Hyíburus 9 - Bokyi Bible

Ofê mú ké Ejíí ne mú Kyíbóng

¹ Mbwôp kashú-ocím mú Osówo o/ryí o/mû ne byije byi-kim ne Osówo efé ne kyikit to ńkyí onet o/chi ńkyí badafé Osówo.

² Ba/bi mpyep-kyídí mú kyifen-Osówo echi ne banfût bafee. Nfût mú obyî óbyi ba/mû ba-kó ng kámú nfût-ociring. Otyuryíkáng ne ókpákpúrúk ne berêt mú ba/chi kyifen ba-kye Osówo byi/mû ké kafâ-nfût ámu.

³ Â a/shwôm nnyinyěng-ékpígí, a-ribi ké nfût mú ba/mû ba-kó ng kámú ochíchí-nfût-ociring.

⁴ Ókpákpúrúk mú ba/chi ké gûl, mú badashí burwan ne mkpukpu-byěm-Osówo mú ba/cít kámú kángkáng ne gûl byi/mû ké kafâ-nfût ámu. Mkpukpu ámu o/mû ne kaatyu ńké ba/chi ké gûl ńké ba/fé berêt mú badakó mána, ne ochí mú Éron mú oo/byí eshǎan, ne biǐbáá-aká byifee ḿbyí ba/sáng byije-Osówo ké mbyí.

⁵ Biǐnyám byifee ḿbyí ba/mee ké gûl ne abyibabang ebe táttát byi/mû ké mkpukpu ámu twóóm ké kyikit ńkyí Osówo o/mû o-pwoo ng banet byibî, ḿbyí mbyi byi-tông ng byi/fu, Osówo mu ányi ne busan emen ḿbú ragerage. Nké kántîk, *chí nkéré mú ndasét dyishí-byěm byimúmú nang onyin oo*waa*.

⁶ Něen nké ba/mû ba/nap byěm ámbyi. Banchi kyifen-Osówo kángkáng dyicí ba-câ ké kafâ-nfût mú obyî óbyi ba-da-chi bǎmkpóngé ebe.

⁷ Nké otu-nchi kyifen-Osówo kǎnchí nké odanung ké nfût mú kafâ, ne o-nung ng to kabónge ké dyije. Nyǐ o-yip ng baróng ḿbé nyǐ odachi kyifen o-kye Osówo ké dyishí ńdyí emen ne ké ńdyí byibî ḿbyí banet ba/chi, onyît ba*fí ba-nyît ng ba/fu, mbé mbe ba-chi i byibî*.

⁸ Busun-Osówo mbu bu-tángê e wááng ké byěm ḿbyí ba/nap něen bu/fu, bukwóp ḿbú budaribi ké kafâ-ochíchí-nfût-ociring bu*da/bâa ne* ké ebóng, nfût mú obyî óbyi o/tôong cip.

⁹ Nfût mún o/bwom wǎ byifen-Osówo ḿbyí mbe ba-chi i kántîk. Ńkyín kyi/byí kyi/fu, eyáré ne byirim-byitú ḿbyí mbe ba-chi i byifen ba-kyâ Osówo bii*man echi dyityém ńdyí onet mú mu o-chi i kyifen-Osówo ánkyi dyi-firi kerededet*.

¹⁰ Mbyí kángkáng byi/kim ne byiryíng eryí nké nke ne bato ejwáp ne azobezobe-byěm nyí byiko esoo. Ḿbyín kángkáng mbyi byije ḿbyí byi/ta kiintaa-enyam-byiko nké nke, ḿbyí mbyi ne busa tete kyi-ribi ké nkéré mú Osówo o/chi o-yángê byije ámbyi.

¹¹ Nké Karâs oo/bê wǎ otu-nchi kyifen-Osówo mú byěm ḿbyí byinong ḿbyí mbyi nyín. Mpyep-kyifen-Osówo echi mú nyǐ mu o-chi i bǎmkpóngé ké mǔ mu kiǐtí o-shwôm ne o/kwárê kanong kanong. *Chí banet nké ba/chi kámú* ányi kyi/byí, mǔ o*fí ké ejíí ńnyín*.

¹² Ké nkéré Karâs o/ce ké mpyep ámu ne o-nung ké ochíchí-nfût-ociring, kabónge kyi-man éné ne banyá, nyǐ o*da/yip baróng-ebû ne ḿbé byisu-bampong o-da-kye wǎ kyifen-Osówo echi* nké nyǐ o/yip baróng ḿbé emen, ne o-koo onyii mú ne banyá o-kye bě.

¹³ Ba-myî ng banet ḿbé badaciring kámbé baróng-ebû ne baróng-batyép-bampong ne atông nyí ba/shí kyisu-mpong ké byiko, ba-soo kámbé byibî ḿbyí kyifen echi ne ba-chi kámbé ba-cé.

