Hyíburus 7 - Bokyi Bible

Nchi Kyifen-Osówo mú odabángê Otu Mekyízédek

¹ Otu Mekyízédek mún o/mû otu mú Sélim, ne o/mû to nchi kyifen-Osówo, Osówo mú kyíbóng kyíbóng. Ké nkéré mú Ébarahâm mu o-fyi ng byití ḿbyí o/ju batu, Otu Mekyízédek o/kwárê ne nyǐ o-jware ǎ.

² Ébarahâm o-kyii byěm byimúmú ḿbyí o/kpógê byití ké byikit diǐkpú, o-fîm kyikit kyibónge o-kye Otu Mekyízédek. Dyizîn ńdyí Otu Mekyízédek ké mbwôp kashú dyi/byí, otu mú kanong echi. Dyizîn emen ányi dyi/byí to, otu mú bunyîn-dyityém, ké ebóng, nyǐ o/mû otu mú Sélim.

³ Ba*da/sáng chwǒm kyi-kim ne bonchí-Otu Mekyízédek* nang kyi-kim ne boné emen* nang kyi-kim ne onet obónge mú banchí emen ḿbé kpákpá*. Ba*da/sáng chwǒm kyi-kim ne eringe ba/fwon ǎ* nang kyi-kim ne bukyû emen*. Nyǐ mu wǎ Wǎn-Osówo. Nyǐ o/waa nchi kyifen-Osówo ne banyá.

⁴ Ben ba/ri kâng eringe nyí nyǐ o/mû kiǐtí-onet? Ébarahâm mú mbwôp kashú-bonchí mú banet-Ézerel o/kyii byěm emen ḿbyí o/kpógê byití ké byikit diǐkpú, o-fîm kyikit kyibónge o-kye ǎ.

⁵ Ne Byije-Músis byi/kye kyikû-banet ńkyí Lyíva ḿbé mbe banchi kyifen-Osówo busa byi/fu, bakûkoo kyikit kyibónge ké byikit diǐkpú ne banet-Ézerel. Ányi kyi/byí, mbé mbe ba-koo ng kánkyí ne banet ḿbé oshê ebe, nang ké mbé to mbe ké kyikû-banet ńkyí Ébarahâm.

⁶ Otu Mekyízédek o/mû o*da/fím ké kyikû-banet ńkyí Lyíva* nké nyǐ o/koo kyikit kyibónge ké byikit diǐkpú ne Ébarahâm, ne o-jware Ébarahâm mú o/koo byěm ḿbyí Osówo o/ryí ǎ ocím.

⁷ Onet mú mu o-kyâ ojware o/rêe o-shwôm onet mú mu o-koo ng kámú. Ńkyín kyi*fí ne okân ké dyishí*.

⁸ Kyi-kim ne banchi kyifen-Osówo, banet ḿbé badakpú nké mbe ba-koo ng kyikit kyibónge ké byikit diǐkpú. Nké kyi-kim ne Otu Mekyízédek kâng, ejá-Osówo nyí ba/sáng kyísí e/fu, onet mú mu okpó nké o/koo kyikit kyibónge ké byikit diǐkpú.

⁹ Onet o-man n eraa o/fu, ké nkéré Ébarahâm o/kye kyikit kyibónge ké byikit diǐkpú, Lyíva, mú kyikû-banet emen badakoo kyikit kyibónge ké byikit diǐkpú, o/kye to kánkyí.

¹⁰ Ké ebóng, ba/mû ba*da/fwon ne Lyíva* nké nyǐ o/mû ké kafâ-enyam-byiko nyí Ébarahâm mú bonchí emen mú kpákpá ké nkéré Otu Mekyízédek o/kwárê ne Ébarahâm.

¹¹ Kyi/mû ké bubwô ḿbú otáng-banchi kyifen-Osówo ḿbé Lyíva nké Osówo o/kye banet ḿbé Ézerel Byije ḿbyí Músis. Kántîk, â bǎmkpóngé ḿbé banchi kyifen-Osówo ḿbé kyikû-Lyíva ba/mû kerededet, ba/mû baa*ryuu to dyizong-nchi kyifen-Osówo dyikíri dyi-chîbyí* mú mu ké otáng-banchi kyifen-Osówo mú Otu Mekyízédek* *chí mú Éron*.

¹² Ké ebóng, â ba/yángê banchi kyifen-Osówo, ba-man ba-yángê to byije.

¹³ Ké nǎ, Otu Kyítá eten mú byimu byi-raa ng byěm ḿbyín kyi-kim ne nyǐ o*da/fím ké kyikû-banet ńkyí Lyíva* ne onet-kyikû-banet emen o*fí nang obónge mú oo/chi bǎmkpóngé ḿbé nchi kyifen-Osówo ké kyikit ńkyí badachi kyifen-Osówo*.

