Hyíburus 6 - Bokyi Bible

¹ Bâ n̂g kâng byi-mîng bambwôp kashú-byěm ekwâa kyi-kim ne kyitwóm ńkyí banet ḿbé ba/bángê ne Karâs, byi-ca kashú ne bachíchí-byěm etángê. Byi*dachîkpet kyikû ńkyí byidané bǎmkpóngé ḿbé ba*da/byí chwǒm* eringe badafé dyityém ne Osówo*

² nang ńkyí badatángê kyi-kim ne byiko esoo* nang ńkyí abwô etwôom* nang ńkyí ojwóbe ké bukyû* nang ńkyí nkuli kyikû-mpan*.

³ Bâ n̂g byi-ca kashú. Ńkyín nké byi/chi byi-chi, â Osówo o/bángê.

⁴ Ké ebóng, kyi-cen n nǎ ne ba-chîchi banet ḿbé baa/né Osówo ba-chîsaa byiko ebe ba-mîng byibî echi. Mbé ba/mû ba/kyú ké kiinwángé ńkyí Osówo, ké nkéré obónge. Mbé ba-koo eyáré nyí Osówo, ne ba-koo kyicê-busa ḿbú Busun-Osówo ńkyí ebe to.

⁵ Mbé mbe ba-nyît ng ba/fu, ejá nyí Osówo nyi kanong ké byěm ḿbyí mbé baa/ri. Ne baa/nyît kyi-kim ne busa ḿbú ké nkéré mú mu o-bâ.

⁶ Ne mbé kâng ba-né Osówo. Kii*nwa to echi* ńkyí badachîbwa esim ne mbé* byiko byi-kpú kámbé ké byibî ebe* ké ebóng, mbé mbe ba-chî ng emán Wǎn-Osówo ké kyikwap ńkyí badashwân onet, ne mbe ba-tî ng ǎ wááng ké éshwân nyí kyíjí.

⁷ Osówo mu o-jware ng esí nyí nyi e-jwáp ng omu mú mu o-na ng ké nyǐ, ne nyi e-kán n byichí ḿbyí mbyi byi-chwáp ng banet ḿbé ba/kwón ba-tî kámbé.

⁸ Nké nyǐ ee*byí to ké chwǒm* â byiwong ne biǐbyâa mbyi byi-kán n ké nyǐ*. Nyǐ e/firi ké kyibî-bukwóp ḿbú Osówo odashú kányí, ne Osówo o/chi o-bên kányí ké okwâ.

⁹ Nké nang byimu byi-raa ng něen, ǎ bacín eten ḿbé dyityém, be byimu byi-kabe ng kanong kyi-kim ne ben. Be byimu byi-nyît ng byi/fu, ben bamu ké bukwóp ḿbú kanong, ne bamu ne onyii mú Osówo.

¹⁰ Osówo oo*ryí acît*. Nyǐ oo*ba/chi o-ráp bǎmkpóngé ḿbé ben ba/chi* nang o-bwa o-ráp kyijé enen ńkyí ba/tông kyi-kim ne nyǐ ké ochwâp mú ben ba/kye ne mú ba/tôong ba-kyâ barî-banet enen ḿbé ba/bángê ne Karâs*.

¹¹ Kiǐtí-chwǒm ńkyí be byimu byi-ryuu ng nkyi něen. Byimu byi-ryuu ng nang yeě nang yeě ké burwám enen byi/fu, achi emen etî awaa tete ké nkuli kyikû, eringe byěm ḿbyí bamu ba-tî ng achi byi/chi byi-chi ké ntûntû.

¹² Be byi*fí byi-ryuu ng byi/fu, ben kû n̂g edare*. Nké byimu byi-ryuu ng byi/fu, kyú n̂g wǎ banet ḿbé ba/fé dyityém ne Osówo ne mbe atyém chee, ne ba-koo kâng ńkyí Osówo o/ryí ocím.

Ocím mú Osówo o/ryí mu Ntûntû

¹³ Ké nkéré Osówo o/ryí Ébarahâm ocím, nyǐ o/sem o/fu, nyǐ o-chi i ńkyí nyǐ oo/ryí ocím. Ké onet o*fí mú o/rêe o-shwôm ǎ* nyǐ o/sem o-kó dyizîn ńdyí emen nyǐ oyén.

¹⁴ Osówo o/fu, me n/ryí ǒ ocím n/fu, n/chi n-jware ǒ, n-kye ǒ to banet chwóó ké kyikû eyên.

¹⁵ Ébarahâm o/chee dyityém kyísí, ké bubwô ámbu, nyǐ o/koo ńkyí Osówo o/ryí ocím.

¹⁶ Ké nǎ, â onet o-kú o-sem m, o-kó ng dyizîn ńdyí onet mú o/rêe o-shwôm ǎ. Chwǒm esem nké kyidatóbê kángkáng ekân ké dyishí ne barî-banet.

¹⁷ Osówo o/mû o-ryuu ng o/fu, banet ḿbé ba/chi ba-koo ńkyí nyǐ o/ryí ocím kyikyú kámbé wááng, o/fu, nyǐ oo*yángê dyityém emen*. Ké bubwô ámbu, nyǐ o/sem dyizîn emen o-nye ne ocím mú o/ryí.

¹⁸ Ké bubwô ḿbú byěm ámbyi byifee bii*nwa eyángê* ne Osówo to oo*man esét kyisédéng kyi-kim ne mbyí* be mú bii/chêe byi-da-rem oshê emen, oo/kye bě dyityém ecíp kanong kanong ńdyí byidaníbî achi eten etî kíngkíng ké byěm ḿbyí nyǐ o/tî bě ké bushú eten.

¹⁹ Achi eten etî a/níbî atyém eten kíngkíng ne shwaneshwane wǎ kyikim-kiǐré ńkyí kyidaníbî ókpǐ o-bwom ké kace, ne nyi a-shwôm m ké ékpígí nyí kiǐtí-kyise-kyifen-Osówo echi ńkyí kyíbóng tete a-ribi ké ochíchí-nfût-ociring.

²⁰ Jisos oo/nung kpá ányi o-sí bě ké bubwô eten. Nyǐ o/firi otu-nchi kyifen-Osówo mú ne banyá ké otáng mú nchi kyifen-Osówo mú odabángê Otu Mekyízédek.