¹⁴ Busa ḿbú baróng ḿbé Karâs bu/jê bu-shwôm, ké ebóng, ńkyín nkyi ntûntû. Nyǐ o/kye Osówo byiko emen wǎ ochíchí-kyifen-Osówo ké bubwô ḿbú Busun-Osówo ḿbú ne banyá. Baróng emen ba/chi ba-fîm ekabe eten ké bǎmkpóngé ḿbé ba*da/byí chwǒm* eringe nyí byidafé Osówo mú mu okpó.

¹⁵ Ké bubwô ḿbún, Karâs nké mu onet mú mu o-nap ng ocím mú ofyîfî mú Osówo o/ryí, eringe nyí banet ḿbé Osówo o/kó kámbé badaryí bukyû ké byěm ḿbyí ne banyá ḿbyí Osówo o/ryí ocím. Ńkyín kyi-nwa ng echi, ké ebóng, bukyû boo/róng ḿbú mbu bu-chi i banet ba-fem ké byibî ḿbyí mbé ba/chi ké nkéré mú ba/mû ké bubwô-ocím mú kpákpá mú Osówo o/ryí.

¹⁶ Ké nǎ, â onet o/kyii bukyû emen ocím okpó, baa*ryí bukyû ké byěm emen* tete kyi-tông kyi/fu, oyén mú o/kyii bukyû emen oo/kpú.

¹⁷ Ké ebóng, bukyû ekyii bu*da/byí chwǒm* â oyén mú o/kyii kámbú o/tôong okpó*. Ba-ryí i bukyû ké byěm emen ké nkéré oyén oo/kpú.

¹⁸ Nkyí nké ba/chi nang mbwôp kashú-ocím mú Osówo o/ryí o-kyú kanong ké baróng nké nke.

¹⁹ Ké mbwôp kashú, Músis o/sét banet-Ézerel kángkáng byije-Osówo eringe nyí nyǐ o/sáng ké Nwet-Byije emen. Ne o-yip kâng kyicê-kyídí o-ním ké byire-kajang, o-lip ké baróng-byisu-bampong ne ḿbé ebû cibicibi ne omu, o-myî ké Nwet-Byije emen ne banet ámbe kángkáng.

²⁰ O-raa o/fu, nyín baróng ḿbé Osówo o/kúlî ocím mú o/ryí, mú nyǐ oo/kye busa o/fu, ben bafé kámú.

²¹ Ké eringe ányi ebónge, Músis o/myî baróng to ké mpyep-kyifen-Osówo echi ne ké kángkáng byěm ḿbyí mbe ba-chi i kyifen-Osówo.

²² Ké ntûntû, wǎ eringe Nwet-Byije-Músis o/sét, baróng ba-chi i nang kángkáng byěm byi-cé, ne Osówo o-pwoo ng byibî, â baróng ba/byí.

Kyifen ńkyí Karâs kyi-fîm m Byibî

²³ Ba-man ba-chi byěm ḿbyín ḿbyí mbyi alemeleme-bachíchí-byěm ḿbyí kyíbóng byi-cé ké bukwóp ḿbún. Nké byěm byiyén ḿbyí kyíbóng byi-ryuu ng kyifen-Osówo ńkyí kyi/nwa kyi-shwôm.

²⁴ Ké nǎ, Karâs o*da/nung ké ochíchí-nfût-ociring mú banet ba/chi* mú ba/leme ochíchí emen ne ba-chi*. Nyǐ o/nung ké bubóng buyén, ké kyikit ńkyí nyǐ mu o-bwom m kántîk, ké bushú ḿbú Osówo, ké bubwô eten.

²⁵ Otu-nchi kyifen-Osówo mú banet-Jûs o-câ ké kafâ-ochíchí-nfût-ociring kángkáng dyije ne baróng-enyam. Nké Karâs o*da/nung ányi o/fu, nyǐ o-da ng eyip byiko emen o-kye kampén chwóó*.

²⁶ Â éné kâng, nyǐ o/mû o/chi o-ri afaníkong kampén chwóó kyi-fím ké nkéré mú Osówo o/chi ejíí. Nké kâng, nyǐ kántîk oo/bê kampén kabónge kyi-man éné ké nkéré mú aje a-kú a-fárâng ng nkuli kyikû, o/fu, nyǐ o-bâ ng efîm byibî ké byiko emen eyip o-chi kyifen.

²⁷ Nang yeě nang yeě o-man o-kpú kampén kabónge, ne ké nkéré mú oo/kpú, Osówo o-man o-pan ǎ mpan.

²⁸ Eringe ebónge to Osówo o/yip Karâs o-chi kyifen kampén kabónge, eringe nyí odakúng byibî ḿbyí banet chwóó. Nyǐ o/chi o-chîbê ké nnyinyěng-nkéré mú nyǐ oo*ba/chi o-chîchi chwǒm kyi-kim ne byibî*. Nké o/chi o-ba-nyii banet ḿbé ba/kyú mbe ba-bám m ǎ.