¹⁴ Nang yeě mu o-nyît ng o/fu, ba/fwon ǎ ké kyikû-banet ńkyí Júda. Ne Músis o*da/kó dyizîn ńdyí kyikû-banet ńkyín ké nkéré nyǐ o/raa kyi-kim ne banchi kyifen-Osówo*.

Nchi Kyifen-Osówo Okíri mú mu wǎ Otu Mekyízédek

¹⁵ Chwǒm ńkyín kyi/bwa kyi-firi wááng kyi-shwôm oshwǒm. Nchi kyifen-Osówo okíri mú mu wǎ Otu Mekyízédek oo/byí.

¹⁶ Nyǐ ba*da ǎ echi nchi kyifen-Osówo ké byije ḿbyí banet*. Ké bubwô ḿbú busa ḿbú dyikpen ńdyí dyi*fí ne nkuli kyikû* nké nyǐ o/firi nchi kyifen-Osówo.

¹⁷ Ké ebóng, ejá-Osówo nyí ba/sáng kyísí e/fu, wo a/chi a-kyú nchi kyifen-Osówo mú ne banyá ké otáng mú nchi kyifen-Osówo mú Otu Mekyízédek.

¹⁸ Osówo oo/tî kâng Byije-Músis ké bukô, ké ebóng, byi/mû kyeekyee nang chwǒm to byi*da/byí*.

¹⁹ Ké ebóng, Byije-Músis byi*da/man echi chwǒm nang kyibónge kyi-firi kerededet ké bushú ḿbú Osówo*. Kántîk kâng, achi etî nyí a/nwa a-shwôm aa/bê, nyí byi/chi byi-cen ké nyǐ byi-bâ byi-kâm Osówo fáráng.

²⁰ Osem mú Osówo o/sem mu ányi cibicibi. Dyizong-osem ámu o/mû o*fí ké nkéré ba/chi banet ḿbé áku banchi kyifen-Osówo*.

²¹ Nké Jisos o/firi nchi kyifen-Osówo ké bubwô ḿbú Osówo o/sem byiko emen ké nkéré Osówo o/sét ǎ o/fu, me Otu Kyítá nn/sem, ne mm*ba/chi n-yángê dyityém ejí*. Wo a/chi a-kyú nchi kyifen-Osówo mú ne banyá.

²² Chwǒm ńkyí Jisos o/yángê něen kâng nké kyi/chi ǎ o-bwom ké otyém ké ocím mú o/nwa o-shwôm mú Osówo o/ryí.

²³ Chwǒm kyikíri nkyi kô ńkyí Jisos o/yángê ne banchi kyifen-Osówo. Banchi kyifen-Osówo ba/mû ba/jê, ké nǎ, mbé ba/kpú ne ba*da/chîman ece kashú ne bǎmkpóngé ebe*.

²⁴ Nké Jisos mu o-kpen n ne banyá ne banyá, ne bǎmkpóngé emen wǎ nchi kyifen-Osówo baa*man eshwôm ké abwô emen ba-kâm onet okíri*.

²⁵ Ké bubwô ámbu, Jisos, kántîk ne kángkáng nkéré, o-man n enyii banet ḿbé mbe ba-bâ ba-kâm Osówo ké bubwô emen. Ké nǎ, nyǐ mu o-kpen n ne banyá ne banyá mú odaman etîm Osówo arông ké bubwô ebe.

²⁶ Jisos kâng nké mu otu-nchi kyifen-Osówo mú o/kwárê bě kanong kanong. Nyǐ mu kanong ké bushú-Osówo. Nyǐ o*fí ne ébîn* nang kyibî ké byiko emen*. Nyǐ Osówo oo/cá ǎ ké burwám ḿbú banchi byibî ne oo/yip ǎ o-tî kyíbóng kyíbóng.

²⁷ Nyǐ o*fí wǎ batu-banchi kyifen-Osówo bakíri*. Nyǐ o*fí ne bukwóp ḿbú odachi kyifen-Osówo kángkáng dyicí* ké bubwô ḿbú byibî ḿbyí emen nyǐ oyén kpá* ne o-kûchi ké bubwô ḿbú byibî ḿbyí banet bakíri*. Nyǐ o/chi kyifen-Osówo kyibónge kampén kabónge to kyi-man éné, ké nkéré mú nyǐ o/yip byiko emen o-chi kyifen o-kye Osówo.

²⁸ Byije-Músis byi-fîm m banet ḿbé ba*da/kwárê* ba-firi batu-banchi kyifen-Osówo. Nké ocím mú Osówo o/ryí o-sem byiko emen, ányi Byije ḿbyí Músis bii/bê kpá, mǔ nké o/fîm Wǎn-Osówo mú Osówo oo/chi ǎ o-firi ké kanong ńké ne banyá.