Jénésis 19 - Bokyi Bible

Byibî ḿbyí Oshê mú Sódom

¹ Ké nkéré mú barím ḿbé banong ámbe ashí afee ba/ribi Sódom ké dyikurúku ándyi, Lôt o/mû o/kyú ké dyifyi ńdyí adashwôm ne a-ribi ké kafâ-oshê. Ńdyí o-ri ng orǐng kámbé o-bâ, o-bûu nensang o-da-kâm kámbé. O-tíngê kyísí ké ofê

² ne o-sét kámbé o/fu, banchí, me m/bwom nyín wǎ ḿgbán enen. Bâ n̂g ké kyise ejí. Ba-man n esoo byiká enen ba-rí nyín ne me. Ba-man n ebûu ké dyicófóróng ba-dim kyikit ńkyí bamu ba-wâa ng. Nké mbé ba/faa Lôt ba/fu, aa*wááng* be byi-rí i ké otyém-oshê.

³ Lôt o-tîm kámbé arông kanong kanong, ne ké nkuli kyikû, ba-bángê ba-dim ne nyǐ ké kyise emen. Lôt o-sét bǎmgbán emen o/fu, barám byiryíng ḿbyí byinong byinong ba-kye kámbé. Ńdyí byiryíng byi/bí, ba/kye kámbé ba-ryí.

⁴ Ne bacinbánet ámbe ba-kûrí sáre, banyinchéng-Sódom ba/bawâng kyise ba-fé ké kafâ, kángkáng banyinchéng, bakâa ne byisat ba/mû ányi.

⁵ Ba-kó Lôt, ba-bí ǎ ba/fu, banyinchéng ḿbé ba/bê ǒ enung ocinónet mbe nyá. Fîm kámbé a-kye bě. Banyinchéng-Sódom ámbe ba/mû mbe ba-ryuu ng ba/fu, mbé ba-rí i ne mbé.

⁶ Lôt o-byí kyíjí, o-cít dyifyi o-kâm kámbé,

⁷ o-sét kámbé o/fu, bacín ejí, me n/tîm běn arông, *da n̂g echi dyizong-chwǒm ánkyi ńkyí kii*nwa*.

⁸ Me mu nyín ne bwǎn-banyinyi ashí afee ḿbé ba*da/nyît ne onyinchéng*. Mîng mě n-kúng kámbé n-kye běn ba-chi nang ebóng chwǒm ńkyí kyi/kwárê běn ne mbé. Nké *da n̂g eta banet ḿbén*. Mbé ba/nung mě ocinónet, ne mm*bángê chwǒm kyi-chi kámbé*.

⁹ Nké mbé ba/nyán ǎ ba/fu, dim bě nyín ké bushú. Wo a-chi i ocinónet. Wo yeě mú ada bě esét ńkyí byidachi. Dim bě ké bushú, a*dachi a-chi byi-chi ǒ ńkyí kyi/bên kyi-shwôm ńkyí byi/chi byi-chi kámbé*. Ba-jê Lôt biǐsâ-abwô ba-shwôm ba/fu, mbé ba-da ng esé dyifyi.

¹⁰ Nké ḿbé bacinbánet ámbe ba/kuu dyifyi, ba-tut Lôt o-nung ké kafâ-kyise, ba-fín dyifyi.

¹¹ Ne bacinbánet ámbe ba-sé kángkáng banet ḿbé ba/waa kyíjí achi eringe nyí baa*ri to kyikit ńkyí dyifyi ndyi*.

Lôt o/dim ké Sódom

¹² Bacinbánet ámbe ba-sét Lôt ba/fu, â amu ne onet okíri ké oshê mún, nang bwǎn nang batyép-bwǎn eyên nang bwǎn-bané eyên bakíri, fîm kámbé ba-byí,

¹³ ké nǎ, byi-kú byi-bâ ebên oshê mún. Óburúkpâbí oo/jwo kyi-kim ne biǐtí-byibî-byěm ḿbyí banet ḿbén mbe ba-chi i, ne oo/twóm bě o/fu, be byiba-bên Sódom.

¹⁴ Ne Lôt kâng o-dim o-kâm banet ḿbé ba/fu, mbé ba-bé ng bwǎn-banyinyi emen, o-sét kámbé o/fu, dim m̂ nyín babap. Óburúkpâbí o-kú o-bâ ebên oshê mún. Nké mbé ba/mû ba/kabe ba/fu, Lôt mu o-chi i ayâa.

¹⁵ Ńdyí dyicófóróng dyi/cé, barím ḿbé banong ámbe ba/tírîng Lôt ba/fu, chi babap. Kúng onyi eyên ne bwǎn eyên ashí afee ba-byí ké oshê mún eringe nyí baa*ba/chi ba-kpú ké nkéré byi-kú byi-bên n kámú*.

¹⁶ Lôt o/mû o*fí o-bángê e edim*. Nké Óburúkpâbí o/ri ǎ bafip, ne banyinchéng ámbe ba-níbî ǎ ne onyi emen ne bwǎn emen ké abwô ba-byí ké Sódom.

