Jénésis 21 - Bokyi Bible

Ba/fwon Ázik

¹ Óburúkpâbí o/jware Sirá wǎ eringe nyí o/mû o/ryí ocím,

² ne o-koo dyifít, o-fwon wǎn-onyinchéng o-kye Ébarahâm ńdyí oo/kâa. Ba/fwon ǎ ké nkéré mú Osówo o/tî o/fu, ba/chi ba-fwon ǎ.

³ Ébarahâm o/fé ǎ dyizîn, Ázik,

⁴ ne ké nkéré mú Ázik o/rí ací nyíryinyi, Ébarahâm o/cên ǎ wǎ eringe nyí Osówo o/mû o/sét ǎ.

⁵ Ébarahâm o/mû oo/rí bajam-aje batánge ké nkéré mú ba/fwon Ázik.

⁶ Sirá o-raa o/fu, Osówo oo/bê mě ne bunyîn-dyityém ne éjwô. Nang yeě mú o/jwo kánkyí o/chi o-jwó ne me ké kyikû.

⁷ Ne o-chîraa o/fu, yeě o/mû o/chi o-sét Ébarahâm o/fu, Sirá o/chi o-firi onyǐnsan. Nké mm/bwa n-fwon ǎ wǎn-onyinchéng ké nkéré mú oo/kâa.

⁸ Wǎn o-kán, ne ké dyicí ńdyí ba/byii ǎ, Ébarahâm o/chi kiǐtí-dyijî.

Ébarahâm o/ró Héga ne Éshimal

⁹ Dyicí dyibónge, Éshimal mú Héga, mú o/fím Éjip, o/fwon ne Ébarahâm, o/mû [mu o-chi i acáá ne Ázik mú wǎn-Sirá.]

¹⁰ Sirá o-ri kámbé ne o-sét Ébarahâm o/fu, ró ósóng-wǎn-onyinyi mún ne wǎn emen. Wǎn mú onyinyi mún oo*man o-koo kaǎcê-esang eyên nang kabónge ńké Ázik mú wǎn ejí o/chi o-ryí bukyû*.

¹¹ Ńkyín kyi*da/nyîn Ébarahâm* ké nǎ, Éshimal o/mû to wǎn emen.

¹² Nké Osówo o/sét Ébarahâm o/fu, *dachi a-kérê kyi-kim ne mú wǎn-onyinchéng ne Héga mú ósóng eyên*. Chi nang ebóng ńkyí Sirá o/sét ǒ, ké nǎ, ké bubwô-Ázik nké wo a/chi a-já kyikû-banet ńkyí me n/ryí ǒ ocím.

¹³ Me n/chi n-kye to wǎn mú ósóng eyên bwǎn chwóó ḿbé ba/chi ba-firi oshê. Nyǐ to o-chi i wǎn eyên.

¹⁴ Ké orî-dyicí, ké dyicófóróng pirípirí, Ébarahâm o/kye Héga byiryíng ne kyiféng-omu. O-yip wǎn o-bwá ǎ ké esim o-ró ǎ. Héga o-dim o-yêe ng o-câ ké kyikim-dyikán ńkyí Byíshíba.

¹⁵ Ké nkéré mú omu oo/man kpók, o-bwa ne wǎn o-mîng ké kyikû-kyichí,

¹⁶ o-dim o-da-kyú me cát, o-raa ne byiko emen o/fu, mm*man ekyú nyín n-ri wǎn ejí o-kpú*. Ne [o-kpet etii.]

¹⁷ Osówo o/jwo ké wǎn mu o-tii ng, ne orím mú onong o-bwom kyíbóng o-raa ne Héga o/fu, ebóng nkyi kyi-kyâ ǒ afaníkong. *Dachi a-shî*. Osówo oo/jwo bukyû ḿbú wǎn eyên mu o-tii ng.

¹⁸ Bûu nensang a-da-kúng ǎ, a-só ǎ. N/chi n-chi kyikû-banet emen kyi-firi kiǐtí-oshê.

¹⁹ Ne Osówo o-bâa Héga achi o-ri dyijwáng. O-dim o-da-tó omu o-sú ké kyiféng emen, o-kye to wǎn emen kyicê o-jwáp.

²⁰ Osówo o/mû ne wǎn ámu ké nkéré mu o-kán n. O/kyú ké kyikim-dyikán ńkyí Páran, o-firi kiǐtí-nryuu dyikán.

²¹ Boné emen o-da-bé onyi ké Éjip o-kye ǎ.

Ocím mú Ébarahâm ne Otu Abyímélek ba/ryí ne Barî

²² Ké nkéré ámu, Otu Abyímélek o/dim ne Fyíkol mú onet-dyishí-basúja emen, o-da-sét Ébarahâm o/fu, Osówo mu ne wo ké kángkáng byěm ḿbyí amu a-chi i.

²³ Ké bubwô ámbu, ryí mě ocím nyín ké bushú-Osówo a/fu, wo aa*ba/chi a-nîm mě* nang bwǎn ejí* nang kyikû-banet ejí*. Me nn/kye ǒ ofê, ne ké bubwô ámbu, ryí mě ocím a/fu, wo to a-kyâ mě ofê ne oshê ejí mún mú amu a-kyú u.

²⁴ Ébarahâm o-raa o/fu, me nn/ryí ǒ ocím.

²⁵ Ébarahâm o-sét Otu Abyímélek kyi-kim ne dyibíng-omu ńdyí bǎmgbán-Otu Abyímélek ba/koo.

²⁶ Otu Abyímélek o-faa ǎ o/fu, n*fí n-nyît ng onet mú o/chi ńkyín*. Wo a*da mě esét kyi-kim ne nkyí*. Mbwôp kashú ejí nké mu n-jwo ng něen.

²⁷ Ne Ébarahâm kâng o-kye Otu Abyímélek etám-ebû ne bampong, ne mbé ashí afee ba-ryí ocím ne barî.

²⁸ Ébarahâm o-fîm bama-bwǎn-ebû káchâtkányi ké burwám-etám-ebû emen,

²⁹ ne Otu Abyímélek o-bí ǎ o/fu, ebóng a/chi éné.

³⁰ Ébarahâm o-faa o/fu, koo bwǎn-ebû ḿbén káchâtkányi eringe nyí ada mě ebwom ntûesé a/fu, me nké n/sím dyibíng-omu ńdyín.

³¹ Ne ba-kpet ekó kyikit ánkyi Byíshíba, ké nǎ, ányi nké mbé ashí afee ba/ryí ocím ne barî ba-sem Osówo.

³² Ké nkéré mú baa/ryí ocím mún ké Byíshíba, Otu Abyímélek ne Fyíkol ba/bwa esim Fyilíta.

³³ Ne Ébarahâm o-kwón kyichí ńkyí badakó támarik ké Byíshíba, o-kye Óburúkpâbí mú mu Osówo mú ne banyá ofê.

³⁴ Ébarahâm o/rí chwóó ké Fyilíta.