Jêmsyi 2 - Bokyi Bible

Ekó ekuri kyi-kim ne Banet etî eringe Ebónge

¹ Bwǎn-bané ejí, wǎ banet ḿbé ba/bángê ne atyém enen ké Jisos Karâs, Otu Kyítá eten, mú mu Otu Kyítá mú bada ǎ ekye akpee. Ben baa*man ba-kye banet ofê buko buko* wǎ eringe nyí bamu ba-ri ng kámbé ké enyam-byiko*.

² Wo a-chi i nǎ, â nfang-onet mú o/fé ókpâl mú gûl ne byídí ḿbyí byinong byinong o/bê ké kakyúng enen, ne onet-kyikpu mú o/fé bakâakâa-byídí o/bê to ké kakyúng ánke.

³ Â wo a/kye onet mú o/fé byídí ḿbyí byinong byinong ofê a-shwôm, a-sét ǎ a/fu, kyú nyín ké kyichí ńkyí kyinong. Ne a-bwa a-sét onet-kyikpu a/fu, bwom ányi nensang, aa kyú nyín kyísí fáráng ne byiká ejí.

⁴ Ányi wo aa/chi kyibî ńkyí banet ecá ké burwám enen, ne a-kú a-két ng to bampan ḿbé byibî-okabe.

⁵ Kû n̂g efwôo atông ba-jwo, ǎ bwǎn-bané ejí ḿbé dyityém. Osówo o/cá banet-byikpu ké ejíí ńnyín o/fu, mbé bafang ké atyém ebe efé ne nyǐ, ne bajá to Butu emen ḿbú nyǐ o/ryí banet ḿbé nyǐ mu o-jê ng kámbé ocím.

⁶ Nké ben bamu ba-kyâ banet-kyikpu edángé. *Chí banet-esang nké mbe ba-kyâ běn busông*? *Chí mbé nké mbe ba-tut ng běn ba-da-fé ké esuk*?

⁷ *Chí mbé nké mbe ba-cábê ng dyizîn enen ńdyí ofê ńdyí Osówo oyén o/kye běn*?

⁸ Ben bamu ba-chi i ochíchí-chwǒm, â bamu ba-chi i eringe nyí kyije ńkyí Butu ḿbú Osówo, ńkyí nkyi ké ejá-Osówo nyí ba/sáng kyísí kyi/fu, orî-onet ojê ǒ wǎ wo oyén.

⁹ Nké â ben ba*fí ba-tî ng banet eringe ebónge* ben ba/chi kyibî, ne Byije-Músis byi/chi byi-kám běn wǎ bambên kyije.

¹⁰ Ké ebóng, nang yeě nké mu o-bên n kyije kyibónge, ányi mu o-bên n byije byimúmú.

¹¹ Ké nǎ, nyǐ mú o/fu, *dachi kyinam* nké o/fu to, *daju onet*. Nang a/bwa a*da/chi kyinam* nké a/ju onet, wo a/firi mbên kyije.

¹² Ké bubwô ámbu, kû n̂g eraa ba-chi i byěm wǎ banet ḿbé kyije ńkyí nkyi kyi-chi i banet ba-kyú ké byiko ebe kyi/chi kyi-pan kámbé mpan.

¹³ Ké ebóng, Osówo oo*ba/chi o-ri onet bafip* mú nyǐ oo/pan ǎ mpan o-ri o/fu, onet ámu o*da/ri barî-banet bafip*. Nké onet mú oo/ri barî-banet bafip o*fí ne chwǒm ńkyí nyǐ odashî Osówo* mú mu o-két ng mpan*.

Édúú nyí Dyityém efé ne Osówo

¹⁴ Bwǎn-bané ejí, ebóng mpún mú onet odaryí, â o/fu, me n/fé dyityém ne Osówo, â édúú emen e*fí e-tông ng dyityém emen ándyi ńdyí o/fé ne Osówo*. Dyityém emen ńdyí o/fé ne Osówo éné dyi-man n ǎ enyángê dí.

¹⁵ Kabe n̂g kpá, â amu ne bwǎn-bané ḿbé mbe ba-ryuu ng byídí, nké ba*fí ne byiryíng ḿbyí badaryí byi-kwárê kámbé*.

¹⁶ Ebóng mpún mu ányi, â wo a/fu kámbé, Osówo ojware běn. Kyú n̂g kanong, ba-ryí to byiryíng kanong, â wo a*da/kye kámbé byěm ḿbyí dyikpen ndyi dyi-ryuu ng*.

¹⁷ Eringe ebónge nké nkyi to ne dyityém efé ne Osówo. Â dyityém efé ne Osówo ndyi kǎnchí, ńdyí édúú e*da/tyeem ne dyityém efé ándyi* ányi kyi/byí, dyityém efé ne Osówo dyi*fí to*.

¹⁸ Nké onet otô o-man n efu, onet mún o/fé dyityém ne Osówo, mú áku mu ne édúú nyí e/tyeem. Ejá nyí me ndafaa nyi něen. Tông n̂g mě onet nang obónge mú odaman ekyú ne dyityém efé ne Osówo, mú o*fí ne édúú nyí e*da/tyeem ne dyityém efé ándyi*. Me n-tông běn dyityém ejí efé ne Osówo ké édúú ejí.

¹⁹ Kyi/nwa, â wo a/bángê a/fu, Osówo mu obónge. Byibî-bací to byi/bángê éné ké banê ne bushî.

²⁰ Ben bamu ba-ryuu ng, ǎ enyam-banet, ba/fu, batông běn ba/fu, dyityém efé ne Osówo ńdyí dyi*fí ne édúú* dyi*da/byí chwǒm*?

²¹ Ébarahâm mú bonchí eten mú kpákpá o/cen nǎ ne Osówo o-két mpan o-nwa ǎ. Kyi/mû ké édúú emen ké nkéré mú o/yip wǎn emen mú odabángê Ázik o-chi kyifen o-kye Osówo ké kyikit-kyifen echi ńkyí nyǐ o/chi.

²² Ben ba-man n eri ba/fu, dyityém emen ńdyí o/fé ne Osówo ne édúú emen byi/chi bǎmkpóngé burwám. Osówo o/chi dyityém ńdyí Ébarahâm o/fé ne nyǐ dyi-kwárê ké bubwô-édúú emen.

²³ Ne ejá-Osówo nyí ba/sáng kyísí e/sét ntûntû, nyí e/fu, Ébarahâm o/fé dyityém ne Osówo, ne ké bubwô-dyityém emen ńdyí o/fé ne Osówo, Osówo o/két mpan o-nwa ǎ. Ne ké bubwô ámbu, Osówo o/kó Ébarahâm ocín emen.

²⁴ Ben ba/ri kâng ba/fu, Osówo mu o-két ng mpan o-nwa onet ké byěm ḿbyí onet ámu mu o-chi i, *chí ké bubwô ḿbú dyityém emen efé ne Osówo nké nke*.

²⁵ Kyi/mû eringe ebónge ne onyinyi mú o/mû o-ryí i akpara, mú odabángê Ráhap. Osówo o/két mpan o-nwa ǎ ké bubwô-édúú emen, ké okoo mú o/koo banet-kyitwóm ḿbé Jûs kanong, ne ké ochwâp mú o/chwáp kámbé ba-chêe ké kiǐfáng kyikíri.

²⁶ Ké nǎ, wǎ eringe nyí enyam-byiko nyí e*fí ne busun* ee/kpú, eringe ebónge to, dyityém efé ne Osówo ńdyí dyi*fí ne édúú nyí e/tyeem* dii/kpú.