Jêmsyi 4 - Bokyi Bible

Bucín eryí ne Ejíí

¹ Kángkáng anwa enwa ne ashwôn eshwôn ne barî byi/fím nyá. Byi/fím ké ekabe enen nyí nyi e-ryuu ng byěm-bunyîn-ejíí, nyí nyi e-nwa ng kángkáng nkéré ké kafâ-enyam-byiko enen.

² Ben bamu ba-ryuu ng byěm, nké baa*man ejá kámbyí* ké bubwô ámbu, ben ba/kpá byiko ḿbyí badaju barî. Ben bamu ba-tú ng dyishí ké byěm eryuu, nké baa*man ejá kámbyí* ké bubwô ámbu nké bamu ba-shwôn n, ne ba-nwa ng to ne barî. Ben ba*fí ba-já ng ńkyí bamu ba-ryuu ng* ké nǎ, ben ba*fí ba-bí ng Osówo chwǒm ánkyi*.

³ Ké nkéré mú ben badabí, ben baa*koo kánkyí* ké nǎ, ekabe enen ee*nwa*. Ben ba-bí ng byěm ḿbyí ben badachi bunyîn-dyityém ḿbú enen.

⁴ Ben banet ḿbé ba*fí ba-kyâ Osówo ofê*. Ben ba*fí ba-nyît ng ba/fu, bucín eryí ne ejíí, ányi kyi/byí, a/firi onet-bushwôn-Osówo*? Nang yeě nké o/fu, nyǐ o-ryí i bucín ne ejíí, onet ámu o-chi i byiko emen o-firi onet-bushwôn-Osówo.

⁵ Ben bamu ba-kabe ng ba/fu, ejá-Osówo nyí ba/sáng kyísí e*da/byí chwǒm*? nyí e/fu, Osówo mu o-ryuu ng o/fu, be byikyú ne dyityém dyibónge ńdyí o/fé bě*?

⁶ Nké ochwâp mú Osówo mu o-kyâ bě mu o-shwane e, ne o/shwôm byibî-byěm eryuu. Wǎ eringe ejá-Osówo nyí ba/sáng kyísí e/fu, Osówo oo*kwárê ne bantông byiko* nké mu o-kyâ banet ḿbé mbe degere ochwâp.

⁷ Ké bubwô ámbu kâng, kye n̂g Osówo byiko enen. Né n̂g Otu-Byibî-Barím, ne nyǐ o/chi o-chêe o-mîng běn.

⁸ Bâ n̂g ba-kâm Osówo fáráng, ne nyǐ o/chi o-bâ o-kâm běn fáráng. Soo n̂g abwô enen, ǎ banchi byibî. Soo n̂g atyém enen, ǎ bannîm banet.

⁹ Kyú n̂g ké bafip, ba-tii bukyû, batíí ba-byí. Yángê ê éjwô enen e-bírî bukyû etii. Ba-yángê bunyîn-dyityém enen bu-firi bafip.

¹⁰ Jwâa n̂g byiko enen kyísí ké bushú ḿbú Otu Kyítá, ne nyǐ o/chi o-bêem běn kyíbóng.

Ekó ekuri kyi-kim ne Wǎn-Boné Eyên efu, oo*nwa*

¹¹ Bwǎn-bané ejí, *da n̂g ekûpan barî bampan ké byiko*. Nang yeě nké mu o-pan n wǎn-boné emen mpan ké byiko, nang mu o-fu ng ǎ, oo*nwa* onet ámu mu o-bîn n Byije-Músis ne mu o-fu ng kámbyí, bii*nwa*. Â wo amu a-fu ng a/fu, Byije-Músis bii*nwa* éné wo kâng a*fí to onet mú mu o-chi i eringe nyí byije ámbyi byi/sét*. Nké a/firi onet mú mu o-fu ng, byije bii*nwa*.

¹² Osówo kǎnchí nké mu nkye byije, ne nyǐ to kǎnchí nké mu mpan banet bampan. Nyǐ kǎnchí nké oda bě eman enyángê, ne nyǐ kǎnchí to nké oda bě eman eju. Wo a/kabe a/fu, wo amu ebóng dyizong-onet mú adafu, orî-onet eyên oo*nwa*.

Ekó ekuri kyi-kim ne Byiko etông

¹³ Ben mú bamu ba-raa ng ba/fu, â kyi*fí kurún* nencí, byi/chi byi-ca ké oshê obónge kyikit ńkyí byi/chi byi-rí dyije dyibónge, byi-chi bǎmkpóngé, byi-já akpuga chwóó, kû n̂g efwôo atông kántîk ba-jwo mě.

¹⁴ Ben ba*fí ba-nyît ng eringe nyí dyikpen enen dyi/chi dyi-firi nencí*. Ké nǎ, ben bamu wǎ owú mú adari kámú, ké kaǎnyín-nkéré, o-waa o-rím.

¹⁵ Ńkyí ben ba/mû ba/chi ba-kûfu nkyi něen, â Otu Kyítá o/bángê, be byi/chi byi-kpen byi-chi nang ńkyín nang ńkyí áku.

¹⁶ Nké kántîk, ben bamu ba-tông ng byiko, ba-nyîim m esim. Kángkáng azong-byiko etông ányi aa*nwa*.

¹⁷ Ké bubwô ámbu kâng, onet mú o*fí o-chi i kanong ánke* ńké nyǐ mu o-nyît ng o/fu, nyǐ o/mû o/chi o-man o-chi* onet ámu oo/chi kyibî.