Hyíburus 4 - Bokyi Bible

¹ Kántîk, ocím mú Osówo o/ryí bě oo/tông o/fu, be byi-man n ece byi-da-nung byi-jáng ne nyǐ. Mîng n̂g byi-kyú ne bushî kâng, eringe onet nang obónge ké burwám eten oo*ba/chi o-kyú* mú oo*ce ké dyijâng ándyi*.

² Ké ebóng, be bii/jwo Bǎmpém ḿbé Banong wǎ eringe nyí mbé ba/jwo. Mbé ba/jwo kyitwóm ánkyi, nké kyi*da/chwáp kámbé* ké ebóng, ké nkéré mú mbé ba/jwo kánkyí, mbé ba*da/koo kánkyí ne atyém ebe*.

³ Be mú byi/fé atyém eten ne Osówo kâng nké byidanung byi-jáng ne Osówo. Nkyi éné wǎ eringe nyǐ o/sét o/fu, me kyi/mû kyi/sa mě ne n-ryí ocím shwaneshwane n/fu, mbé ne banyá baa*ba/chi ba-nung nyín ba-jáng ne me*. Nyǐ o/fu kánkyí, nang ké bǎmkpóngé emen ba/mû baa/man kyi-fím ké nkéré mú nyǐ o/chi ejíí.

⁴ Ké nǎ, ba/raa něen kyi-kim ne dyicí ńdyí ací aa/byí káchâtkányi ké kyikit kyibónge, ké ejá-Osówo nyí ba/sáng kyísí ba/fu, Osówo o/jáng ké bǎmkpóngé emen kángkáng ké dyicí ńdyí ací aa/byí káchâtkányi.

⁵ Ba/chîraa kyi-kim ne ńkyín ba/fu, mbé ne banyá baa*ba/chi ba-nung ba-jáng ne me*.

⁶ Banet ḿbé ba/bwóp kashú ba-jwo Bǎmpém ḿbé Banong ba*da/nung ba-jáng ne Osówo* ké ebóng, mbé ba/mû ba*da/fé atyém ebe ne Osówo*. Nké banet bakíri kâng mbe kô ḿbé Osówo o/bángê kámbé o/fu, banung ba-jáng ne nyǐ.

⁷ Ńkyín nkyi ntûntû, ké ebóng, Osówo mu o-tî ng dyicí dyikíri ńdyí mbe ba-kó ng Dyicí ńdyí Kurún. Osówo o/raa kyi-kim ne ndyí ké ocím mú Otu Dívit, ké bujê-aje nyí aa/shwôm ké esim. Nyǐ o/raa bachíchí-ejá nyí byi/mû bii/kó ké ejá-Osówo nyí ba/sáng kyísí ba/fu, â ben ba/jwo ejá nyí Osówo, kurún, *da n̂g echi ba-rêe atyém*.

⁸ Ké nǎ, â Jóshwa o/mû o/kpî banet ámbe ba-nung ké dyijâng ne Osówo, Osówo o/mû oo*ba/chi o-chîraa kyi-kim ne dyicí-dyijâng dyikíri*.

⁹ Ké bubwô ámbu kâng, banet ḿbé Osówo ba/tôong ne dyijâng wǎ ńdyí Osówo o/jáng ké dyicí ńdyí ací káchâtkányi.

¹⁰ Ké ebóng, nang yeě nké o/nung mu o-jáng ng ne Osówo, onet ámu o-jáng ng to ké bǎmkpóngé ḿbé emen wǎ eringe nyí Osówo o/jáng ké ḿbé emen.

¹¹ Bâ n̂g kâng byi-nwa ne busa eten, eringe nyí byidanung byi-da-jáng ne Osówo. Be ashí amúmú bii*man byi-né wǎ eringe mbé ba/né* ne ba*da/man ece ké kafâ*.

¹² Ké nǎ, ejá nyí Osówo nyi ekpó, nyi to ne busa. Nyǐ e-nen n e-shwôm mpyi mú odanen esim emúmú. Nyǐ e-két ng kafâ-onet tete e-ribi ké kyikit ńkyí busun ne dyityém byi/cibi ne barî, ne ké kyikit ńkyí acit ne basô ḿbé ké kafâ-byikúú byi/cibi kyikit kyibónge. Nyǐ nyi e-pan n mpan mú byěm eryuu ekyú ne mbyí, ne mú ekabe nyí ké atyém-banet.

¹³ Chwǒm kyi*fí nang kyibónge ńkyí kyidanwa erôo ké bushú ḿbú Osówo*. Kángkáng byěm ḿbyí Osówo o/chi mbyi bâabâa ne kyíjí wááng ké achi nyí emen. Ké bushú emen to nké be kángkáng byi/chi byi-bwom byi-sét kángkáng byěm ḿbyí byi/chi ké dyikpen eten.

Jisos Kiǐtí-Otu-Nchi Kyifen-Osówo

¹⁴ Bâ n̂g kâng byi-bwom kíngkíng ké dyityém eten ńdyí byi/fé ne Jisos wǎ eringe nyí be byimu byi-sét ng. Ké nǎ, be byimu ne kiǐtí-otu-nchi kyifen-Osówo mú oo/dim o-kâm Osówo, ányi Jisos mú Wǎn-Osówo.

¹⁵ Otu-nchi kyifen-Osówo eten o*fí onet mú oo*ri bě bafip ké bukyeekyee eten*. Ńkyí nkyí kyi*fí éné*. Be byimu ne otu-nchi kyifen-Osówo mú ba/kan ǎ ké kángkáng azong-akwóp nyí be byi/bwom ké nyǐ, nké o*da/chi kyibî*.

¹⁶ Mîng n̂g byi-kyú kâng shwaneshwane, ne byi-byí byi-bwom ké kakyúng-butu ńké Osówo ńké nke ne kanong ńké Osówo. Ányi nké Osówo o/chi o-ri bě bafip, ne byi-já to kanong ńké Osówo ńké ka/chi ka-chwáp bě ké nkéré mú byi-kú byi-ryuu ng kanong ánke.