Hyíburus 8 - Bokyi Bible

Jisos Otu-Nchi Kyifen-Osówo Eten

¹ Kántîk, ochíchí-chwǒm mú byimu byi-raa ng mu něen byi/fu, be byimu ne dyizong-otu-nchi kyifen-Osówo mú mu o-kyú u kyíbóng ké kyicê-bubwô-etyebéng-kakyúng-butu ńké Osówo mú kiǐtí-busa.

² Nyǐ mu o-chi i bǎmkpóngé wǎ otu-nchi kyifen-Osówo ké kafâ-ochíchí-nfût-ociring, ányi kyi/byí, ké kafâ-ochíchí-mpyep-kyifen-Osówo echi mú badabi ké kyídí, mú Otu Kyítá o/bi, *chí mú banet ba/bi*.

³ Ba-fîm m otu-nchi kyifen-Osówo nang orá ba/fu, ochi byifen ḿbyí eyáré ne ḿbyí byirim-byitú o-kye Osówo. Ké bubwô ámbu, otu-nchi kyifen-Osówo eten o-man o-kyú ne chwǒm to ńkyí odachi kyifen-Osówo.

⁴ Â nyǐ o/mû ké ejíí, nyǐ o/mû oo*ba/chi o-kyú nchi kyifen-Osówo ne banyá* ké nǎ, banchi kyifen-Osówo mbe kô ḿbé badayip eyáré ba-chi kyifen-Osówo eringe nyí Byije ḿbyí Músis byi/sét.

⁵ Bǎmkpóngé ḿbé mbé mbe ba-chi i wǎ banchi kyifen-Osówo ba/leme olemé ḿbé kyíbóng. Nkyi eringe ebónge ké nkéré Músis o/mû o-kú o-bâ ebi mpyep-kyifen-Osówo echi mú badabi ké kyídí, Osówo o/sét ǎ o/fu, wo, nyît ntûntû a/fu, a-chi i kángkáng byěm eringe ebónge ne ḿbyí n/tông ǒ kyíbóng-kaku.

⁶ Nké wǎ eringe nyí nkyi, Osówo oo/kye Jisos bǎmkpóngé ḿbé nchi kyifen-Osówo ḿbé ba/rêe ba-shwôm ḿbé ebe, wǎ eringe ocím mú Osówo o/ryí, mú Jisos o/tóbê Osówo ne banet, mu kanong o-shwôm, ké ebóng, o/jêem busi ké byěm ḿbyí byinong byi-shwôm ḿbyí Osówo o/ryí ocím o-sem byiko emen.

⁷ Â mbwôp kashú-ocím mú Osówo o/ryí o-sem byiko emen o/mû o*da/bên* Osówo o/mû oo*ba/chi o-chîryí nnyinyěng-ocím*.

⁸ Nké Otu Kyítá mu o-bîn n banet emen ké nkéré mú nyǐ o/raa o/fu, ací nyi a-bâ nyí n/chi n-ryí banet-Ézerel ne kyikû-banet ńkyí Júda ocím mú ofyîfî.

⁹ Oo*ba/chi o-kyú wǎ ocím mú me n/ryí ne banchí ebe ḿbé kpákpá* ké dyicí ńdyí me n/níbî kámbé ké bubwô n-sí kámbé ba-mîng esí nyí Éjip*. Ne Otu Kyítá o-raa o/fu, mbé ba/mû ba*da/fé dyityém ké ocím mú n/ryí ne mbé* nkyí nké me n*da/tî atông n-jwo kámbé*.

¹⁰ Ne Otu Kyítá o-chîraa o/fu, kántîk, nyín něen ocím mú n/chi n-ryí ne banet ḿbé Ézerel n-sem byiko ejí ké ací ányi nyí nyi a-bâ. Me n/chi n-fé byije ejí ké atyém ebe, ne n-sáng to kámbyí ké atyém ebe. Me n/chi n-kyú Osówo ebe, ne mbé to ba/chi ba-kyú banet ejí.

¹¹ Onet o*fí ké burwám ebe mú o/chi o-man o-tángê orî-onet* nang o-bwa o-sét orî-onet o/fu, nyît Otu Kyítá*. Ké ebóng, mbé kángkáng ba/chi ba-nyît mě, kyi-fím ké onet mú kyísí tete kyi-ribi ké mú kiǐtí.

¹² Me n/chi n-ri kámbé bafip ké byibî ebe, ne mm*ba/chi n-chîzîim kámbyí*.

¹³ Ké oraa mú Osówo o/raa kyi-kim ne ocím emen mú ofyîfî mú o/ryí, nyǐ oo/bên mú mbwôp kashú. Ne chwǒm nang kyirá ńkyí kii/bên kii*ba/chi kyi-chîbwon ne kyi-rím*.