Jêmsyi 3 - Bokyi Bible

Busa ḿbú Kabyíbabang

¹ Bwǎn-bané ejí, *chí ashí enen chwóó nké badafiri bantánge byiraa-Osówo* ké nǎ, ben bamu ba-nyît ng ba/fu, be mú byimu bantánge byiraa-Osówo, Osówo o/chi o-pan bě mpan o-sóng o-shwôm mú banet ḿbé áku.

² Be kángkáng byi-fwam m eróng kángkáng nkéré. Onet mú oo*róng ké ńkyí nyǐ mu o-sét ng* mu kerededet, ne o-man n eníbî to byiko emen.

³ Be byi-fâ kabyî-orá kaǎkím-kaǎré ké ocím eringe nyí kadachi ńkyí byi/fu, kachi, ne byi-man n echi kánké ka-ca nang nyá nké byimu byi-ryuu ng.

⁴ Kan n̂ achi ba-ri ńsukyíkang to, nang ké mǔ o/rêe éné, ne afú nyí aryên nké nyi a-tut ng kámú. Kaǎnyín-kaǎré nké nke ka-tông ng kámú kashú, ne o-ca kyicê ńkyí ntut ńsukyíkang mu o-ryuu ng kámú o/fu, oca.

⁵ Eringe ebónge to ne kabyíbabang, nang ké nke éné kaǎníngéníngê, ka-man n etông byiko ké biǐtí-byěm. Kabe n̂g to ba-ri eringe nyí kaǎnyín-dyimánge-okwâ dyidaman eshí kiimbâng-kyizinge.

⁶ Ne kabyíbabang nke wǎ kaǎmánge-okwâ. Ka/bwom wǎ ochíchí-kyibî-kyipang-enyam-byiko ké enyam-byiko eten, ne nke ka-káng ng byibî ké byiko eten byimúmú. Nke ka-yip ng okwâ mú mu o-fím m ké kyikit-busông eri kyiyén ka-fâ ké dyikpen eten dyimúmú.

⁷ Onet o-man n echi, ne oo/chi kángkáng enyam-dyikán nyí Osówo o/chi wǎ bunurung ne efyi ne ekworê byi-firi wǎ byitú.

⁸ Nké onet o*fí nang obónge mú odaman echi kabyíbabang emen ka-firi degere*. Ka-chi i byibî ne kaa*nwa eníbî* ne kaa/sú ne kyibî-bukye ḿbú badafé onet o-kpú.

⁹ Byi-yip ng kánké byi-kó Otu Kyítá mú mu Bonchí eten asǎma, byi-shú u to barî-banet eten ḿbé Osówo o/chi kámbé ké obî emen.

¹⁰ Ejá nyí asǎma ekó ne byishû eshú e-fím m ké ocím ámu obónge. Bwǎn-bané ejí, ńkyín kyi*dachi kyi-chi*.

¹¹ Kace ńké nke ka-byí i ké mbwo ka*fí nang kabónge ńké kadabyí omu mú odanyîn ne mú odaruu ké mbwo ámu obónge*.

¹² Bwǎn-bané ejí, dyisín-émurúkú dii*man ezím byirim-kaaká* dyisín-órîi to dii*man ezím byirim-émurúkú* nang kace-bano kaa*man ebyí omu mú badajwáp*.

Byinyídíng ḿbyí byi/fím Kyíbóng

¹³ Onet mu kô ké burwám enen mú mu ne byinyídíng ne dyishí ńdyí odaman ejwo dí. Onet ámu otông kánkyí ké dyikpen emen ńdyí dyinong ké byěm emen ḿbyí nyǐ o/chi ne budegere ne byinyídíng.

¹⁴ Nké â ké dyityém eyên amu ne kyibî-kafâ esa ké byěm-banet ne kanim enim, wo kâng aa*man a-kûtông byiko a-kûsét to byisédéng a-bât ng ntûntû*.

¹⁵ Dyizong-byinyídíng ḿbyín byi*fí byi-fím m kyíbóng* ké abwô nyí Busun-Osówo* nké mbyi byi-fím m ne byibî-bací ḿbyí ké ejíí ńnyín.

¹⁶ Kyikit ńkyí busa-dyityém ne kanim enim mbyi kô, byěm ḿbyí byiryibyiryi ne azong-byibî kángkáng byi-kyú u to ányi.

¹⁷ Nké byinyídíng ḿbyí byi/fím kyíbóng, ké mbwôp kashú, mbyi kpárám. Mbyí to mbyi ne bunyîn-dyityém ne budegere ne ochwâp. Mbyí mbyi to ne bafip eri chwóó, ne byi-kyâ to kanong ké byěm ḿbyí byinong echi. Mbyí byi*fí ne busa-dyityém ne kaǎnínǐm*.

¹⁸ Nké kanong echi nke wǎ esang-byichí nyí e/fím ké byichí ḿbyí banet ḿbé mbe ba-chi i byěm-bunyîn-dyityém ne barî-banet ba/kwón ké bunyîn-dyityém.