Jêmsyi 5 - Bokyi Bible

Ba/kuri Banfang-Banet Ekó

¹ Ben mú banfang-banet, fwôo n̂g atông kántîk ba-jwo mě. Suri n̂g batíí, ba-tii kakânkakân kyi-kim ne byibî-afaníkong nyí nyi a-bâ a-kâm běn.

² Efang enen ee/fwoo, ne ebá to ee/ryí byídí enen.

³ Bajâng baa/cít akpuga enen. Bajâng ḿbén nké ba/chi ba-bwom ntûesé ba-bât běn, ne mbé to nké ba/chi ba-ryí enyam-byiko enen wǎ okwâ. Ben baa/nap biǐzú-esang enen ké bankuli kyikû-ací ńnyín.

⁴ Ben ba*da/kye ne banet ḿbé mbe ba-chi i běn bǎmkpóngé ké akán-byifát enen akpuga ebe*. Jwo n̂g ejá nyí busa-dyityém ebe nyí mbe ba-sét ng běn. Ekyû nyí banet ḿbé mbe ba-chi i běn bǎmkpóngé ḿbé byíkwôn ewuri ba-fâ ké bankám mbe ba-tii ng, ee/ribi ké atông nyí Otu Kyítá mú kángkáng busa.

⁵ Akpen enen ké ejíí ńnyín aa/sú ne byěm ḿbyí byinong ne bunyîn-dyityém. Baa/nen byiko enen ba-sú baryên, ba-tî ké dyicí ńdyí bada běn efee.

⁶ Ben baa/bên onet dyizîn mú o*da/chi kyibî* nang byiko emen o*da/nyii ne ben*.

Dyityém Kyísí echee ne Nshwam efé

⁷ Chee n̂g atyém kyísí kâng, ǎ bwǎn-bané ejí, tata Otu Kyítá o-bâ. Kû n̂g eri eringe nyí mkpang kyifát mu o-chee ng dyityém kyísí ké nkéré nyǐ o-kú o-bám m o/fu, kyifát emen kyinwa byěm ḿbyí nyǐ o/kwón ké nkyí. Mu ányi o-bám m ne dyityém chee o/fu, omu-kyifang ne mú ashí-burwom ona.

⁸ Ben to ba-man ba-chee atyém kyísí. Tî n̂g achi enen nyí bamu ba-tî ng kanong kanong. Ké ebóng, dyicí ńdyí Otu Kyítá odabê dii/fárâng.

⁹ *Da n̂g echi ba-kûrime barî ké kyitông* ǎ bwǎn-bané ejí* eringe nyí Osówo oo*ba/chi o-pan běn mpan*. Mpan banet mpan oo/kpá byiko ḿbyí odanung ké esuk.

¹⁰ Bwǎn-bané ejí, zîim m̂ bamkpábé ḿbé badasét byiraa-Osówo, ḿbé ba/mû mbe ba-sét ng ké bubwô ḿbú Otu Kyítá. Kúng n̂g kámbé wǎ ekap nyí ofit eryí ké busông eri.

¹¹ Be byimu byi-kó ng kámbé banet-bunyîn-dyityém, ké nǎ, mbé ba/ryí ofit. Ben baa/jwo kyi-kim ne dyityém ńdyí onyinchéng obónge mú odabángê Jôp o/chee kyísí, ne ben bamu ba-nyît ng ba/fu, Osówo ké nkuli kyikû, o/kye ǎ byěm ḿbyí o/mû o-ryuu ng. Ké ebóng, Osówo o-ri ng banet bafip, ne byiko byi-kpú u ǎ to ne banet.

¹² Ńkyí kyi/shwôm kángkáng, ǎ bwǎn-bané ejí, nkyi něen, *dayip ocím mú a/ryí Osówo a-ryí onet ocím*. *Dachi a-sem bubóng* nang esí* nang chwǒm kyibónge*. Â a/fu, âa, kyikyú âa. Â a/fu, aa*wááng* kyikyú to aa*wááng* eringe nyí Osówo oo*ba/chi o-pan ǒ mpan*.

¹³ Onet mu kô ké burwám enen mú mu ké afaníkong dí. Onet ámu ofé nshwam. Onet mu kô mú mu ké bunyîn-dyityém dí. Onet ámu okwán ekwan-akpee o-kye Osówo.

¹⁴ Onet mu kô mú mu o-rwôm m dí. Onet ámu okó banet-ashí-ékwâbashi nyí Karâs ḿbé ba/chi ba-fé nshwam ba-kye Osówo ké bubwô emen, ba-sabe ǎ bakút, ba-kó dyizîn ńdyí Otu Kyítá.

¹⁵ Nshwam mún mú badafé ké dyityém efé ne Osówo, o/chi o-chi onet ámu mú mu o-rwôm m o-nyange. Otu Kyítá o/chi o-bêem ǎ kyíbóng, ne Osówo o/chi o-pwoo ǎ ké byibî ḿbyí oo/chi.

¹⁶ Ké bubwô ámbu kâng, sét n̂g barî byibî enen, ba-fé nshwam ba-kye Osówo ké bubwô-bánen, eringe nyí Osówo o/chi o-chi běn ba-nyange. Nshwam mú onet mú mu o-chi i kanong mu ne kiǐtí-busa ké byěm echi.

¹⁷ Elája o/mû dyizong-onet dyibónge wǎ be. Nyǐ o/fé nshwam dyityém dyibónge eringe nyí omu oo*na*. Omu o*da/na ké esí* ké aje achât ne kyicê.

¹⁸ Ne o-chîfé kâng nshwam, ne omu o-fím ké bubóng o-na. Ne byíkwôn byi-byí ké esí.

¹⁹ Bwǎn-bané ejí, â onet nang obónge ké burwám enen o/yêe o-dim, o-mîng ntûntû, onet okíri o-chîbwa ne nyǐ esim,

²⁰ zîim m̂ ńkyín ba/fu, nang yeě nké o/chi nchi byibî o-mîng byibî-akwóp emen, onet ámu o/chi o-nyii busun ḿbú nchi byibî ámu ké bukyû, ne o/chi o-chi Osówo o-pwoo banet ké byibî chwóó.