Jénésis 11 - Bokyi Bible

Kiǐnyáám-Kyise-Mbâm ńkyí Bábyílon

¹ Ké kiimkpet kyikû, banet ḿbé ké ejíí emúmú ba/mû ba-raa ng ejá ebónge.

² Ké nkéré mbe ba-yêe ng ba-bâ ké kyicê ńkyí esû edabyí, ba/baribi ké kyikit ńkyí nkyi ndege ńdege ké Bábyílon, ne ba-waa ányi.

³ Ba-raa ne barî ba/fu, bâ n̂g byi-chi bolôk byi-fwá kámú ké okwâ o-shwane. Ne ba-chi kâng bolôk ne kotá mú odacibi kámú kyikit kyibónge.

⁴ Ne ba-raa ba/fu, bâ n̂g byi-bi oshê ne kiǐnyáám-kyise-mbâm ńkyí kyidata bubóng, eringe nyí byidatî dyizîn ne bii*pwôo to byiryibyiryi ké ejíí emúmú*.

⁵ Ne Óburúkpâbí o-shû kâng kyísí o/fu, nyǐ o-bâ ng eri oshê ne kyikit-mbâm ńkyí banet ámbe ba/bi,

⁶ ne o-raa o/fu, banet ḿbén mbe banet babónge, ne mbe ba-raa ng ejá ebónge. Nyín kiimkpet kyikû-byěm ḿbyí ba/chi ba-chi. Ké kaǎnyín-nkéré, ba/chi ba-kpet echi nang ebóng ńkyí kyi/nyîn kámbé.

⁷ Byishû n̂g kyísí byi-da-chwábê ejá ebe nyí mbe ba-raa ng, eringe nyí baa*jwo to barî*.

⁸ Ne Óburúkpâbí o-chi kámbé kâng ba-pwôo byiryibyiryi ké ejíí emúmú, ne ba-mîng oshê ámu ebi.

⁹ Ba/mû ba-kó ng oshê ámu Bábyílon, ké nǎ, ké oshê ámu nké Óburúkpâbí o/chwábê ejá ebónge nyí kángkáng banet ba/mû ba-raa ng ne o-byiryi kámbé ké oshê ámu, ba-pwôo byiryibyiryi ké ejíí emúmú.

Kyikû-Banet ńkyí Shêm

¹⁰ Nyín kyikû-banet ńkyí Shêm. Ńdyí kii/shwôm aje afee nyí buce bu/sú bu-cít ejíí, ké nkéré mú Shêm o/mû oo/rí bajam-aje batánge, o/fwon wǎn-onyinchéng mú odabángê Apákáshat.

¹¹ Ńdyí o/fwon Apákáshat, o/chîrí égot-aje efee ne bajam-aje batánge, o-chîfwon bwǎn bakíri.

¹² Ńdyí Apákáshat o/rí aje bujam esim onyiryiká, o/fwon wǎn-onyinchéng mú odabángê Shéla.

¹³ Ńdyí o/fwon Shéla, o/chîrí égot-aje efee ne aje achât, o-chîfwon bwǎn bakíri.

¹⁴ Ńdyí Shéla o/rí aje bujam esim diǐkpú, o/fwon wǎn-onyinchéng mú o/mû o-bángê e Ebá.

¹⁵ Ńdyí o/fwon Ebá, o/chîrí égot-aje efee ne aje achât, o-chîfwon bwǎn bakíri.

¹⁶ Ńdyí Ebá o/rí aje bujam esim diǐkpú ne anyii, o/fwon wǎn-onyinchéng mú o/mû o-bángê e Pélek.

¹⁷ Ńdyí o/fwon Pélek, o/chîrí égot-aje efee ne aje bujam esim diǐkpú, o-chîfwon bwǎn bakíri.

¹⁸ Ńdyí Pélek o/rí aje bujam esim diǐkpú, o/fwon wǎn-onyinchéng mú o/mû o-bángê e Rû.

¹⁹ Ńdyí o/fwon Rû, o/chîrí égot-aje ebónge ne aje kátángekányi, o-chîfwon bwǎn bakíri.

²⁰ Ńdyí Rû o/rí aje bujam esim diǐkpú ne afee, o/fwon wǎn-onyinchéng mú o/mû o-bángê e Séruk.

²¹ Ńdyí o/fwon Séruk, o/chîrí égot-aje ebónge ne aje káchâtkányi, o-chîfwon bwǎn bakíri.

²² Ńdyí Séruk o/rí aje bujam esim diǐkpú, o/fwon wǎn-onyinchéng mú o/mû o-bángê e Náho.

²³ Ńdyí o/fwon Náho, o/chîrí égot-aje ebónge, o-chîfwon bwǎn bakíri.

²⁴ Ńdyí Náho o/rí aje bujam esim kátángekányi, o/fwon wǎn-onyinchéng mú odabángê Téra.

²⁵ Ńdyí o/fwon Téra o/chîrí bajam-aje batánge esim onyiryiká ne anyii, o-chîfwon bwǎn bakíri.

²⁶ Ńdyí Téra o/rí bajam-aje bachât esim diǐkpú, o/fwon Ébaram ne Náho ne Háran.

Kyikû-Banet ńkyí Téra

²⁷ Nyín kyikû-banet ńkyí Téra mú o/mû bonchí mú Ébaram ne Náho ne Háran. Háran o/mû bonchí mú Lôt,

²⁸ ne Háran o/kpú ké oshê mú Ô, mú ba/fwon ǎ, ké Bábyílon, ké nkéré mú bonchí o/tôong okpó.

²⁹ Ébaram o/bé Sára, Náho o-bé Myíka mú wǎn-Háran, mú o/mû to bonchí-Ésaka.

³⁰ Sára o/mû o*fí o-fwon n*.

³¹ Téra o/kúng Ébaram mú wǎn emen ne Lôt mú wǎn-Háran mú wǎn-wǎn emen ne Sára mú onyi-Ébaram mú wǎn emen o-dim ne mbé ké oshê mú Ô, ké Bábyílon, o/fu, nyǐ o-jâ ké esí nyí Kínan. Mbé ba/cen tete ba-ribi Háran ba-bi byise ányi.

³² Téra o/kpú ké oshê ámu ńdyí oo/rí égot-aje ebónge esim-aje atánge.