Jénésis 12 - Bokyi Bible

Osówo o/kó Ébaram

¹ Óburúkpâbí o/sét Ébaram o/fu, mîng oshê eyên ne bwǎn-bané eyên ne kyise ńkyí bonchí eyên a-jâ ké oshê mú n/chi n-tông ǒ.

² N/chi n-kye ǒ bwǎn chwóó, ne ba/chi ba-firi kiǐtí-oshê. Me n/chi n-jware ǒ, n-chi dyizîn eyên dyi-kyú kiǐtí, eringe nyí badakúng kándyí ne ba-jware banet.

³ Me n/chi n-jware banet ḿbé ba/chi ba-jware ǒ, n-shú banet ḿbé ba/chi ba-shú ǒ. [Ne ké bubwô eyên, n/chi n-jware ejíí emúmú.]

⁴ Ké nkéré Ébaram oo/rí bajam-aje bachât esim onyiryiká, nyǐ o/dim ké Háran wǎ eringe nyí Óburúkpâbí o/sét ǎ o/fu, odim, Lôt o-dim to ne nyǐ ké kyikû.

⁵ Ébaram o/yip Sára mú onyi emen ne Lôt mú wǎn-boné emen ne kángkáng esang nyí ba/já ne básóng ḿbé ba/ré ké Háran ba-dim esí nyí Kínan. Ńdyí ba/ribi Kínan,

⁶ Ébaram o/cen ké esí ányi tete o-ribi ké kyichí-ociring ńkyí Móre, ké kyikit ńkyí kyi/já Osówo, ké Shékem. Ké nkéré ámu, banet ḿbé Kínan ba/mû ba/tôong ba-kyú u ké esí ányi.

⁷ Óburúkpâbí o/byí o-kâm Ébaram o-raa ne nyǐ o/fu, oshê mún nké n/chi n-kye kyikû-banet eyên. Ne Ébaram o-bi kyikit-kyifen echi o-tî Óburúkpâbí mú o/byí o-kâm ǎ.

⁸ Ńdyí o/bi kánkyí, o/dim ḿbú busyísen o-byí ké esí nyí eku éku nyí e/mû ké kyicê-Bétel ńkyí esû edabyí, o-da-bi boompyep emen ḿbú badabi ké byídí, ké otyém ne otyém mú Bétel ne Áyi. O/bi to kyikit-kyifen echi ányi ńkyí o/mû o-fâ Óburúkpâbí.

⁹ Ne o-dim ányi, o-yángê e eshê o-câ ké busyísen-Kínan.

Ébaram o/dim o-jâ Éjip

¹⁰ Nké esong e/baróng ké Kínan nyí e/chi Ébaram o-dim o-cen tete o-ribi Éjip, o/fu, nyǐ o-da ng ekyú áku ké kyikim-nkéré.

¹¹ Ké nkéré mú o-kú o-bâ enyáng buti o-ribi ké Éjip, Ébaram o-raa ne Sára mú onyi emen o/fu, wo a-chi i onyinyi mú mu o-nwa ng bunong.

¹² Â banet ḿbé Éjip ba/ri ǒ, ba-kabe ng ba/fu, wo a-chi i onyi ejí, ba/chi ba-ju mě ba-mîng ǒ.

¹³ Sét kámbé a/fu, wo a-chi i wǎn-boné ejí, ne ké bubwô eyên, ba/chi ba-mîng mě m-kpen, ba-tî mě kanong.

¹⁴ Ké nkéré mú Ébaram o/nyáng buti o-ribi ké Éjip, banet ḿbé Éjip ba/ri onyi emen wǎ onyinyi mú mu o-nwa ng bunong.

¹⁵ Kyicê-banet-ashí-bǎmkpóngé ḿbé kyibám ńkyí otu ba/ri ǎ, ne ba-da-sét otu eringe nyí Sára mu o-nwa ng bunong. Ne ba-kúng ǎ kâng ba-jâ ne nyǐ ké kyibám-otu ámu.

¹⁶ Ké bubwô-Sára, otu mú Éjip o/tî Ébaram kanong, o-kye ǎ azu-etám-ebû ne ebúbǔu ne bampong ne boonyam-atû ne básóng.

¹⁷ Nké ké nǎ, otu o/kúng Sára o-fé dyibé, Óburúkpâbí o/twóm byibî-byirwóm byi-kâm otu ámu ne banet ḿbé mbe ké kyibám emen.

¹⁸ Ne otu ámu o-twóm o/fu, Ébaram obâ, ne o-bí ǎ o/fu, ebóng ńkyí wo a/chi mě něen. Ebóng a*da mě esét a/fu, Sára o-chi i onyi eyên*.

¹⁹ Ebóng a/sét mě a/fu, o-chi i wǎn-boné eyên, a-chi mě n-kúng ǎ n-fé dyibé. Kúng onyi eyên a-byí a-ca kyíjí.

²⁰ Otu ámu o-kye busa ba-ró Ébaram o-byí ké oshê, cibicibi ne onyi emen ne kángkáng byěm ḿbyí o/mû ne mbyí.