² Ḿgbán ámu o-fé nshwam o/fu, Óburúkpâbí mú mu Osówo mú Ébarahâm mú bonchí ejí, chi ńkyí m/bê kyi-byí mě dyishí kurún, a-tî ocím eyên mú a/ryí bonchí ejí.

¹³ Me m/bwom nyín ké dyijwáng ńdyí ásé-oshê a/chi a-bâ a-ba-tó omu.

¹⁴ Me n/chi n-sét búsé bubónge n/fu, kye mě omu ké katí eyên n-jwáp. Â o/bángê o/fu, me njwáp, o-chîraa o/fu, nyǐ o-kyâ to boonyam-atû ejí omu to bu-jwáp, me n/chi n-nyît n/fu, nyǐ nké aa/cá ǎ a-kye ḿgbán eyên, Ázik. Â ńkyín kyi/chi, me n/chi n-nyît n/fu, wo aa/tî ocím eyên mú a/ryí bonchí ejí.

¹⁵ Ne o-man nshwam mú mu o-fâ, Rebéka o/ribi ne katí-omu ké byikem. Nyǐ o/mû wǎn-Bétwel, mú o/mû wǎn mú wǎn-boné-Ébarahâm mú o/mû o-bángê e Náho, mú onyi emen o/mû o-bángê Myíka.

¹⁶ Rebéka o/mû o-nwa ng búsé, ne o/mû wǎn-onyinyi mú ba/mû ba*da/rí ne ne nyǐ*. Nyǐ o/shwôm o-da-tó omu o-bwa esim.

¹⁷ Ḿgbán-Ébarahâm ámu o-dim o-kâm ǎ, o-raa ne nyǐ o/fu, kamgbe, kye mě omu ké katí eyên n-jwáp.

¹⁸ Rebéka o-sét ǎ o/fu, bonchí, jwáp kâng. Ne o-tíngê katí kyísí o-kye ǎ omu o-jwáp.

¹⁹ Ké nkéré oo/jwáp, Rebéka o-sét ǎ o/fu, mîng n-da-tó omu m-ba-kye boonyam-atû eyên bu-jwáp to bu-zût.

²⁰ Ne Rebéka o-bírî omu mú o/waa o-fé boonyam-atû emen ké kyiféng, o-bwa esim babap o-chîdató omu o-ba-fé kámbú, tete bu-jwáp o-kwárê kámbú kángkáng.

²¹ Ḿgbán-Ébarahâm ámu o/cíbî pyêp mu o-tún n ǎ, o/fu, nyǐ o-ri ng â Óburúkpâbí oo/kye ǎ ńkyí mu o-ryuu ng.

²² Ké nkéré Rebéka oo/man, ḿgbán-Ébarahâm ámu o-kúng ókpâl-gûl mú odajang eshwane kasî o-fé ǎ ké ozóng, o-yip biimbâng-byibwáng-gûl byifee o-fé ǎ ké abwô.

²³ O-sét Rebéka o/fu, kamgbe, sét mě dyizîn-bonchí eyên. Nyǐ mu ne kyikit ké kyise emen ńkyí me ne banet ejí byidarí?

²⁴ Rebéka o-sét ǎ o/fu, bonchí ejí o-bángê e Bétwel, mú wǎn-Náho ne Myíka.

²⁵ Be mu ne byiryíng ḿbyí enyam eyên edaryí ne biǐbyâa ḿbyí edarí ké mbyí ké kyise eten chwóó ne kyikit nkyi kô ńkyí adarí.

²⁶ Ḿgbán-Ébarahâm ámu o-tím arông kyísí o-fé Óburúkpâbí,

²⁷ o-raa o/fu, kye n̂g Óburúkpâbí mú mu Osówo mú bonchí ejí Ébarahâm akpee, mú oo/tî ocím emen mú o/ryí bonchí ejí. Óburúkpâbí oo/tông mě kiǐfáng n-nung ké abwô nyí bwǎn-bané-bonchí ejí.

²⁸ Mú wǎn-onyinyi o-byí ne ochéé o-da-nung ké kyise ńkyí boné emen, o-kúng kiǐshwô ánkyi kángkáng o-sét ǎ.

²⁹ Rebéka o/mû ne wǎn-boné mú onyinchéng, mú odabángê Lában, mú o/zóngê o-wâa ké dyijwáng, ké kyikit-ḿgbán-Ébarahâm o/mû o/bwom.

