Jénésis 17 - Bokyi Bible

Dyicên dyi/bwom wǎ Ekap nyí Ocím eryí

¹ Ńdyí Ébaram oo/rí bajam-aje banyii esim onyiryiká ne anyii, Óburúkpâbí o/byí o-kâm ǎ o-raa ne nyǐ o/fu, me n-chi i Osówo mú o/rêe o-shwôm. Kûchi ńkyí nda ǒ esét, a-chi ńkyí nkyi kanong kángkáng nkéré.

² Me n/chi n-ryí ocím ejí ne wo n-kye ǒ bwǎn chwóó.

³ Ébaram o-tím arông kyísí o-ta mbwô ké ecing, ne Osówo o-sét ǎ o/fu,

⁴ me mu n-ryí i ocím mún ne wo. Me n/ryí ocím n/fu, wo a/chi a-kyú bonchí mú eshê chwóó.

⁵ Wo aa*bángê to Ébaram* a-kû ng ebángê Ébarahâm, ké nǎ, me mu n-chi i ǒ a-firi bonchí mú eshê chwóó.

⁶ Me n/chi n-kye ǒ bwǎn chwóó ne kyicê ba/chi ba-kyú batu. Wo a/chi a-já bwǎn ḿbé ba/chi ba-jê chwóó ba-firi banchí ḿbé byikû-banet.

⁷ Me n/chi n-tî ocím ejí mú n/ryí ne wo ne bwǎn eyên ké nkéré mú mu o-bâ ké kashú, ne o/chi o-waa ne banyá. Me n/chi n-kyú Osówo eyên ne mú bwǎn eyên.

⁸ Me n/chi n-kúng esí ńnyín nyí amu ké nyǐ kántîk wǎ ocinónet n-kye ǒ ne bwǎn eyên. Esí emúmú nyí Kínan e/chi e-kyú nyí bwǎn eyên ne banyá ne banyá, ne me n/chi n-kyú Osówo ebe.

⁹ Osówo o-raa ne Ébarahâm o/fu, wo to a-man a-bángê a/fu, wo a-tî ng ocím mún mú a/chi a-ryí ne me, wo ne bwǎn eyên ḿbé a/chi a-fwon.

¹⁰ Wo ne bwǎn eyên ba-man ba-bángê ba/fu, ben ba-kû ng ecên bwǎn enen ḿbé banyinchéng.

^11-12 Kyi-fím kántîk kyi-ca kashú, ba-man ba-cên wǎn-onyinchéng nang orá mú ba/fwon ǎ o-rí ací nyíryinyi, cibicibi ne básóng ḿbé badafwon ké byise enen ne ḿbé badaré kyíjí. Ńkyín kyi/chi kyi-tông kyi/fu, be byi/ryí ocím ne barî.

¹³ Ba-man ba-cên nang wǎn orá, ne ńkyín kyi/chi kyi-tông ekap nyí badari wááng ba/fu, ocím ejí mú n/ryí ne ben o-waa ng ne banyá.

¹⁴ Nang wǎn-onyinchéng orá mú ba*da ǎ ecên* mm*ba/chi n-kúng ǎ wǎ wǎn ejí* ké nǎ, o*da/tî ocím mú o/ryí ne me*.

¹⁵ Osówo o-sét Ébarahâm o/fu, aa*kó to onyi eyên Sára*. Kyi-fím kántîk kyi-ca kashú, a-man a-kû ǎ ekó Sirá.

¹⁶ Me n/chi n-jware ǎ, ne o/chi o-fwon ǒ wǎn-onyinchéng. Me n/chi n-jware ǎ, ne o/chi o-firi boné mú eshê, ne bwǎn emen ba/chi ba-kyú batu.

¹⁷ Ébarahâm o-tíngê kyísí o-ta mbwô ké ecing, nké o/kpet ejwó ńdyí o/bí dyityém emen o/fu, onyinchéng mú oo/rí bajam-aje batánge o-chî ng eman efwon wǎn? Sirá mú oo/rí bajam-aje banyii esim diǐkpú o-chî ng eman efwon wǎn?

¹⁸ O-bí Osówo o/fu, ebóng Éshimal oo*ryí mě bukyû*.

¹⁹ Nké Osówo o/faa ǎ o/fu, aa*wááng*. Sirá mú onyi eyên o/chi o-fwon ǒ wǎn-onyinchéng mú a/chi a-fé ǎ dyizîn ńdyí badakó Ázik. N/chi n-tî ocím ejí mú n/ryí ne nyǐ ne bwǎn emen, mú o/chi o-waa ne banyá.

²⁰ Me nn/jwo ńkyí a/bí mě kyi-kim ne Éshimal. Ké bubwô ámbu, me n/chi n-jware ǎ n-kye ǎ bwǎn ne kyikû-banet chwóó. Nyǐ o/chi o-kyú bonchí mú batu ashí diǐkpú ne afee, ne n/chi n-chi kyikû-banet emen ba-firi kiǐtí-oshê.

²¹ Nké n-tî ng ocím ejí mú n/ryí ne Ázik mú wǎn eyên, mú Sirá o/chi o-fwon nkéré mún, ké dyije ńdyí ndyi dyi-bâ ké kashú.

²² Ké nkéré mú Osówo o/man bapem ne Ébarahâm, o/dim o-mîng ǎ.

²³ Ké ochíchí-dyicí ándyi, Ébarahâm o/chi ńkyí Osówo o/sét ǎ, o-cên wǎn emen Éshimal ne bwǎn-banyinchéng kángkáng ḿbé ké kyise emen, cibicibi ne básóng ḿbé ba/fwon ké kyise emen ne ḿbé o/ré oréng.

²⁴ Ébarahâm o/mû oo/rí bajam-aje banyii esim-aje onyiryiká ne anyii ńdyí ba/cên ǎ,

²⁵ ne Éshimal mú wǎn emen o/mû oo/rí aje diǐkpú ne achât.

²⁶ Ba/cên kámbé dyicí dyibónge

²⁷ ne kángkáng básóng ḿbé Ébarahâm.