Hyíburus 5 - Bokyi Bible

¹ Otu-nchi kyifen-Osówo nang orá, ba-fîm m ǎ ké burwám ḿbú barî-banet emen. Ne ba-tî ǎ ba/fu, okyú wǎ ḿgbán mú Osówo ké bubwô ebe, o-kûkye eyáré ne kyifen-Osówo echi ké bubwô ḿbú byibî ebe.

² Ké bubwô ḿbú nyǐ oyén mu kyeekyee ké akwóp chwóó, nyǐ o-man n ekyú ne édúú nyí dyityém ńdyí degere ne banet ḿbé ba*fí ba-nyît ng chwǒm* ne ba-róng ng ké byěm echi.

³ Ké bubwô ḿbú nyǐ oyén to mu degedege, nyǐ o-man o-kûchi byifen-Osówo, *chí ké bubwô ḿbú byibî ḿbyí banet emen nké nke*. Nké o-chi i to ké bubwô ḿbú byibî ḿbyí emen nyǐ oyén.

⁴ Onet o*fí mú odaman efîm byiko emen o-tî o/fu, nyǐ o-chi i kiǐtí-bǎmkpóngé-ofê wǎ otu-nchi kyifen-Osówo*. Ké bubwô ḿbú okô mú Osówo nké nke nké mbe ba-chi i onet o-firi otu-nchi kyifen-Osówo wǎ eringe nyí Osówo o/mû o/kó Éron.

⁵ Ké eringe ányi ebónge, Karâs o*da/kúng ofê nyǐ oyén o/fu, nyǐ o-chi i otu-nchi kyifen-Osówo*. Nké Osówo nké o/raa ne nyǐ o/fu, wo a-chi i Wǎn ejí, kurún, me n/firi Bonchí eyên.

⁶ Nyǐ o/chîraa ké kyikit kyikíri o/fu, wo a/chi a-kyú nchi kyifen-Osówo mú ne banyá ké otáng mú nchi kyifen-Osówo mú odabángê Otu Mekyízédek.

⁷ Ké nkéré Jisos o/mû ké ejíí ńnyín, o/yip ejá kyíbóng kyíbóng ké banshwam emen efé ne ké byěm ḿbyí o/mû o-bí ng Osówo ne batíí ké achi, Osówo mú oda ǎ eman enyii ké bukyû. Ne Osówo o/jwo ejá emen, ké ebóng, nyǐ o/kúng byiko o-tî kyísí, ne o-chi to ńkyí Osówo o/sét ǎ.

⁸ Nké nang ké nyǐ mu Wǎn-Osówo, nyǐ o/kwâa ofê-onet ké afaníkong emen nyí o/ri.

⁹ Ké nkéré mú Osówo oo/chi ǎ o-kwárê ké kángkáng byěm, nyǐ o/firi ochíchí-onet mú odakye onyánge mú ne banyá, mú kángkáng banet ḿbé ba/kye ǎ ofê.

¹⁰ Ne Osówo o-kó ǎ o/fu, okyú otu-nchi kyifen-Osówo ké otáng mú nchi kyifen-Osówo mú odabángê Otu Mekyízédek.

Ekó ekuri kyi-kim ne Orông

¹¹ Byěm byi/jê ḿbyí byidaraa kyi-kim ne chwǒm ńkyín. Nké kyi-sóng ng esét eringe nyí kyida běn efiri wááng ké atyém, ké ebóng, ben kyi-sóng ng běn ne ba-nyît dyishí-chwǒm babap.

¹² Nkéré o/mû běn chwóó mú ben ba/mû ba/chi ba-kyú bantánge byiraa-Osówo, nké ba/tôong ba-ryuu ng onet mú oda běn etángê bambwôp kashú-byěm ḿbé kyitwóm-Osówo. Ńkyí ben ba/mû ba/chi ba-kûryí byiryíng ḿbyí shwaneshwane, ben ba/tôong ba-jwáp ng abî-mpong.

¹³ Nang yeě mú mu o-jwáp ng abî-mpong o/tôong wǎn-ojújwô mú o*da/nyît ne chwǒm kyi-kim ne kyibî ne kyinong*.

¹⁴ Nké byiryíng ḿbyí shwaneshwane kâng ba-kyâ bakínkán ḿbé baa/kwâa efwôo ké bubyíbabang ba-nyît eringe badacá ńkyí nkyi kyinong ne ńkyí nkyi kyibî.