³⁰ Lában o/mû o/ri ókpâl mú wǎn-boné emen o/fé ké ozóng ne byibwáng ḿbyí o/fé ké abwô ne o/mû o/jwo to ńdyí Rebéka mu o-sét ng ńkyí mú onyinchéng ámu o/sét ǎ. O-dim o-kâm ḿgbán-Ébarahâm ámu mú o/mû o/bwom o-fárâng boonyam-atû emen ké dyijwáng,

³¹ ne o-sét ǎ o/fu, bâ ne me ké kyikû. Wo a-chi i onet mú Óburúkpâbí oo/jware ǎ. Ebóng a/bwom nyín kyíjí. Me nn/tî ǒ nfût ké kyise ejí, ne kyikit nkyi kô ńkyí boonyam-atû eyên budarí.

³² Ne onyinchéng ámu o-dim o-da-nung ké kyise-Lában, Lában o-firi boonyam-atû atû ké esim, o-kye kámbú byiryíng ne biǐbyâa ḿbyí budarí ké mbyí. Ne o-bâ ne omu o-ba-kye ḿgbán-Ébarahâm ne banet emen o/fu, basoo byiká.

³³ Ńdyí ba/bê ne byiryíng, ḿgbán-Ébarahâm ámu o/fu, nyǐ oo*wá eryí* tete nyǐ o-sét ńkyí nyǐ mu o-bâ ebasét. Lában o-sét ǎ o/fu, sét kâng.

³⁴ Mú onyinchéng ámu o-kpet esét o/fu, me n-chi i ḿgbán-Ébarahâm.

³⁵ Óburúkpâbí oo/jware bonchí ejí kanong kanong, o-chi ǎ o-firi nfang-onet. Oo/kye ǎ abóng-etám-ebû ne ebúbǔu ne bampong ne akpuga ne básóng ḿbé banyinchéng ne ḿbé banyinyi ne boonyam-atû.

³⁶ Sirá mú onyi-bonchí ejí o/fwon ǎ wǎn-onyinchéng ké nkéré mú oo/kâa, ne bonchí ejí oo/kúng kángkáng byěm ḿbyí mu ne mbyí o-kye wǎn ámu.

³⁷ Bonchí ejí o/chi mě n-ryí ocím n-sem Osówo n/fu, n-chi i ńkyí nyǐ oda mě esét. O/sét mě o/fu, *dachi a-bé wǎn-onyinyi mú o/fím Kínan a-kye wǎn ejí*.

³⁸ Nké ca a-kâm banet-bonchí ejí, ké burwám-bwǎn-bané ejí a-da-bé onyi a-ba-kye ǎ.

³⁹ Ne m-bí bonchí ejí n/fu, â mú wǎn-onyinyi o/né ebê ne me kâng.

⁴⁰ Nyǐ o-faa mě o/fu, Óburúkpâbí, mú kángkáng nkéré nn/chi ńkyí nyǐ mu o-sét ng mě, o/chi o-twóm orím emen mú onong o-bâ ne wo, o-chwáp ǒ a-ri ńkyí amu a-kyé ng. Wo a/chi a-bé onyi a-kye wǎn ejí ké burwám-banet ejí, ké kyikû ńkyí bonchí ejí.

⁴¹ Bukwóp mbu bubónge nké nke ḿbú bu/chi bu-chi ǒ a-fem ké ocím eyên mú a/ryí mě. Â a/ce a-kâm bwǎn-bané ejí ba-né ǒ, ne a-fem.

⁴² Ńdyí n/ribi ké dyijwáng enen kurún, n/fé nshwam n/fu, Óburúkpâbí mú mu Osówo mú Ébarahâm mú bonchí ejí, chwáp mě n-ri ńkyí mu n-kyé ng.

⁴³ Me nn/ribi nyín ké dyijwáng. Â wǎn-onyinyi o/bê omu etó ké dyijwáng, me n/chi m-bí ǎ n/fu, kye mě omu ké katí eyên n-jwáp.

⁴⁴ Â o/bángê mě n-jwáp, o-tó to o-kye boonyam-atû ejí bu-jwáp, kyi/bát okyú onet mú wo aa/cá ǎ a/fu, okyú onyi mú wǎn mú bonchí ejí.

⁴⁵ Ne m-man nshwam ejí mú m/mû n-fâ ké dyityém, Rebéka o/ribi ne katí ké byikem o-shwôm o-da-tó omu. M-bí ǎ n/fu, kamgbe, kye mě omu n-jwáp.

⁴⁶ O-shû oshǔng katí emen kyísí, o-sét mě o/fu, jwáp, n/chi n-tó to n-kye byitú eyên. Ne n-jwáp kâng, o-tó to o-kye byitú ejí.

⁴⁷ Ne m-bí ǎ n/fu, yeě mu bonchí eyên. Ne o-faa mě o/fu, bonchí ejí o-bángê e Bétwel mú wǎn-Náho ne Myíka. Ne n-fé ǎ kâng ókpâl ké ozóng ne byibwáng ké abwô.

