Jénésis 2 - Bokyi Bible

¹ Osówo o/chi bubóng ne esí ne kángkáng byěm ḿbyí mbyi ké mbyí byi-man.

² Ké ací káchâtkányi, ányi Osówo oo/man kángkáng bǎmkpóngé emen.

³ Osówo o/jware dyicí ńdyí ací káchâtkányi o-tî dyicí ándyi o/fu, dyijá ǎ nyǐ, ké nǎ, [ké dyicí ándyi, nyǐ o/man bǎmkpóngé emen ḿbé o/chi ejíí.]

⁴ Éné nké Osówo o/chi bubóng ne esí. Ké nkéré mú Osówo Óburúkpâbí o/chi bubóng ne esí,

Kyifát ńkyí ké Édin

⁵ byichí byi/mû byi*fí* osang-kyichí nang obónge o/mû o*da/byí ne* ké nǎ, nyǐ o/mû o*da/twóm ne omu* ne nang onet to o/mû o*fí mú odakpang byiryíng*.

⁶ Nké omu o/mû o-byí i kyísí o-cók ng esí.

⁷ Ne Osówo Óburúkpâbí o-kpere kâng ecing kyísí o-mee onet ké nyǐ, ne o-tuu bufú-dyikpen ké efâ-nzóng emen, ne onyinchéng ámu o-firi ne dyikpen.

⁸ Ne Osówo Óburúkpâbí o-chi kyifát ńkyí o/kwón byěm ké Édin, ké kyicê ńkyí esû edabyí, ne o-tî onyinchéng ámu mú o/chi ké kyifát ánkyi.

⁹ Osówo o/chi kángkáng azong-byichí ḿbyí byidanwa, ḿbyí byidazím byirim ḿbyí byinong byi-byí ké kyifát ánkyi. Kyichí ńkyí kyidakye dyikpen ne ńkyí kyidachi [onet o-nyît kyibî ne kyinong] byi/mû ké otyém-kyifát ánkyi.

¹⁰ Kace ka/mû ka-fím m ké Édin ka-sen n ka-bâ ng ekye kyifát ánkyi omu. Â a/shwôm kyifát ánkyi, kace ánke ka/kyii ka-firi buce bunyii.

¹¹ Mbwôp kashú-kace ba/mû ba-kó ng Pyíshon. Nké nke ka-sen n ké esí nyí Habyíla,

¹² nyí nyi ne gûl mú onong, cibicibi ne aká nyí adashwane kasî ne bakút-kyinung ḿbé badakaa.

¹³ Nnyinyěng-kace ba-kó ng Gyíhon. Nké nké nke ka-sen n ké esí emúmú nyí Kúshi.

¹⁴ Kace ńké ké buce buchât ba-kó ng Tágiris, ńké nke ka-sen n ké kyicê ńkyí Asyírya, ńkyí esû nyi e-byí i. Ne nkuli kyikû ké buce bunyii ba-kó ng Yuférétyis.

¹⁵ Osówo Óburúkpâbí o/kúng onyinchéng ámu o-tî ǎ ké kyifát ńkyí Édin o/fu, okûkpang kánkyí, o-tún n kánkyí.

¹⁶ Ne Osówo Óburúkpâbí o-sét onyinchéng ámu o/fu, kyirim-kyichí nang kyirá ńkyí nkyi ké kyifát ńkyín a-man n eryí kánkyí,

¹⁷ nké kyirim-kyichí ńkyí kyidachi [onet o-nyît kyibî ne kyinong] *dachi a-ryí*. Dyicí ńdyí a/chi a-ryí kánkyí a/chi a-kpú.

¹⁸ Ne Osówo Óburúkpâbí o-raa kâng o/fu, kii*nwa ńkyí onyinchéng mún odakyú kǎnchí*. N/chi n-kye ǎ onet-ochwâp mú o/kwárê ne nyǐ, mú oda ǎ ekûchwáp.

¹⁹ Osówo Óburúkpâbí o-kúng kâng ecing ne o-chi kángkáng enyam nyí ké dyikán ne kángkáng bunurung ḿbú kyíbóng, o-bâ ne mbyí ké bushú-onyinchéng ámu o/fu, ofé kámbyí azîn, ne nang ebóng dyizîn ńdyí o/fé enyam nang erá, enyam ányi e/kpet ebángê éné.

²⁰ Onyinchéng ámu o/fé kángkáng byitú ne kángkáng bunurung ne kángkáng enyam nyí ké dyikán azîn, nké enyam nang ebónge e*fí nyí e/kwárê wǎ onet-ochwâp emen*.

²¹ Ne Osówo Óburúkpâbí o-chi kâng onyinchéng ámu o-róng ké kiimbâng-burê. Ne ké nkéré mú onyinchéng ámu mu o-rê ng, Osówo o-fîm ofan mú onyinchéng ámu obónge, o-bwât kyikit ánkyi o-cít.

²² Ne Osówo Óburúkpâbí o-kúng ofan mú o/fîm onyinchéng ámu o-chi onyinyi, o-kúng ǎ o-ba-kye mú onyinchéng.

²³ Ne mú onyinchéng o-raa kâng o/fu, nyín ké nkuli kyikû nké nn/ri kyikúú ńkyí kyi/fím ké byikúú ejí ne enyam-byiko nyí e/fím ké enyam-byiko ejí. Ba/chi ba-kû ǎ ekó onyinyi, ké nǎ, ba/kúng kyipang-enyam-byiko-onyinchéng ne ba-chi ǎ.

²⁴ Ké bubwô ḿbún, onyinchéng o-mîng ng bonchí ne boné o-da-cibi ne onyi emen ne mbé ashí afee ba-firi onet obónge.

²⁵ Mú onyinchéng ne onyi emen ba/mû esínábang ne éshwân e/mû e*fí e-chi i kámbé*.