¹⁷ Orím mú onong obónge o-sét kámbé o/fu, chêe n̂g ba-nyii dyikpen enen. *Da n̂g etún achi ké esim* ne *da n̂g ebwom ké owo*. Chêe n̂g ba-jâ ké eku eringe nyí baa*kpú*.

¹⁸ Nké Lôt o/faa o/fu, aa*wááng* ǎ bonchí*.

¹⁹ Wo aa/chi mě kiǐtí-chwǒm, a-nyii dyikpen ejí. Nké eku e/jang etíbî. Afaníkong ányi a/chi a-kâm mě ké bukwóp, ne n/chi m-kpú ne n-ribi áku.

²⁰ Amu a-ri ng kaǎshê ánke? Nke jwángjwáng. Mîng mě n-jâ ányi. Ka*da/rêe* ne chwǒm kii*chi mě*.

²¹ Orím mú onong ámu o-faa ǎ o/fu, kyi/nwa, me m/bángê. Mm*ba/chi m-bên oshê ámu*.

²² Zóngê ochéé babap. Mm*man echi chwǒm* tete a-ribi áku. Ké nǎ, Lôt o/kó oshê ámu, kaǎshê, ba/kpet ekó kámú, Zówa.

Osówo o/bên Sódom ne Gomóra

²³ Esû e/mû e-kú e-byí i ńdyí Lôt o/ribi Zówa.

²⁴ Ké abe ányi, Óburúkpâbí o-twóm aká nyí aa/sóng okwâ a-bwam shéét ké Sódom ne Gomóra,

²⁵ o-shí kányí kángkáng ne owo, cibicibi ne kángkáng banet ḿbé ba/mû ké nyǐ ne kángkáng byichí ḿbyí byi/mû ké esí ányi.

²⁶ Nké onyi-Lôt o/bírî achi ké esim, ne Osówo o-chi ǎ o-bírî kyirim-bano.

²⁷ Ké dyicófóróng pirípirí, Ébarahâm o/dim ochéé óchee o-ca ké kyikit ńkyí o/mû o/bwom ké bushú ḿbú Óburúkpâbí.

²⁸ O-bírî achi o-tún ké Sódom ne Gomóra ne owo omúmú, ne o-ri arúkwâ ké nyi a-byí i ké byikit ámbyi wǎ arúkwâ nyí adabyí ké nkéré aro adamang.

²⁹ Nké ké nkéré mú Osówo o/bên eshê nyí ké owo nyí Lôt o/mû o-kyú u, Ébarahâm o/mû ǎ ké dyityém, ne o/mîng Lôt o-chêe o-fem.

Kiimkpet Kyikû ńkyí Banet ḿbé Mówep ne Ámon

³⁰ Ké nǎ, Lôt o/mû mu o-shî ng ekyú ké Zówa, nyǐ ne bwǎn emen ḿbé banyinyi ashí afee ba/yú ba-jâ ké eku ba-kûkyú ké bucim.

³¹ Mú wǎn-onyinyi mú okínkán o-raa ne nche emen o/fu, bonchí eten o-kú o-kâa ng ne banyinchéng ba*fí to ké [esí ńnyín emúmú] ḿbé bada bě echîbé* ne byi-chi byi-fwon bwǎn*.

³² Bâ byi-kye bonchí eten bato o-jwáp o-kûbwóm eringe nyí odarí ne be byi-fwon bwǎn.

³³ Ké buchú ámbu, ba/kye Lôt bato o-jwáp, mú okínkán o-da-rí ne nyǐ. Nké Lôt o/mû o/jang ejwáp bato ḿbé o*da/nyît ńkyí kyi/chi*.

³⁴ Ké orî-dyicí mú okínkán o-sét nche emen o/fu, me n/rí ne nyǐ ké buchú ḿbú bu/shwôm nyín. Mîng byi-chî ǎ echi o-jwáp bato ḿbé odabwóm kurún, eringe nyí wo to adarí ne nyǐ. Â byi/chi éné, be ashí amúmú byi/chi byi-fwon bwǎn ne nyǐ.

³⁵ Ké buchú ámbu kâng, ba/chî ǎ echi o-bwóm bato, ne mú wǎsíng o-da-rí ne nyǐ. Bato ba/chî ǎ ebwóm ḿbé o*da/nyît ńkyí kyi/chi*.

³⁶ Éné nké bwǎn-Lôt ba/chi ne ba-koo afít ashí amúmú ne bonchí ebe.

³⁷ Wǎn emen mú okínkán o/fwon wǎn-onyinchéng mú o/fé ǎ dyizîn, Mówep. Nyǐ nké o/mû bonchí mú banet ḿbé Mówep ḿbé kántîk.

³⁸ Nche emen o-fwon to wǎn-onyinchéng mú o/fé ǎ dyizîn, Bénámyi. Nyǐ nké o/mû bonchí mú banet ḿbé Ámon ḿbé kántîk.