⁴⁸ N-tím arông kyísí n-fé Óburúkpâbí. M-kpee Óburúkpâbí mú mu Osówo mú Ébarahâm mú bonchí ejí, mú oo/tông mě kiǐfáng n-nung ké abwô nyí wǎn-boné-bonchí ejí, mú n/ri wǎn emen mú onyinyi, mú n/chi n-kye wǎn mú bonchí ejí.

⁴⁹ Kántîk, â ba/fu, ba-kyâ bonchí ejí ńkyí mu o-ryuu ng wǎ onet-kyikû enen, ba-chi ńkyí n/sét běn, kamgbe, sét n̂g mě. Â baa*chi* sét n̂g mě, ne n/chi n-nyît ńkyí ndachi.

⁵⁰ Lában ne Bétwel ba-faa ba/fu, ké nǎ, chwǒm ńkyín kyi/fím ké abwô nyí Óburúkpâbí, be byi*fí to ne ńkyí byidasét*.

⁵¹ Rebéka mu nyín, kúng ǎ a-dim ne nyǐ o-da-kyú onyi mú wǎn-bonchí eyên eringe Óburúkpâbí oyén oo/sét.

⁵² Ńdyí ḿgbán-Ébarahâm o/jwo ńkyín, o/tíngê kyísí o-fé Óburúkpâbí.

⁵³ Ne o-fîm kâng byídí ne byibwáng ne syílyíba ne gûl o-kye Rebéka. O-yárê to wǎn-boné-Rebéka ne boné emen kanong kanong.

⁵⁴ Ne ḿgbán-Ébarahâm ne banet emen kâng ba-ryí byiryíng ba-jwáp bato, ba-rí ányi. Ké nkéré mú ba/jwóbê ké dyicófóróng, ḿgbán-Ébarahâm o/sét kámbé o/fu, mîng n̂g mě m-bwa esim n-kâm bonchí ejí.

⁵⁵ Nké wǎn-boné-Rebéka ne boné emen ba/sét ǎ ba/fu, mîng Rebéka o-chîrí ne be boǒnyín-ací nang ací diǐkpú ne o-kûdim.

⁵⁶ Nké nyǐ o/sét kámbé o/fu, *da n̂g bě echi byi-rí chwóó*. Óburúkpâbí oo/chi bucen ejí bu-byí dyishí. Mîng n̂g mě m-bwa esim n-kâm bonchí ejí.

⁵⁷ Mbé ba-faa ba/fu, mîng byi-kó mú wǎn-onyinyi byi-bí ǎ byi-jwo ńkyí odasét.

⁵⁸ Ne ba-kó Rebéka ba-bí ǎ ba/fu, a-dim m ne onyinchéng mún dí. Rebéka o-bángê o/fu, âa.

⁵⁹ Ne ba-mîng Rebéka ne ḿgbán obónge mú kyikû ebe, mú oo/kâa, ba-dim ne ḿgbán-Ébarahâm ne banet emen.

⁶⁰ Ne ba-fé nshwam mún ba-jware Rebéka ba/fu, kyi/bát wo, ǎ wǎn-boné eten, akyú boné mú égot-banet. Kyi/bát bwǎn eyên bakpógê banet-bushwôn ebe.

⁶¹ Ne Rebéka kâng ne bǎmgbán emen ḿbé banyinyi ba-kpá byiko ba-yú ké boonyam-atû ḿbú badadim ne ḿgbán-Ébarahâm, ne mbé ashí amúmú ba-dim.

⁶² Ázik o/mû oo/dim o-bâ ké kyikim-dyikán ńkyí badakó Dyijwáng ńdyí Nyǐ mú mu Okpó, mú mu o-ri ng Mě, ne o/mû mu o-kyú u ké kyicê-Kínan ńkyí busyísen.

⁶³ O/dim ńdyí dyikurúku dyi-kú dyi-fyi ng o/fu, nyǐ o-da ng eri kyifát, ne o-ri ké boonyam-atû bu-kú bu-bâ.

⁶⁴ Ké nkéré mú Rebéka o/ri Ázik, o/shû ké kaanyam-atû emen,

⁶⁵ o-bí ḿgbán-Ébarahâm o/fu, ebóng onyinchéng mu o-cen n o-bâ bě éné ké kashú, ké kafâ-kyifát. Ḿgbán ámu o/faa ǎ o/fu, bonchí ejí éné. Ne Rebéka kâng o-yip kaǎsém emen o-cít bushú.

⁶⁶ Ḿgbán ámu o-sét Ázik kángkáng byěm ḿbyí nyǐ o/chi.

⁶⁷ Ne Ázik o-kúng Rebéka o-da-nung ne nyǐ ké mpyep mú ba/bi ké byídí, mú Sirá mú boné o/mû o-kyú u, ne o-firi onyi emen. Rebéka o/mû o-jê ng Ázik, ne ké bubwô ámbu, o/fé Ázik dyityém kyi-kim ne boné emen mú o/kpú.