Jénésis 18 - Bokyi Bible

Osówo o/ryí Ébarahâm Ocím o/fu, o/chi o-fwon Wǎn-Onyinchéng

¹ Óburúkpâbí o/byí o-kâm Ébarahâm ké byichí-ociring ḿbyí Mámare. Ńdyí Ébarahâm o/kyú me ké ocím-mpyep emen mú o/bi ké byídí, ńdyí esû ee/kán,

² o/bírî achi o-ri banyinchéng ashí achât ké ba/bwom ányi. Ńdyí o-ri ng kámbé o-bâ, o/zóngê o-kâm kámbé, o-tíngê o-ta mbwô kyísí, o-raa ne mbé

³ o/fu, *da n̂g eshwôm baa*ján ké kyise ejí*. Me mu nyín mú ndakyú ḿgbán enen.

⁴ Mîng m-bâ ne omu mú badasoo byiká. Ba-man n ejáng ké kyikû-kyichí ńkyín.

⁵ N/chi m-bâ běn to ne onyin-byiryíng. Byi/chi byi-kye běn busa ḿbú badace kashú ne bucen enen. Baa/kye mě ofê mú ba/bê ké kyise ejí, ne ké bubwô ámbu, n-kyú u ḿgbán enen. Mbé ba-faa ba/fu, asǎma, be byi/bángê.

⁶ Ébarahâm o-dim ochéé óchee o-da-nung ké mpyep emen, o-sét Sirá o/fu, bûu babap a-kúng filáwa eyên mú o/nwa o-shwôm a-chi berêt.

⁷ Ne o-zóngê kâng o-ca ké byitú emen o-da-fîm kyisu-mpong ńkyí nkyi ne bafwám ké byiko o-kye ḿgbán emen mú o/ju kánkyí o-rám ochéé óchee.

⁸ Ébarahâm o-kúng abî-mpong ne byiryíng ámbyi o-kye banet ámbe. O/kúng kámbyí nyǐ oyén o-da-kye kámbé ké kyikû-kyichí ba-ryí.

⁹ Banyinchéng ámbe ba-bí ǎ kâng ba/fu, Sirá mú onyi eyên mu nyá. Nyǐ o-faa o/fu, mu áku ké kafâ-mpyep.

¹⁰ Onet obónge ké burwám ebe o-raa o/fu, [ké etukáku kátángekányi nyí nyi e-bâ,] n/chi m-bwa esim, onyi eyên o/chi o-fwon wǎn-onyinchéng. Sirá o/mû o/bwom onyinchéng ámu ké esim, ké esim-dyifyi-kaampyep mu o-fwôo ng atông.

¹¹ Ébarahâm ne Sirá mú onyi emen ba/mû baa/kâa kanong kanong, ne Sirá o/mû o*fí to o-ri ng baróng*.

¹² Ne Sirá kâng o-jwó ké dyityém o/fu, kántîk mú me nn/kâa n-có n-chî ng ejwo bunyîn-karíng-onyinchéng? Bwa kwán, otyép ejí oo/kâa o-shwôm.

¹³ Ne Óburúkpâbí o-bí kâng Ébarahâm o/fu, ebóng ńkyí Sirá o/jwó o-raa o/fu, me n-chî ng eman efwon wǎn? mú nn/kâa něen kpó?

¹⁴ Chwǒm nkyi kô ńkyí Óburúkpâbí oo*man echi*? Wǎ eringe nyí n/raa, ké etukáku kátángekányi, n-chî ng ebwa esim nyín, ne Sirá o/chi o-fwon wǎn-onyinchéng.

¹⁵ Ké nǎ, Sirá o/mû mu o-shî ng, o/né o/fu, nyǐ o*da/jwó*. Mú onyinchéng ámu o-faa ǎ o/fu, a/jwó.

Ébarahâm o/tîm Osówo Arông kyi-kim ne Sódom

¹⁶ Ne banet ámbe kâng ba-dim ba-da-bwom ké kyikit ńkyí badaman eri Sódom. Ébarahâm o/dim ne mbé o/fu, nyǐ o-sí ng kámbé.

¹⁷ Ne Óburúkpâbí o-raa ne byiko emen o/fu, mm*ba/chi n-rôo Ébarahâm ńkyí mu m-bâ ebachi*.

¹⁸ Kyikû-banet emen kyi/chi kyi-firi kiǐtí-oshê, ne [ké bubwô emen, n/chi n-jware ejíí emúmú.]

