Hyíburus 3 - Bokyi Bible

Jisos o/rêe o-shwôm Músis

¹ Barî-banet ejí ḿbé ba/kwárê ké bushú ḿbú Osówo, ḿbé Osówo oo/kó běn to, kû n̂g ekabe kyi-kim ne Jisos mú Osówo o/twóm ǎ o/fu, oba-kyú otu-nchi kyifen-Osówo mú obánge mú byimu byi-sét ng wááng.

² Nyǐ o/fé dyityém emen ne Osówo mú o/cá ǎ o/fu, ochi bǎmkpóngé ḿbén wǎ eringe nyí Músis o/fé dyityém ké bǎmkpóngé emen wǎ onet-dyishí mú kángkáng banet-Osówo.

³ Ba-kpee ng onet mú o/bi kyise ba-shwôm kyise kyiyén. Ké eringe ányi to ebónge, Jisos o/kwárê mú bada ǎ ekye akpeef chwóó a-shwôm nyí Músis.

⁴ Nké kyise nang kyirá kâng onet nké o/bi. Nké Osówo nké o/chi kángkáng byěm.

⁵ Músis wǎ ḿgbán o/fé dyityém ké bǎmkpóngé emen wǎ onet-dyishí mú kángkáng banet-Osówo, ne o-raa kyi-kim ne byěm ḿbyí Osówo o/chi o-raa, ké nkéré mú mu o-bâ.

⁶ Nké Karâs wǎ Wǎn-Osówo o/fé dyityém ké bǎmkpóngé emen wǎ onet-dyishí mú banet-Osówo. Be byi-chi i banet emen, â be byimu byi-cíp ng dyityém byi-câ kashú, ne â byi/tî to atyém eten ké ńkyí byimu byi-tî ng achi.

Dyijâng ńdyí Banet ḿbé Osówo

⁷ Ké bubwô ámbu kâng, wǎ eringe Busun-Osówo mbu bu-raa ng bu/fu, â ben ba/jwo ejá nyí Osówo, kurún,

⁸ *da n̂g echi ba-rêe atyém* wǎ eringe nyí ba/mû ba/rêe ké nkéré ba/bírî bunwa ne Osówo* wǎ eringe nyí ba/mû dyicí ándyi ké kyikim-dyikán ké nkéré ba/kan ǎ*.

⁹ Osówo o/fu, ányi nké banchí enen ḿbé kpákpá ba/kan mě nang ké mbé ba/ri ńkyí n/chi ké bajam-aje bafee.

¹⁰ Ké bubwô ámbu, me kyi/mû kyi/sa mě ne banet ámbe ne n-raa n/fu, mbé atyém ebe nyi a-tánê e a-câ kángkáng nkéré, ne baa/né byije ejí etî.

¹¹ Me kyi/mû kyi/sa mě, ne n-ryí ocím shwaneshwane n/fu, mbé ne banyá baa*ba/chi ba-nung nyín ba-jáng ne me*.

¹² Bwǎn-ńnâ, kám m̂ byiko enen kanong, eringe onet nang obónge ké burwám enen oo*ba/chi o-kyú ne kyibî-dyityém ne okân ké dyishí* kyi-chi ǎ o-bírî Osówo mú mu okpó esim*.

¹³ Nké eringe nyí kyibî kii*ba/chi kyi-nîm onet enen nang obónge o-firi nrêe dyityém* ben ba-man ba-chwáp barî kángkáng dyicí ké ejá ányi nyí e/fu, kurún, e/tôong běn ké atyém, nyí nyi ké ejá nyí Osówo nyí ba/sáng kyísí.

¹⁴ Ké nǎ, be kángkáng byimu ké burwám ne Karâs, â be byi/níbî atyém eten nyí byi/mû ne nyǐ ké kiimkpet kyikû kíngkíng tete kyi-ribi ké nkuli kyikû-nkéré.

¹⁵ Nyín něen ńkyí ejá-Osówo nyí ba/sáng kyísí e/fu, â ben ba/jwo ejá nyí Osówo, kurún, *da n̂g echi ba-rêe atyém* wǎ eringe nyí ba/mû ba/rêe ké nkéré mú ba/bírî bunwa ne Osówo*.

¹⁶ Yeě o/jwo ejá nyí Osówo ne o-bírî bunwa ne nyǐ. Kángkáng banet ḿbé Músis o/fîm kámbé ba-mîng oshê mú badakó Éjip.

¹⁷ Yeě mú Osówo o/sa kafâ ne nyǐ ké bajam-aje bafee. O/sa ne banet ḿbé ba/chi byibî, ḿbé ba/kpú ké kyikim-dyikán.

¹⁸ Osówo o/mû o-raa ng kyi-kim ne be yeě ké nkéré o/ryí ocím shwaneshwane o/fu, mbé ne banyá baa*ba/chi ba-nung nyín ba-jáng ne me*. O/mû o-raa ng kyi-kim ne banet ḿbé ba/bírî bunwa ne nyǐ.

¹⁹ Be byi-ri ng kâng byi/fu, mbé ba*da/man enung ké kafâ* ké bubwô ḿbú mbé ba*da/fé atyém ebe ne Osówo*.