Jénésis 13 - Bokyi Bible

Ébaram ne Lôt ba/pap Barî

¹ Ébaram o/bírî kyicê ńkyí bushûyû o-byí o-mîng Éjip, o-ribi busyísen-Kínan ne onyi emen ne kángkáng byěm ḿbyí o/mû ne mbyí. Lôt o-dim ne nyǐ ké kyikû.

² Ébaram o/mû o/firi nfang-onet ne ebû ne bampong ne akpuga.

³ Ne o-dim ké kyikit ánkyi o-yêe ng o-câ ḿbú Bétel. O-ribi ké otyém ne otyém mú Bétel ne Áyi, ké kyikit ńkyí o/mû o/bi boompyep emen

⁴ ne kyikit-kyifen echi kpákpá. Ányi nké Ébaram o/fé Óburúkpâbí.

⁵ Lôt to, mú o/dim ne nyǐ ké kyikû, o/mû ne ebû ne bampong ne kyikû-banet emen ne bǎmgbán emen.

⁶ Ké bubwô ámbu kâng, kyikit ńkyí byitú ebe byidaryí baryî kyi*da/chîjê* ńkyí mbé badakyú kyikit kyibónge* ké nǎ, byitú ebe byi/mû bii/jang ejê byi-shwôm.

⁷ Ne bushwôn bu-róng banet ḿbé mbe ba-tún n byitú ḿbyí Ébaram ne ḿbé mbe ba-tún n ḿbyí Lôt. Ké nkéré ámu, banet ḿbé Kínan ne Périzit ba/mû ba/tôong ba-kyú u ké esí ányi.

⁸ Ne Ébaram o-raa ne Lôt o/fu, me ne wo byi/fím. Kyi*da/nwa ńkyí banet eyên ne ḿbé ejí badakûshwôn ne barî*.

⁹ Kyi-nwa ng ńkyí byidapap barî. Fîm kyicê-esí ńkyí kyi/nyîn ǒ, a-jâ kyicê kyibónge, me to n-kúng kyicê kyibónge.

¹⁰ Lôt o-tún o-ri o/fu, kángkáng esí nyí ké bukô-kace ńké Jódan, tete kyi-ribi ké Zówa, nyi ne omu chwóó wǎ kyifát ńkyí Óburúkpâbí, ne wǎ esí nyí Éjip. Ńkyín kyi/mû ké nkéré mú Óburúkpâbí o*da/bên ne Sódom ne Gomóra*.

¹¹ Ne Lôt kâng o-kúng kángkáng esí nyí kace ńké Jódan, o-dim o-jâ ké kyicê ńkyí esû nyi e-byí i. Éné nké Ébaram ne Lôt ba/cen ne ba-pap barî.

¹² Ébaram o/waa ké esí nyí Kínan, Lôt o-kyú ké eshê nyí bukô-kace, o-bi boompyep emen ḿbú badabi ké byídí fáráng ne Sódom,

¹³ mú banet-oshê ámu ba/mû baa*nwa* ne ba/mû ba-chi i byibî ba-bât ng Óburúkpâbí.

Ébaram o/dim o-jâ Héboron

¹⁴ Ké nkéré mú Lôt oo/dim, Óburúkpâbí o/raa ne Ébaram o/fu, bwom ké kyikit ńkyí amu, a-kpúrî kángkáng byikit a-ri.

¹⁵ Me n/chi n-kye ǒ ne bwǎn eyên kángkáng esí nyí amu a-ri ng. E/chi e-kyú nyí enen ne banyá.

¹⁶ Me n/chi n-kye ǒ bwǎn ḿbé onet nang obónge oo*man epan*. Kyi/chi kyi-kyú wǎ onet mú o/chi o-kan o/fu, nyǐ o-pan n boochi-édúkǎndú ḿbú mbu ké ejíí emúmú.

¹⁷ Dim kâng a-da-ri esí ányi emúmú, ké nǎ, me n/chi n-kye ǒ kányí kángkáng.

¹⁸ Ne Ébaram o-zú kâng boompyep emen o-da-bi fáráng ne byichí-ociring ḿbyí Mámare ké Héboron, ne o-bi kyikit-kyifen echi ányi o-tî Óburúkpâbí.