¹⁹ Me nn/cá ǎ eringe nyí o/chi o-sét bwǎn emen ne kyikû-banet emen ba-kye mě ofê, ba-chi ńkyí nkyi kanong. Â ba/chi, n/chi n-chi ǎ kángkáng byěm ḿbyí n/ryí ǎ ocím.

²⁰ Ne Óburúkpâbí o-raa kâng ne Ébarahâm o/fu, me nn/jwo byibî-byiraa chwóó kyi-kim ne Sódom ne Gomóra, ne byibî ebe byi/rêe kanong kanong.

²¹ M-man n-ca n-da-kyé kyikû n-nyît â ńkyí ba/sét kyi-kim ne mbé nkyi ké kafâ.

²² Ne banyinchéng ámbe ashí afee ba-dim ba-wâa ḿbú Sódom, nké Óburúkpâbí o/waa ányi ne Ébarahâm.

²³ Ébarahâm o/tín o-fárâng Óburúkpâbí, o-bí ǎ o/fu, ké ntûntû, wo a/chi a-ju banet ḿbé ba*da/chi kyibî*? cibicibi ne ḿbé ba/chi kyibî?

²⁴ Â banet ḿbé mbe kanong ké oshê ámu mbe bajam bafee esim diǐkpú, wo a-bên n oshê omúmú? Wo aa*ba/chi a-mîng kámú*? eringe nyí adanyii banet ḿbén bajam bafee esim diǐkpú ḿbé mbe kanong*?

²⁵ Wo aa*ba/chi a-ju banet ḿbé mbe kanong* cibicibi ne ḿbé ba*fí kanong*. Ńkyí nkyí kii*nwa echi*. Wo aa*man a-chi éné*. Â a/chi éné, a/chi a-ju banet ḿbé banong, cibicibi ne ḿbé byibî. Kii*nwa echi*. Nkêt mpan mú ejíí emúmú oo*man eryí acît*.

²⁶ Óburúkpâbí o-faa o/fu, â me n/ri banet ḿbé banong ké Sódom ashí bajam bafee esim diǐkpú, m-mîng ng oshê ámu ebên ké bubwô ebe.

²⁷ Ébarahâm o-chîraa o/fu, pwoo mě ké dyityém ejí ńdyí mu n-chî ng ecíp n-raa ne wo, ǎ Óburúkpâbí. Me n*fí chwǒm kyikíri* kyi-cibi ne onet* ne m/mû n*fí ne bukwóp ḿbú ndafaa ojá*.

²⁸ Nké kakíri banet ḿbé mbe kanong ba*fí bajam bafee esim diǐkpú* mbe bajam bafee esim batánge. Wo a-man n ebên oshê omúmú â banet batánge ba*fí ké burwám ámbu*? Óburúkpâbí o-faa o/fu, â n/ri banet ḿbé banong bajam bafee esim batánge, mm*bên to oshê ámu*.

²⁹ Ébarahâm o-chîraa o/fu, katô mbe ashí bajam bafee. Óburúkpâbí o-faa ǎ o/fu, mm*ba/chi m-bên kámú* â mbe ashí bajam bafee*.

³⁰ Ébarahâm o-raa o/fu, kamgbe, *dasa kafâ* ǎ Óburúkpâbí* m-man n-chîraa. Wo a-chi i nǎ, â mbe bujam esim diǐkpú nké nke. Nyǐ o-faa o/fu, mm*bên kámú* â n/ri ashí bujam esim diǐkpú*.

³¹ Ébarahâm o-raa o/fu, kamgbe, pwoo mě, ǎ Óburúkpâbí, ké dyityém ejí ńdyí mu n-chî ng ecíp n-raa ng ne wo. Â wo a/ri ashí bujam nké nke kâng. Nyǐ o-faa ǎ o/fu, mm*bên kámú* â n/ri ashí bujam*.

³² Ébarahâm o-raa o/fu, kamgbe, *dasa kafâ* ǎ Óburúkpâbí* n-chî ng eraa kabónge nké nke. Â wo a/ri diǐkpú kâng nké nke. Nyǐ o-faa o/fu, mm*ba/chi m-bên kámú* â mbe ashí diǐkpú.

³³ Ké nkéré mú oo/man bapem ne Ébarahâm, Óburúkpâbí o/dim o-mîng ǎ, ne Ébarahâm o-bwa dyijê.