Jénésis 15 - Bokyi Bible

Ocím mú Osówo o/ryí ne Ébaram

¹ Ńdyí ńkyín kii/shwôm, Ébaram o/ri chwǒm-akat ne o-jwo Óburúkpâbí ké o/raa ne nyǐ o/fu, Ébaram, *dachi a-shî*. Me n/chi n-ku ǒ ké afaníkong, n-kye ǒ kiǐtí-eyáré.

² Nké Ébaram o/faa o/fu, Óburúkpâbí, mú mu Otu Kyítá, ebóng kanong ńké eyáré eyên eda mě ekye, me wǎn o*fí mě*. [Onet mú o/chi o-ryí mě bukyû kántîk, ányi Elyěze mú o/fím Damásákus.]

³ Wo a*da mě ekye wǎn* ne ósóng ejí obónge nké o/chi o-ryí byěm ejí.

⁴ Óburúkpâbí o-chîraa ne nyǐ o/fu, Elyěze mú ósóng mún oo*ryí byěm eyên*. Ochíchí-wǎn eyên nké o/chi o-ryí ǒ bukyû.

⁵ Óburúkpâbí o-kúng ǎ o-byí kyíjí, o-sét ǎ o/fu, bírî achi kyíbóng a-kan epan ékpére nyí nyi ké mbú. Bwǎn eyên ba/chi ba-jê jangjang wǎ ékpére ányi.

⁶ Ébaram o/fé dyityém ne Óburúkpâbí, ne ké bubwô ḿbún, kyi/nyîn Óburúkpâbí ne nyǐ, ne o-koo ǎ.

⁷ Ne Óburúkpâbí o-raa kâng ne Ébaram o/fu, me n-chi i Óburúkpâbí mú n/tông ǒ kiǐfáng a-dim ké Ô, ké Bábyílon, n/fu, n-kyâ ǒ esí ńnyín e-firi nyí eyên.

⁸ Nké Ébaram o/bí ǎ o/fu, Óburúkpâbí, mú mu Otu Kyítá, me n-cen n nǎ ne n-nyît n/fu, esí ńnyín e/chi e-kyú nyí ejí.

⁹ Óburúkpâbí o-faa ǎ o/fu, bâ mě ne byěm ḿbyín, ḿbyí bii/rí aje achât, ebû ne otyítǎm ne mpong ne ámalê ne kaatǒmtǒm.

¹⁰ Ébaram o-bâ ne byěm ámbyi, o-kyii kámbyí byicê byifee byifee, o-tî kámbyí byifee byifee ké etáng efee. Nké o*da/kyii boǒnúrúng*.

¹¹ Biinfuu akun byi-bâ enyam ányi ebaryí, nké Ébaram o/ró kámbyí.

¹² Ké nkéré mú esû e-kú e-ríbî ng, Ébaram o/róng ké kiimbâng-burê, bushî bu-róng ǎ.

¹³ Óburúkpâbí o-raa ne nyǐ o/fu, bwǎn eyên ba/chi ba-kyú bacinbánet ké esí nyí e*fí nyí ebe*. Ba/chi ba-kyú básóng ké esí ányi, ne ba/chi ba-tî kámbé ké kyibî-dyikpen ké égot-aje efee.

¹⁴ Nké n/chi n-kye oshê mú o/chi o-tî kámbé wǎ básóng busông. Ne ké nkéré ba/chi ba-dim ké esí ányi nyí e*fí nyí ebe* ba/chi ba-wuri esang chwóó ba-dim ne nyǐ.

¹⁵ Wo oyén a/chi a-kán a-kâa, a-kpú bukyû ḿbú bunong, ba-ryii ǒ.

¹⁶ Kyi/chi kyi-rí ńkyí ba/chi ba-fwon byitông-banet byinyii ne bwǎn eyên ba-bwa esim nyín, ké nǎ, mm*ba/chi n-ró banet ḿbé Ámórit* tete byibî ebe byi-jê chwóó ḿbyí ndakye kámbé busông.

¹⁷ Ké nkéré mú esû ee/ríbî, kyifip kyi-jîi, katí ńké arúkwâ nyi a-byí i ké nké ne buka ḿbú ba/mee okwâ byi-byí byi-shwôm ochéé óchee ké otyém ne otyém mú byicê-enyam ámbyi.

¹⁸ Ké dyicí ándyi kâng nké Óburúkpâbí o/ryí ocím ne Ébaram o/fu, me n/ryí ocím n/fu, n-kyâ bwǎn eyên esí ńnyín kyi-fím ké buti ḿbú Éjip tete kyi-ribi ké kace ńké Yuférétyis,

¹⁹ cibicibi ne esí nyí banet ḿbé Kên ne ḿbé Kénez ne ḿbé Kádámonit

²⁰ ne ḿbé Hêt ne ḿbé Périzit ne ḿbé Réfyam

²¹ ne ḿbé Ámórit ne ḿbé Kínan ne ḿbé Gyígashit ne ḿbé Jébus.